Search form

Apung 43

Yosep Deiso Ijip ai Benjamin hakü Laokü Shiji

1Kanan nai naiusile thsüokü iula, 2naiuso Yakob tsammongsoüh Ijip ainou kankü shitsün khülam apem nekheman, Yakobüh apa thsoso tü ngiom, “Loüh khukü sam thaiutha khülam intso lütuh-iu.”

3Yihudaüh apa tü ngiom, “Sam ko sam nio tsühakü naito sam apa khako shiau tsüshio-e ta nung khaiunia nou sam tü kongkü lohatkü ngiom. 4Ni sam nio samko hongau mongchio naito, sam khuküta athaiutha khülam tuh-e. 5Ni tsümongchio künaito, sam tsükhu-e, tiautenai sam ko sam nio tsühakü naito sam apa khako shiau tsüshio-e ta nung khaiunia nou sam tü kongkü lohatkü ngiom.”

6Yakobüh ngiom, “sam nio loüh noishin ta chitetsün tsangkü asamüh ngo angja nai napiji.”

7Ngüsoüh thalakü ngiom, Nung khaiunia nou sam thaiutha naiuso sam tsamkhaiu thaiutha nungti sanglutkü noi, “Asam po lo saokü aa noin süne? Asam nio amao noishimo? Samüh apaüh sangtsünso tü thalaaolu noiküla. Apaüh sam nio samko nialokü ashi ta apaüh ngioau samüh titi thekü nge-e?”

8Yihudaüh apa po tü ngiom, “Melothso nou sam ko ahong, küta sam jamaolu tsalokü khu-e. Nungaih sam saulünou naiusile nou tsü eane. 9Ngo jü aa nou thalu-e, naiuso asamüh apa thaiutha thsale ngü tü ataiu. Ngo apa adongai aa naiuso ameili müjam laokü tsüniajikan künaito, ngo asaita nianlochi nou kane. 10Samüh nungti tsütaiu-enoi tünto, sam losaokü nouko nungai khuküta müjam laoshikü noi-ela.”

11Ngüso poüh ngüso tü ngiom, “Nung thaiutha nungti noin tünaito, sam goumchi ainou sungtsün ameiting nou asam nekongai loküta nokshingpaou hau paopei tsak lükan: painek intso, liu khiam intso, laoshang naiuso pistachio uo intso, naiuso chuom intso, ta lükan. 12Asam ko tangka phopkü lükan, tiautenai asam nekong mongko kankü yashitsün tangka laokü kanshiau noin. Tsüngean, nung aphio noikütso tha-e. 13Asam nio lünialo küta jamaolu alaoshi. 14Akongting Goa nou nung khaiunia hau asam chiai atsüojinyang noi-ikü athe, nungaito apaüh Benjamin naiuso asam dei amao nou asam hau laokü kiushi-e. Naiuso ngo thso tsünoikü iula-inai, lo to thsoso tsünoika ta noiko.”

15Nungtiphe deisiniosoüh paopei nou lokü naiuso tangka nou phopkü loküta Ijip nai Benjamin hakü khuau tsalo. Nungai ngüsoüh ngüso pem Yosep khako han. 16Tilai Yosepüh Benjamin ngüsoko hakü ep, apaüh apa tsam paotsangtsün tsamki ashe nou tü ngiom, “Nung khaiunia nouso jü tsamai lünialükhun. Ngüso anyiwem tao thaisam ngüko noi-e, nungtiphe thainian nou loat küta nung lükhemsan.” 17Tsamki nou apa tü thoiluttsünli chhikiu küta deisinioso Yosep tsamai nialokü khu.

18Ngüso tsamai nialokü shitaoko, ngüso hatkü yanghekü noiküla. “Sam nungai kankü shitsün tiautenai tangka nou ayateng taoko laokü yatsün shioko noin. Ngüsoüh alekta sam tü pohküta, sam ün gado nouso lowane, küta sam apa sua ao shane.” 19Nungtiphe ngüso koukhan dongko nai, ngüsoüh tsamki ahei nou tü ngiom, 20“Ni tsüojinyang naito, Apaou, sam nungai nung khako khülam tuh ao shin. 21Tilai samüh tsamai yatsün tao yamko nejenkhio lahsankü noiküla, samüh sam nekong sokpek, naiuso khaiunia pungkü nou momo tangka momo nekong mongko epsan-tsaktsüo tsüsaankü noiküla. 22Samüh loüh tangka intso piakü samko khülam tuh shiao kankü noin. Sauüh sam tangka sam nekong nai thiokiu samüh tsünge.”

23Tsamki nou ngiom, “Hatkü layangelat. A Goa, asam po ün Goa, nou asam thaiutha sam nekong ai tangka nou thiokü noi-e. Ngo asam chai epiu.” Nungai apaüh Simeon ngüso dongai niakü shin.

24Tsamki nou deisinioso nialokü tsamai shi; apaüh ngüso hau hok tsawanau khiam kiu, küta ngüso gado hau waoshen. 25Yosep anyiwem ngüso dongai shinai kiuau ngüsoüh paopei nouso khemlokü taiu, tiautenai ngüso tü apako aikü thaisam noi-e ta chitekü noiküla. 26Tilai Yosep tsamai shin, ngüsoüh paopei nouso apa tsamai kankü nap, küta ngüso apa khako goh ai kauthiokü noiküla. 27Apaüh ngüso pem thaiutha sangkü ta ngiom, “Asamüh ngü tü asam po suonankü noin thaiutha chite apa titi noin? Apa lo saokü aa naiuso meikü noin süne?”

28Ngüsoüh thalakü ngiom, “Atsamki, sam po, lo saokü aa naiuso meikü noin.” Naiuso ngüsoüh apa khako singkau nou goh tü thankü kauthio.

29Tilai Yosepüh apa nio Benjamin ep, apaüh ngiom, “Küta nung asam niophiteng, asamüh sau thaiutha ngü hau chiten, apa süne? Goa nou ni ouk kiu jüthso.” 30Nungaih Yosep alekta ngüso wankü khuwan, tiautenai apa mong apa nio thaiutha atsüojin nou meankü noiküla. Apa nungko atsüojin mong kiakü iula, nungtiphe apa meshen tsampai ai napkü sang songkü shap. 31Apaüh apa kha pengan kütün phiai, shishiküta meshen chija thatsam lokü, thaisamau alopeng ta ngiom. 32Yosep hau chihe puo amao tsak ko heau khemsan, naiuso apa deisinioso hau amao tsak ko heau khemsan. Ijip hai sauhai nungko heshiu hakü noiküla, ngüso mothikü paotsangkiu, tiautenai ngüsoüh Ibri haiko aikü heshiutsün to ngüso saisile khemai ta yang. 33Deisiniohoi nouso Yosep ta lalutkü chihhe puo nai noi-i. Tilai ngüsoüh ngüso titi noi in nung ep, ngüso tsaküh tsak ta thapekü ngawankü noiküla. 34Eheshiu nou ngüso hau Yosep puo ai yakü kiukü shin, naiuso Benjamin hau amao nouso tü pungo jam phopkü sonkiu. Nungtiphe ngüsoüh Yosep ko ngüso motokkün lektso heshiu.

ASIO THSAMLAI

©2005 Bible Society of India

More Info | Version Index