Search form

Apung 16

Hagar naiuso Ismael

1Abram tsammongnyiu Saraiüh apa hau methso tsüchetkiu. Lüko nung nyiuhai nou Ijip hai sua menyiuthso tsak Hagar ta niankü taiuküla, 2naiuso apaüh Abram tü ngiom, “Apaou nou ngo methso chettsün ainou pungekü taiuwan. Jü sua menyiuthso nouko lü em ta ngo ni tü kojaji. Tsüngean, apaüh ngü hau methso tsak chetkiuau shiom.” Abramüh apatü Saraiüh ngiotsün ko mongchiokü iula. 3Nungtiphe Saraiüh Hagar Abram hau tsamkhaiu yangtsün tsüyankü menyiu the-iau kiu, (nung Abram Kanan nai pon che kihkütün phiai thawao.) 4Abram Hagar ko em, küta apa pem tsükengkü iula. Tilai apa pem tsükengkü iulakü ngesan, apa Sarai lochikü bülomkü iula.

5Nai Saraiüh Abram tü ngiom, “Hagarüh ngo lochitsün nung ni aphio. Ngo jüpemüh apa nihau kium, küta apa pem tsükengkü iulatsün epsan nouko yakü, apaüh ngo lochiji. Apaou nou je jetko ni süne ngo ayamtha nai noin nung mi lükhem!”

6Abramüh thalakü ngiom, “Thatü mei, apa ni ün sua noin naiuso aoukong khemko noin; ni apa tü tilüsong chhiau aiuji lüchhi.” Nai Saraiüh Hagar tü thsüokü angja kiukü kankei küta Hagar khulükhunan.

7Apaou hong nou Hagar ko singtso goh nai khiam noitsün tsak Shur ai khutsün yamai phete, 8küta ngiom, “Sarai sua nyiuhai, Hagar, ni ti ainou shin naiuso ni tiai khu-e?”

Apaüh thalakü ngiom, “Ngo, ngü taiutsün nyiuhai ainou khulükhunanji.”

9Apaüh ngiom, “Apa dongai laokü shiküta apa sualu lüthe.” 10Nai hong nou ngioshin, “Sauüh wesanao tsüshiokü ngo ni hau thsaosithsoso piakü kiu-e. 11Ni melothso tsak chette, naiuso ni apa nian Ismael ta niane, tiautenai Apaou nou ni angja nai wetsün lula-iu. 12Lüko athso nung tsüthakipkün gado tsak khekkü noi-e; apaüh khaiunia pungkü tü khengshi-e, naiuso khaiunia pungkü nou apa tü khengshi-e. Apa meshen tsammongso chikü ainou pungekü kih-e.”

13Hagarüh apa chija sanglokü ngiom, “Ngü Goa atsüoteng epküta nung thaiutha chiteshiau loüh aa noin süne?” Nungtiphe apaüh Apaou, sauüh apa ep nungtü “A-Eptsün Goa” ta jon. 14Nung shioko khaiuniahoi nou Kades si Bered ne jetko noitsün temkhao tü, “Ngü Eptsün Aa Goa Tsak ün Temkhao” ta jonji.

15Hagarüh Abram hau melothso tsak chetkiu, küta apa nian Ismael ta niankiu. 16Nung taoko Abram achetpon 86 noiküla.

ASIO THSAMLAI

©2005 Bible Society of India

More Info | Version Index