Search form

Apung 44

Thengkam Iantsün

1Yosepüh apa tsamki ahei nou tü thoilutkü ngiom, “Khaiunia nouso nekong ngüsoüh kanao shiotsün ko yangkü khülam nou meankü lüsaithio, küta khaiunia pungkü ün tangka ngüso nekong mongai lüthio. 2Jü tangkason thengkam niophiteng nekong mong nai apa khülam tuh ao kantsün tangka ko hoi-ekü lüthio.” Apaüh angiotsünli chhikü noiküla. 3Ahom beta deisinioso ngüso yamai hongan. 4Tilai ngüso noknio ainou laiukü jetekü mokhukü noi taoko, Yosepüh apa tsamki ahei nou tü ngiom, “Nung khaiuniahoi tü liukü lükom. Ni ngüso tilai tha iu-e, ngüso tü nungti lüsang, ‘tiauta asamüh amei liko tsümeikü kiushiji? 5Asamüh tiau jü Apaou ün tangkason thengkam kaulowan? Nung apaüh shiutsün thengkam tsak noin. Asamüh thatü thsüokü aphio sunlo-iu!’”

6Tilai tsamki nou ngüso tha-iu, apaüh nung ngio nouso ngioshin. 7Ngüsoüh apa tü thalakü ngiom, “Nungti chiteao lümeikü ni ti athat nai ngioji Apaou? Samüh nungtin chhi tsüchhi ta ngiomong shingkü ngioji. 8Tangka sübao sam nekongai epsan nung samüh Kanan goumchi ainou asam dongai kankü shin ta ni ngekü noin. Tiauta samüh atsampao ün tangkason naiuso chaiou lakkeng lüko kaulo-e? 9Apaou, sam ongko tsak nung taiukü epsan naito, apa to loatkü wane, naiuso sam apoi nouso atsamki au iula-e.”

10Apaüh ngiom, “Ngo mongchioji, lüko sauüh thengkam lowan nunglu jü sua iula-e, küta asam apoi nousoto ti tsüyangkü khuau shio-e.” 11Nungtiphe ngüsoüh shakshakta ngüso thsa goh ai kanyi, naiuso khaiunia pungkü nou momo thsa sopkü thap, 12Yosep ün tsamki nou thatü mongtsüokü yam, nioyamchong ai yalo nou niophiteng saokü yam, nungai thengkam nou Benjamin nekongai epsan. 13Deisiniosoüh amongsaiu nou ngüso ne chipek, ngüso gado nouso hau nekong kaniküta noknio nai laokü shin.

14Tilai Yihuda naiuso apa deiso Yosep tsamai shin, Yosep loüh nungko noiküla. Ngüsoüh apa khako kauthio, 15nungaih Yosepüh ngiom, “Asamüh ti chhin? Jü noithang nai noitsün khaiunia tsaküh ashiau nou aküo ngesantsün chhi tsangkü asam epsane ta asamüh tsünge süne?”

16Yihudaüh thalakü ngiom, “Samüh ni tü ti ngioau shio-e, Apaou?” “Sam titi shiowe-e? Samüh sam chija titi losang lou-e? Goa nou sam aphio sopankü hananiu. Loto sam apem asua, naiuso thengkam sau nekongai epsan nunglu tsüde.”

17Yosepüh ngiom, “Oh, nungti tsüde! Ngo nung laitso tsüchhi-e! Sau thsa ko jü thengkam noiküla apalu jü sua the-e. Asam apoi nouso to asam po dongai alokü naiuso meikü laokü yashiau shio-e.”

Yihudaüh Benjamin Thaiutha Kojaji

18Yihudaüh Yosep dongai sungküta ngiom, “Tsüojinyangkü, Apaou, ngo niko khakhakü chiteau ayam asopkiu. Ngü ko lamongmat, ni apim nung nokpao lu noin. 19Apaou, ni sam tü nungti sang, ‘Asam po tsüdekünai amao nio hamo?’ 20Samüh thalakü ngiom, ‘Sam po thatü sunankü noin, naiuso apa asun yamai chetluttsün niophiteng tsak noin. Nung melothso nou dei eaniu, naiuso losaokü aa noitsün apa nyiu thsoso apalu noin, apa poüh apa tü thatü tsüojinji.’ 21Apaou, ni sam tü apa nungai nialokü ashi ta ngiom, nungtiphe ni apa epao shiokü hau, 22naiuso samüh nung melothso nou apa po leanao tsüshio ta thalakü noiküla; apa shi naito, apa po eane. 23Nungaih ni, ‘Asam ko niophiteng nou tsüshi hakü naito, asam jü khako müjam epeau tsüshio-e ta ngiom.’

24“Tilai sam, sam po dongai laokü shin, ni sam tü ti ngiom, nung apa hau chiten. 25Nungaih apaüh sam tü laokü khukü khülam intso lütuh ta ngiom. 26Samüh thalakü ngiom, ‘Sam khuau tsüshio-e; Sam ko sam niophiteng tsühakün lektso to sam apa khako shiao tsüshio-e ta nung khaiunia nou ngiom. Sam niophiteng sam ko khuha nailu sam khuau shio-e.’ 27Sam poüh sam tü ngiom, ‘Jü tsammongnyiu Rachelüh melothso nimelu chetkiu ta asamüh ngeji. 28Ngüne ongko tsaküh to ngo leankü khuwaniu. Apa to liu thainian nou nelangkü chipek heaniu sao, tiautenai ngo apa khuwantsün ko yanou jamtso apa tsüep. 29Asamüh nung tsak nou lüko nialoküta apa tü tso tsak thawao naito, amongsaiu asamüh losantsün nou ngo loatte, ngo nungti sunankü noin.’

30-31“Yihudaüh tsülaokü chite, Küta lo, APAOU,” “ngo jü po dongai nung melothso nou tsühakü shishi naito, apaüh ngü methso nou tsühakü eptsün kolu, apa eane. Sam po aa noitsün nung methso nou da niolutkü noin, naiuso apa thatü sunanphe, samüh amongsaiu kiutsün nou apa loattane. 32Loüh ti noishin, ngo jü po ko nung melothso thaiutha ngiomong shingekü noin, ngo apa dongai nung methso nou laokü nialokü tsüshi künaito, ngo jü aakihlaiu chikü nianlochi nou kane. 33Küta lo, Apaou, nung methso nou apa deiso ko laokü akhu-i, naiuso nung methso nou thangko asua ao ngo nungko noi-e. 34Nung melothso nou ngüko hakü jü po dongai laokü tsükhu künaito ngo titi the-e? Ngo jü po khako aküothe shi nou ta thapau tsüsome.”

ASIO THSAMLAI

©2005 Bible Society of India

More Info | Version Index