Search form

Apung 15

Abram ko Goa Athalu-e

1Nungthanko, Abramüh atsangshei tsak ep, naiuso Apaou nou apa tü ngiotsün lula, “Lahat Abram, Ngo ni angja ainou sojei-e naiuso ni hao paopei asong tsak kiu-e.”

2Lüko Abramüh thalan, “Oh Apaou Goa, ngo thso tsühakün ta ni ti paopei amei noi-ela? Jü tengkamao Damaska hai nou Eliezer lu noin. 3Ni ngo hao methso tsükiuphe, jü sua so ongko tsaküh jü teng kamao noin.”

4Nai loüh Apaou nou apa tü ngiotsün lulan, “Nung sua Eliezerüh ateng tsükame; lüko nitü chetsinyimtsün melothso noulu ateng kame.” 5Apaou nou apa kengchiai nialükhun küta ngiom, “Maou nai athaplu, küta kianthso nouso lüvelu; athsaosithsoso nung chiai piakü noi-e.”

6Abramüh Apaou da amonglam niolut, küta nung shioko Apaou nou monglingkü noiküla, küta Goa nou apa asio ta welut.

7Nai Apaou nou Abram tü ngiom, “Ngo Apaou, sauüh ni hao nung goum tengkam kiuao thaiutha ni Babilon goumchi Ur ainou niakü shin.”

8Lüko Abramüh sangshin, “Oh Apaou Goa, ngo nung tengkam kame ta ngo ti tsangkü nge-e?”

9Apaou nou thalakü ngiom, “Ngü hao jangtso tsak, won tsak, onnemok tsak, nungso apem pon sümeme nyanlokü noitsün, naiuso mükham tsak, naiuso waiothe tsak, ta kankü ashi.” 10Naiuso Abramüh Goa dongai kankü shikü wemwemko hethatkü haoson pungkü momo ethsathsa tha-e tha-e kü athung nime shan, lüko apaüh waio nouso to tsühethat. 11Mea hetsün letche nouso nung mea nouso chiai saom, lüko Abramüh ngüso koman.

12Tilai aje saokü noiküla, Abram niongaokü sailaan, naiuso ahat ao lümeikü anyakhem apa khütha ai shin. 13Apaou nou apa tü ngiom, “Athsaosithsoso gohmao goumchi tsak nai mesanao iula-e, ngüso nungai sua noi-e, naiuso ngüso tü pon 400 ngoikü thsüokü angjakü kankei-e. 14Lüko ngo ngüso asam sua ao kankeitsün mele angja kiu-e, naiuso tilai ngüsoüh nung gohmao goumchi nou wan-e, ngüsoüh ngüsoko memei jengtsaiu piakü sunkü khuwane. 15Ni apim we sümkü kih-e, aalu nai ni eane küta khanane. 16Athsaosithsoso nungai laokü moshikün khako vetao püle nungai noi-e, tiautenai ngüso akausai ta angja kiuao lümeikü mo-iulakün lektso ngo Amor hai tsükomane.”

17Tilai aje napan küta ah nyakhemkü iula, inkhao khaotsün in pulak naiuso in outsün tsonje alekta sung küta thainian hepekkü taiutsün ajet nai yanlükhun. 18Nung ko Apaou nou Athalu-e tsak Abram ko shan. Apaüh ngiom, “Athsaosithsoso hao ngo nung goumchi apem Ijip elung ainou Eufrates haiumong asong saokü, 19Ken hai, Keniz hai, Kadnon hai, 20Het hai, Periz hai, Refaim hai, 21Amor hai, Kanan hai, Girgas hai, Jebus hai, ngüso goumchi hakü apem kiuwanao thalou-iu.”

ASIO THSAMLAI

©2005 Bible Society of India

More Info | Version Index