Search form

Apung 27

Isaküh Yakob ouk Kiuji

1Loto Isak sonkü iula, küta apa niovei nou tsüepshi, Apaüh apa thso yamchong Esau jonkü ngiom, “Jü thso!” Esauüh “Hauh,” ta thala.

2Isaküh ngiom, “Ngo sonaniu, ni epji naiuso shakta eanao shiom. 3A uokop pai naiuso chon nouso lokü liu ai lükhu, küta Uo tsak akopkan. 4Ngo mongchiotsün eheshiu samsinyakü theng küta nung jüdongai kankü ashi. Ngo nung hekütün phiai, ngo moeankün khako athonting ouk nou ni hau kiu-e.”

5Tilai Isak, Esau ko chite, Rebekaüh anglukü noiküla. Nungtiphe tilai Esau liuhom iuwan, 6Rebekaüh Yakob tü ngiom, “Apo Isaküh Esau tü ngiotsün ngo loting lula-iu. 7‘Uo tsak kankü yaküta ngü hao atheng kiu, ngo nung hekütün phiai ngo moeankü nai Apaou khako ni hau ouk nou kiu-e.’” 8Jüthso, lo, “ngo ti ngioji nung ngio nou lüchhi. 9Onnemok hoi ongai lükhu, küta won athso nime a oun meithso nou kankü ashi, nungtiphe ngo nung apoüh thatü mongchiotsün thengkü eheshiu ajantso shane. 10Ni nung apa dongai kankü khukü he-iau shio-e, naiuso apaüh apa ouk apa moeankün khako ni hau kiu-e.”

11Lüko Yakobüh apa nyiu tü ngiom, “Esau nung chongmai samtsün khaiunia tsak noin ta ni ngeji, lüko jükhun to meekü noin, 12tsüngean, jüpoüh ngü tü thantan nai ngo apa tü kausaiji ta ngela-e, nung yamko ouk tsak liko athesan bao meshen thako kanjikane.”

13Apa nyiuüh thalakü ngiom, “Jü thso, ti athesan akhako shi-e nung ngü da lünoi, ngo ngiotsünlu lüchhi, khuküta won thso nou ngü hao kankü ashi.” 14Nungtiphe apa nung won thaloau khu küta apa dongai kankü shi, apaüh nung po nou mongchiotsünli thengsan. 15Nungaih Rebekaüh Esau neshe amei nou lou küta Yakob hau thokiu. 16Rebekaüh Yakob tü wonkhun nou phemtso nai si chongmai pun tsüpokü noitsün sang nai patlutkiu. 17Apaüh samkü thengsantsün Yakob hau themtsai nou ko hakü pha nai semlo-i.

18Nungai Yakob apa po dongai khuküta ngiom, “Po!”

“Hauh,” ta Isaküh thalakü ngiom, “Jüthso ne ongko ni sübao?”

19Yakobüh thalakü ngiom, “Ngo nioyamchong nou athso Esau; ni ngiotsünli ngo chhi-iu. Tsüojin- yangkü chukü anoi küta ngo ni hau kankü shitsün nyih intso lühe, küta ni ngü tü ni nou ouk kiuau shio-e.”

20Isaküh ngiom, “Jü thso, ni titi thekü shakta eplo?”

Yakobüh thalakü ngiom, “Apaou a Goaüh nung epao ngü hachukü noiküla.”

21Isaküh Yakob tü ngiom, “Tsüojinyangkü shimkü ashi, küta ngo ni ta thantanao shio-e. Ni atsüoting Esau so?” 22Yakob apa po dongai tekkü shimkü shin, naiuso thantan küta ngiom, “Asang-i to Yakob sang-ili, lüko aphaso to Esau phasihokso li.” 23Apaüh Yakob tsütsangshei, tiautenai apa phemtsoso to Esau phem li noiküla. Apaüh Yakob hau ouk mowelutkün khako, 24loüh müjam tsangsheikü ngiom, “Ni atsüoting Esau so?”

Nungaih apaüh “Ngo noin,” ta thala.

25Isaküh ngiom, “Nyih ajantso ngü hao kankü ashi. Ngo nung hekütün phiai, ni hao ouk nou kiu-e.” Yakobüh apa dongai nyih kankü shin, apaüh loüh ashiuau theng lüko kankü shin. 26Nungaih apa poüh apa tü ngiom, “Shimkü shiküta ngü tü achep, jü thso.” 27Yakobüh apa po tü chep ao sungnai, Isaküh Esau neshe nyam ngesan, nungtiphe apaüh Yakob hau ouk nou kiuwan. Apaüh ngiom, “Jü thso angannyam pothakü nyamtsün Apaou nou ouk kiutsün eiu tsak nyam khekkü noin. 28Goa nou nihau aün ainou khiamle nou lükiu küta agoh tsüomeikü lünoi! Apaüh nihau chihsikhiam theng, saiukü lükiu! 29Mele nouso atsamki ao lüthe, küta khaiuniahoi nou akhako kauthiokü lüthe-i. Atsam- mongso apem khako ni nokshing lüshing, naiuso anio thsaosithsosoüh akhako kaukü lünap. Sauhaiüh ni hau athesan kiu-e, ngüso athesan lünoi-i, naiuso sauhaiüh ni ouk kiu-e, ngüso ouk lünoi-i.”

Esauüh Isak ainou Ouk Kojaji

30Isaküh apa ouk kiutsün khem, küta Yakob khuwanphi tengko apa dei Esau liuhom ainou yasaom. 31Apaüh lüko eheshiu samkü thengsan küta apa po dongai kankü khu. Apaüh ngiom, “Atsüojin Po, achu küta ngo nihau kankü shitsün eheshiu lühe, küta ngü hao ni nou ouk akiu.”

32“Ni sau?” ta Isaküh sang.

“Athso nioyamchong nou Esau ta apaüh thala.”

33Isak ngaongaokü khaiu mounkü ta, apaüh sang, “Naito, thainian loatküta jü dongai kankü shitsün nung sau noiküla? Ni shitsün khatengko ngo nung heaniu. Ngü nou apa hao athonteng ouk nou kiuwaniu, naiuso loto nung apa ün athon tsüyangkü noi-e.”

34Tilai Esauüh nung lula, apa sang thsüokü mongkiakü ngiom, “Po, ngü hao lüko ni nou ouk akiuha.” 35Isaküh thalakü ngiom, “Anio shiküta ngo sapthio-iu. Apaüh ni nou ouk kankü khuwaniu.”

36Esauüh ngiom, “Tiautenai atao müjam apaüh ngo sapthio-iu. Apa nian Yakob ta thakü tsünian süne? Apaüh ngü nou thso yamchong tengkam lüko aplowan, naiuso loüh apaüh ngü nou ouk kankü khuwaniu. Jü thaiutha ni ouk tsak lüko poikü tsünoi süne?”

37Isaküh thalakü ngiom, “Ngo apa akhako Apaou the-iao shanluttaniu, naiuso atsammongso chikü apa yathsüoau shanluttaniu. Ngo apahau chihsikhiam naiuso theng kiuwaniu. Loto ngo athaiutha ti chhi chhiau tsüpoi taiushi, jü thso!”

38Esauüh apa po tü thsüokü koja: “Po, ni nou ouk tsak linlin taim süne? Ngü lüko ouk kiu Po!” Nungaih Apa shapao yachu.

39Nungaih Isaküh apa tü ngiom,

“Aün ainou khiamle athaiutha tsünoi,

Athaiutha gohtsa haoson tsünoi.

40Ni asah üh aa nou kih-e,

lüko anio yathsüokü noi-e,

naiuso ni tilai khengshi-e,

Ni apa ngiokhem ainou shikhuwan-e.”

41Esauüh Yakob chinyan, tiautenai apa poüh ouk nou Yakob hau kiuwan. Apaüh yang, “Jü po eanao atao nou shimkü shiji; nungaih ngo Yakob loatte.”

42Lüko tilai Rebekaüh Esauüh yangtaiutsün lula, apaüh Yakob dongai hongküta ngiom, “Anglu, adei Esauüh ni ko phete küta loattao yangji. 43Loto, jüthso, ngo ti ngioji nung lüchhi. Lo shaktalu Haran nai jüdei Laban dongai lükhuwan. 44Küta apako adei mongmat mosaiukün lektso 45naiuso ni apa tü ti in chhin nung mopeankün lektso atao intso thaiutha lünoikei. Naiuso ngo ajantso hong küta ni nialokü shishi-e. Tiauta ngo nyitsokolu jüthso ne nemtso mowani-e?”

Isaküh Yakob Laban dongai Hongji

46Rebekaüh Isak tü ngiom, “Ngo Esau ün gohmao tsammongnyiu nousoüh thachüluwaniu naiuso akiali iula-iu. Yakobüh lüko nungso Het hai menyiuthso so ongko tsak lüko tsamsigoh yangnaito ngo ee tso eanela.”

ASIO THSAMLAI

©2005 Bible Society of India

More Info | Version Index