Search form

Apung 25

Abraham ün amao Thsaosithsoso

(1 Ateng Chhi 1:32-33)

1Abrahamüh tsammongnyiu amao tsak tsamsigoh yangshi, apa nian Ketura noiküla. 2Nung nyiuhai nou ta Zimran, Jokshan, Medan, Midian, Isbak naiuso Shua chetlut. 3Jokshan tü Sheba si Dedan ne chetlut, naiuso Dedan thsaosithsoso -Ashurim, Letushim, naiuso Leunim noiküla. 4Midian thsoso: Efa, Efer, Hanok, Abida naiuso Elda noiküla. Nungso apem Ketura thsaosithsoso noiküla.

5Abrahamüh meshenüh taiutsün alum Isak hau kiuwan, 6Abraham apa aa noi taoko apaüh amao tsammongnyiu nou chetlut kiutsün thsoso hao lüko paopei kiuwan, küta apaüh nungso apa thso Isak ainou pungekü ajepek goumchi nai hongan.

Abraham Ean küta Khananji

7-8Abraham aakihlaiu pon 175 sonkü kihküta ean. 9Apa Isak naiuso Ismael neüh Het hai nou Zoar thso Efron goh tuhlo taiu nou Mamre tsamei tü ajepek nai noitsün goh Makpela Lungken nai khanan. 10Nung goh nou Abrahamüh Het haiko tuh, küta apa naiuso apa tsammongnyiu Sara ne nemtso nungko khanan. 11Abraham ean kü phiai, Goa nou Isak “Aa noitsün tsak ün temkhao sauüh ngo epji” ta jonji nungh athang shimkü kihküta apa ouk kiu.

Ismael ün Thsaosithsoso

(1 Ateng Chhi 1:28-31)

12Ismael, nung Sara ün Ijip hai nou tsamki Hagar tsangkü Abraham tü chetlut: 13Apa thsoso nungti noiküla: Nabaiot, Kedar, Adbil, Mibsam, 14Misma, Duma, Masa, 15Hadad, Tema, Jetur, Nafis, naiuso Kedema. 16Ngüso kau chekü nime paosiposo noin, naiuso ngüso nian, ngüso nok nian, theau kiuwan, naiuso athang athang nai ngüso kihkeitsün hau kiuwan. 17Ismael ean taoko apa pon 137 noiküla. 18Ismael tü chetsinyimtsünso Havila si Shur goh jetko Asiria nai khutsün yamko, Ijip tü ajepek nai shinkü goumchi tsak ko kih. Ngüso Abraham thsaosithsoso amao hai ainou pungekü khu.

Esau naiuso Yakob Chettsün

19Abraham thso Isak ngiolat nungti: 20Isak achetpon 40 ngoi nai apaüh Laban nio (Mesopotamia ainou Aramea hai) Bethuel ün menyiuthso Rebeka tsamsigoh yang. 21Rebekaüh methso tsüchetphe, Isaküh apa thaiutha Apaou tü misao sao. Apaou nou apa misao thala, küta Rebeka pem tsükengkü iula. 22Apaüh thsoib chettao noiküla, ngüso mochetkün khako ngüso apa methso noithang nai tsaküh tsak thako li-ekü noiküla. Apaüh ngiom, “Tiau tso tsakli ngü tü nungti thawaoji?” Nungtiphe apa Apaou tü amongtsam epao thaiutha asanglo khu.

23Apaou nou apa tü ngiom,

“Athai mongai mele nime noin;

Ni khaiunia nime haisat noi-ekü chetkiu-e;

Tsak nou amao tsak nouko oukongtso noi-e;

Nioyamchong nou niophi yathsüo-e.”

24Apaüh methso chettao thaiutha atao saokü shin, naiuso apaüh melothso thsoib chetkiu. 25Nioyam- chong nou shisileng aseng, naiuso apa khun chongmai nou tsamjeikü noiküla, nungtiphe apa nian Esau ta jon. 26Niophi nou chet taoko Esau nioyamchong nou ta chan nai thatü mongkü helutkü noiküla, nungtiphe apa nian Yakob ta jon. Tilai ngüso chetlut, Isak achetpon 60 noiküla.

Esauüh apa Tengkam Jananji

27Nung methso nou sungjikan, naiuso Esau uokop montsün poteng iula, apa kengchi ai kihtsün aakih tsüojintsün khaiunia noiküla, lüko Yakob to sangthiokü tsamai noitsün khaiunia tsak noiküla. 28Isaküh Esau tsüojin, tiautenai apa Esauüh loattsün thainian nyih heao mongleng, lüko Rebekaüh Yakob tsüojin.

29Nyitso Yakobüh lapon khiamlam lamkü noiküla, Esau uokop iu ainou yanap. Apa naiukü noiküla, 30küta Yakob tü ngiom, “Ngo naiuji; ngü hao nung lapon aseng nou eheao intso akiu.” (Nung thaiutha ko apa tü Edom ta jon.)

31Yakobüh thalakü ngiom, “Ni nioyamchong tengkam nou ngü hao akiu naito, ngo nung nihao kiu-e.”

32Esauüh ngiom, “Mei! Ngo eanao li noin; jü tengkamüh jü thaiutha ti amei chhi-e?”

33Yakobüh thalakü ngiom, “Ni atengkam ngü hao kiu-e ta ayating ngiomong shinge tsak lüshan.”

Esauüh ngiomong shinge nou shan küta apa tengkam Yakob hau kiuwan. 34Nungaih Yakobüh apa hau themtsai ajantso naiuso khiamlam intso shen. Apaüh heshiu küta tsaloukü nung ainou khuwan. Nungli Esauüh apa nioyamchong tengkam tsüwesankü noiküla.

ASIO THSAMLAI

©2005 Bible Society of India

More Info | Version Index