Search form

Apung 31

Yakob Laban ainou Khulükhunji

1Yakob sam po Labanüh thataiutsün alum kankü khuwaniu. Apaüh taiutsün jengtsaiu apem sam poüh ti taiuküla nung ainou shin ta Laban thsosoüh ngiotsün Yakobüh lula. 2Naiuso apaüh loüh Laban aya naili tsüdekü kha tsüwonkü ep. 3Nungaih Apaou nou Yakob tü ngiom, “Aposo naiuso atsammongso goumchi ai laokü lükhu. Ngo niko ha-e.”

4Nungtiphe Yakobüh Rachel si Lea ne dongai onnemokso noitsün tsamei nai apako aphete ta ngio hong. 5Apaüh ngüne tü ngiom, Ngo aje po jü khako nung thaiu naili haimei tsüdekü epsanji; lüko jü po ün Goa ngüko hakü noin. 6Aje nemtsoüh ngeji, Ngü jü oukong apem nou aje po thaiutha chhikium. 7Lüko apaüh ngü kausaiatkü naiuso ngü amai epao noitsün che jam li-ekiu. Lüko Goa nou apa hau ngütü angja tsükiu-i. 8Tilai Labanüh wonhoi nouso aleng haklutlutkü nouso naiuso tsangi tsangi kü nouso amephaiu mai noi-e ta ngiokü noiküla, nungai won nousoüh nung khekkü punsan. 9Goa nou aje po ainou wonhoi ouk kankü khuküta nungso ngü hao kiuwan.

10“Onnemok hoi apunyam akome taoko nai ngo mea tsak mean, naiuso ngo wonpong hoi alengsat, tükhak khakkü naiuso alengsat henkü potsünsoüh komkomkü epm. 11Goa hong nou ngü tü mea nai ngiom, ‘Yakob!’ ‘Hauh,’ ta ngü thalan, 12‘Athaplu’ ta Apaüh tsülaokü ngü tü ngiom, ‘Wonpong nouso chikü alengsat ehen, asong naiuso tükhak khakkü noin. Tiautenai Labanüh ni tü kausaikü kankeitsün shioko ngo nung shan. 13Ngo Goa, sau ni tü Bethel nai tsangsheikü sungh, tiai ni lung tsak Olip khiam nou tsomkiukü losio küta ayangshiao shantaiu kü ni ngüko ngiomong shinge nou shan. Lo, ni chettsün goumchi nai laokü khushiao lükhemlo.’”

14Rachel si Lea neüh Yakob tü thalakü ngiom, “Nungai sam po ainou samüh tengkamao titso tsüpoitaiu. 15Apaüh sam gohmao khaiuniahoi lilu kankeiji, apaüh sam jananiu, naiuso loüh sam thaiutha ko amai kiutsün tangka apem khemaniu. 16Nung jengtsaiu apem Goa nou sübao sam po ainou lowan nung sam naiuso sam thsoso ün noin. Goa nou ni tü tilüsong ngiom, nung lüchhi.”

17-18Nungtiphe Yakob Kanan goumchi ai apa po dongai laokü khushiau khemlo. Apaüh apa thsoso naiuso tsammongnyiu nouso ut hoi chiai moknoi-i, küta apa onnemokso apem apa khako komlo, naiuso apaüh Mesopotamia nai kih nai eptsünso alum hoilo. 19Laban apa onnemok hoi tü apun tippanao khu, naiuso apa tsünoitsün taoko Rachelüh tsam- khaiu nai amkhamtsün sotsom goa apa po ün kaolowan. 20Yakobüh Laban hao apa yawantsün tsüngeikü kausaiat. 21Apaüh meshenüh taiutsün alum loküta liuliukü nung athang leankü khuwan. Apa Eufrates haiu yankü khuküta king goumchi Gilead nai khuau tsalo.

Labanüh Yakob tü Komji

22Ajekhaiu samnyi phiai Laban hau Yakob khuwaniu ta chite. 23Apaüh meshen khaiuniaso nialoküta Yakob mothakün lektso king goumchi Gilead nai ajekhaiu chinyatnyi komkü khu. 24Nungsoh nai Goa nou Laban dongai mea mean nai shiküta ngiom, “Yakob ti yamko lünou tsülohattao lütsüolo.” 25Yakobüh apa nejenkhio king nai lahshan, naiuso Labanüh apa nejenkhio king goumchi Gilead nai apa kau nousoko hakü lahshan.

26Labanüh Yakob tü ngiom, “Ni tiau ngü kausaiat küta jüthsoso sua li kankü khuwan? 27Ni tiauta ngü kausaiatküta ngü hau tsüchitekü lailükhun? Ni ngü hau chite tünto, ngü ayam thathunkü amongling naiuso jih hangkü, kokiang khongkü, ni hongela. 28Ni ngü jü thsaosithsoso ko salamtso tsükiu-e-i naiuso meikü lükhu tatso tsüngio-i, nung mainga chhi tsak chhianiu. 29Ni tü pha poh au lüko jü oukong noin, lüko müso apo ün Goa nou ni tü lalohat ta ngü lotsüo. 30Ni tsamai laokü yashiau thatü mongchet nou shioko ta ngo ngeji, lüko jü tsamkhaiu sotsom goa ni tiauta kaulowan?”

31Yakobüh thalakü ngiom, “Ngo hatkü noiküla, tiautenai ni athsoso ngü ainou lowanshi-e ta ngü yang. 32Lüko ni nungai ajantso ko sotsom goa taiukü epsan nai, apa to loatkü wanaolu noin. Nung sam khaiunia khako mitha li, alum ta lüthap, küta ni ün epnai nung ni nou, ni lülo.” Yakobüh Laban ün sotsom goa nou Rachelüh kaulo ta tsüngekü noiküla.

33Laban khukü Yakob ün nejenkhio nai yam, küta apa Lea ün nejenkhio nai khu, naiuso sua menyiu nime nejenkhio nai yam, lüko apaüh apa tsamkhaiu sotsom goa tsüepsan. Nungthan ko apa Rachel ün nejenkhio nai nap. 34Rachelüh nung tsamkhaiu sotsom goa nou lokü ut tü phanluttsün nekong mong nai taiuküta apa nung chiai moknoi. Labanüh nejenkhio apem yampekkü yam, lüko nung tsüepsan. 35Rachelüh apa po tü ngiom, “Ngü tü lamongmat, Apaou, ngo akhako atsaao tsüshiokü noin; Ngo alei pungkü achinyan khutsün atao noin” Labanüh yam lüko apa tsamkhaiu sotsom goa nou tsüepsan.

36Nungaih Yakob mongmatkü iula, “Ngo ti lothekü noin?” apaüh mongmatkü sangh, “Ni ngü tü mongchiokü yamkeiao lümeikü ngo ti ngiokhem lothekü noin?” 37Lo, ni jü jengtsaiu ngü taiutsün apem yampekkiu, ti tsam jengtsaiu ni ün epsan? nungso kankü kengchiai shiküta akhaiunia si jü khaiuniasoüh nung eppe, nungko je sau thakü noin ngüsoüh epsane. 38Ngo lonyi saokü niko pon khei noikü shiji, a-onnemok naiuso awonsoüh athso pon tilaitso tsüphio, naiuso ngo a-onnemok hoi ong ainou onnemokthso tsaktso tsühean. 39Tilai onnemok tsak liu thainian nou loattane, asapat nou ngo asaita thekiukü shin, adongai nung jü aphio noiküla ta lüko jamtso kankü tsüshi. Anyi naiuso asoh kauwantsün ainou ngo alesan shanji ta ni ngü tü saokü noiküla. 40Atao piaküjam ngo anyi alam nouko naiuso asoh athsong nouko asaiao tsüshiokü noiküla. 41Ngo niko pon khei thumkü noihatsün nung khekkü noiküla, nungti lüko ni jü mephaiu mai chejam li-ekium. 42Jüposo: Abraham Goa, Isak Goa, ngüko tsüha tünto, nito ngü phakeng hongan shiau noiküla, Lüko Goa nou ngü angjatsün naiuso, ngo chhikü shitsün ep küta, müso Apaüh ni tü thut.

Yakob si Laban ne jetko Athalu-e.

43Labanüh Yakob tü thalakü ngiom, “Nungso menyiuthso nouso jü thsoso noin, naiuso nung onnemok nouso ngü nou noin. Atsüoting naito, ni nungko eptsün alum ngü nou noin. Lüko jü thsoso si ngüso thsoso taiukü ngü ti chhisanau tsünoi, 44ngü niko athalu-e tsak taiuau khemkü noin. Samüh sam jetko athalu-e taiutsün yangsanau lungphansan tsak shanko.”

45Nungtiphe Yakobüh lung tsak loküta tsüpeanau kikü taiu. 46Apaüh apa khaiuniaso tü lung kamshiküta sankü ataiu ta ngiom. 47Labanüh nung tü JEGAR SAHADUTHA ta jon, lüko Yakobüh nungtü GALEED ta jon. Nungaih ngüso nung lungphansan dongko thaisam tao tsak noi. 48Labanüh Yakob tü ngiom, “Nung lungphansan nou je nemtso thaiutha ayangshiau tsak noi-e.” Nung shioko nung athang nian nou GALEED ta nian. 49Labanüh ngiom, “Apaou nou sam tsak si tsak ainou pungekü noi taoko jimkü anoi.” 50Labanüh tsülaokü ngioshiji, “Ni jü thsoso meikü tsükankei kü, naiuso menyiu amao tsamsigoh yangshinai, nungti lüko ngü nung thaiutha tsüngeha, Goa nou samtü jiokü noin ta lüyangsan. 51Nung lung nouso ngü je jetko sansaniu, naiuso nungai tsüpeanau lung tsak taium. 52Nung lungphansan naiuso lung nemtso ayangsanao ii noi-e. Ngo nung lungphansan yantaiukü ni komanao tilaitso tsükhu-e, naiuso ni lüko nung yantaiukü tilaitso lashi. 53Abraham Goa naiuso Nahor Goaüh sam jetko thaisane.” Nungaih apa po Isaküh amtsün Goa nianko, Yakobüh nung athalu-e mongkü taiuao ngiomong shinge tsak shan. 54Apaüh thainian tsak king nai aloat chaithio kiu, naiuso apa khaiuniaso thaisam nai jonshin. Ngüsoüh heshiukütün phiai nungsoh ngüso asoh chikü king nai noian. 55Nungthan nyap ahom beta Labanüh apa thsaosithsoso tü son nai chep küta ouk kiukü punge.

ASIO THSAMLAI

©2005 Bible Society of India

More Info | Version Index