Search form

Apung 22

Goa nou Abraham tü Isak Chaithio Kiuau Sangji

1Atao intso noiküta Goa nou Abraham tü thelu; Goa nou apa tü jon, “Abraham!” Nungaih Abrahamüh thalakü ngiom, “Hauh, ngo nungai noin!”

2Goa nou ngiom, “Athso anialo,” “melothso pemsa nou athso Isak, ni sau tü thatü tsüojinji, apa nialokü ta Moria goumchi nai lükhu, nungai king tsak ngo nitü hane, apa ngü hau chaithio tsak akiu.”

3Nungthan nyap beta Abrahamüh chaithio kiu nai hau pai ajantso sanpek kü, apa gado hau kani, küta Isak naiuso apako tsamki nime nialo, küta Goa nou chitetsün athang yamkü ngüso tsalokü khu. 4Samnyap nouko nai Abrahamüh athang nou intso komaikü ep; 5nungaih apaüh tsamki nouso tü ngiom, “Gado nou hakü nungko anoi. Melothso nou je nungai khuküta amkhame, küta sam asam dongai laokü shi-e.”

6Abrahamüh amkham kiuau thaiutha pai nou Isak hau pi-i, küta apa pemüh salaiu tsak naiuso in nyailo yaao in kaio kan. Ngüso aikü tsakeikü khu taoko, 7Isaküh ngiom, “Po!”

Apaüh thalakü ngiom, “Hauh, Jü thso”

Isaküh sangkü ngiom, “Ngo niko in kaio naiuso pai noulu epji, lüko thumkü jahkü amkham kiuau thaiutha onnemok thso nou tiai noin?”

8Abrahamüh thalakü ngiom, “Goa pemüh tsak ouk kiu-e.” Küta ngüne aikü tsakeikü khu.

9Tilai ngüne Goa nou apa tü ngiotsün athang nai shin, Abraha- müh asio amthang tsak shan naiuso pai nou nung chiai taiu. Apaüh apa thso keshiküta asio amthang nai pai chiai letaiu. 10Nungaih apaüh apa thso loattao salaiu nou loksan. 11Nungaih Apaou hong nou aün ainou apatü jonkü ngiom, “Abraham, Abraham!”

Apaüh thalakü ngiom, “Hauh, ngo nungai noin.”

12Apaüh ngiom, “Melothso nou laloat loüh apa tü ti lachhi.” “Loto ngo ni Goa asuhatji naiuso angio angji ta ngeji, tiautenai ni athso thsosa nou ngühau kiuau tsümongchiokü tsüwan.”

13Abrahamüh lemkü thaplu, nungai onnemokthso tsak apa ongüh paikia kholoukü noikü ep, nungai apa khukü apa thso liko nung loküta ajahtsün chaithio thio. 14Abrahamüh nung athang nian “Apaou nou ouk kiuji” ta niankiu. Lonyi saokü khaiuniahoi nou “Apaou ün king nai apaüh ouk kiuji” ta ngioji.

15Apaou hong nou Abraham tü aün ainou müjam jon, 16“Ngo jü tengkhaiu nianko athalo tsak taiuji, Apaou nou ngioji, ngo ni phopkü ouk kiu-e, tiautenai ni athso tsaklu nou ngü hau kiuau tsümongchiokü tsüwanankü chhin. 17Ngo nihau maou nai kianthsüoli naiuso haiusai nai singtsoli athsaosithsoso ouk kiu-e. Athsaosithsosoüh ngüso ehoi shiolo-e. 18Mele apem nou ngo athsaosithsoso ouk kiutsünli ngüso lüko ouk kiuha ta ngü tü sange, nung chikü tiautenai ni jü athoiluttsün angio angkü chhin.” 19Abraham apa tsamkiso dongai laokü shin, küta Bersheba nai Abraham kihlukü khutsün nai ngüso aikü khu.

Nahor Thsaosithsoso

20Atao intso noikü phiai Abrahamüh Milka sübao Nahor nio noiküla, apaüh meshen dei Nahor hau methso hai petjei chetkium ta lula; 21ngüso: Uz thso yamchong, Buz apa nio, Aram po Kemuel, 22Keset, Hazo, Pildas, Jidlap, naiuso Betual, 23Rebeka po, nungso melothso petjei Milkaüh Nahor Abraham dei tü chetlut. 24Nahor ün tsamsigoh tsüyangkü taiutsün nyiuhai Reumaüh Teba, Gahan, Tahas, naiuso Maka chetlut.

ASIO THSAMLAI

©2005 Bible Society of India

More Info | Version Index