Search form

Apung 50

1Yosep apa po dongai shimkü shikü shap, naiuso khakheng nai son nou chep. 2Nungaih Yosepüh apa po mea tsüchoiankü hau apaotsangau ngiokhem kiu. 3Nung choiankü tsükhukü hau apao- tsangtsün asaita ajekhaiu aopülenyi thethekü noiküla. Ijip haiüh apa thaiutha meathio anuo ajekhaiu aochinyatnyi nuokü noiküla.

4Tilai meathio anuo tao yanlükhun, Yosepüh nokpao khemko asonghoi tü ngiom, “Tsüojinyangkü nung ngio nokpao dongai kankü akhukiu: 5‘Tilai jüpo eanau atao shimkü noiküla, apaüh khemtaiu- tsün Kanan goumchi nai etam nouko apa mea akamtaiu ta ngiomong shinge tsak shankü noiküla. Nung- tiphe tsüojinyangkü jüpo khananao ngo akhu-i, küta ngo laokü shishi-e.’”

6Nokpao nou thalakü ngiom, “Ni chhi-e ta thalokü taiutsünli khuküta apo lükhanan.”

7Nungtiphe Yosep apa po khananao khu. Nokpao khemko asonghoi apem, apa mikhem noikham nai noitsün ashe hoi, naiuso Ijip nai aniakei khaiuniahoi chikü Yosep ko khuha. 8Apa tsammongso, apa deiso, naiuso apa po tsammong apem apako khuha. Goshen khiamkhan naito ngüso methso ehen hoi, onnemok hoi, won hoi, naiuso janghoi lu taiukü apem khu. 9Ehli tsamkei nai keitsün khaiuniahoi, mokthso chiai keitsün khaiunia hoi, nouso lüko apako khuha; nungko hoi asongting tsak noiküla.

10Tilai ngüso Yordan ajepekki nai noitsün Atad ko thamthaotsün athang tsak ko shisaom, ngüso atao laiukü sang songkü shikü mongsaiu, küta Yosepüh amongsaiu amkham kiukü nungko ajekhaiu chinyatnyi shaman. 11Tilai Kanan paopunghoi nou khaiunia nouso Atad nai mongsaiutsün ep, küta ngüsoüh ngiom, “Ijip haiüh amongsaiu amkham nungti mongkü titi chhiji!” Nung shioko nung athang nou tü Abel Mizraim ta jon.

12Nungtiphe Yakob thsosoüh ngüso tü thoiluttsünli chhin; 13Ngüsoüh apa mea Kanan nai kankü khuküta Het hai nou Efron goh Abrahamüh etam gohthang au thaiutha tuhtaiutsün Mamre tsamei tü ajepek ai noitsün Makpela nai Lungken nouko khanan. 14Yosepüh apa po khanan kütün phiai apa deiso naiuso apa po khananao sauhai apako khuha ngüso apem hakü Ijip nai laokü yashi. Yosepüh apa Deiso mong Losongshiji 15Ngüso po ean küta phiai, Yosep deisiniosoüh ngiom, “Samüh apa tü tsümeikü chhikü noitsün thaiutha Yosepüh sam tü thamshiau ayang noinai naiuso tsülaokü chinyan nai titi the-e?” 16Nungtiphe ngüsoüh Yosep dongai ngio tsak hong: “Sam po mo eankün khako apaüh ni tü nungti lüsang ta sam tü ngiom, 17‘Tsüojinyangkü adeisiniosoüh ni tü aphio atso chhitaiutsün awankiu.’ Lo tsüojinyangko apo Goa yathsüo- tsünsoüh ni tü chhi taiutsün, awankiu.” Tilai nung ngiopung ep, Yosep shap. 18Nungaih apa deisinioso chija shikü apa khako kauthiokü ngüsoüh ngiom, “Sam atsamkiso akhako nungai noin.” 19Lüko Yosepüh ngüso tü ngiom, “Lahat, ngo jüpem Goa thangko taiuau tsüshio. 20Asamüh jü thako tsümeikü mongthat thatsan, lüko Goa nou ti thawao-ikü shikü noiküla nung shioko lonyi khaiunia piakü aa nou noin nung kipsanau thaiutha noiküla. 21Asam ti ahatao tsünoi. Ngo asam naiuso asam thsoso paotsange.” Nungti apaüh ngüso mongtü thankü atsüojin ngio nou ngüso mongtsamikü lomongsong kiushi. Yosep Ean 22Yosep Ijip nai apa po tsammongsoko aikü tsülaokü kih. Apa eantsün taoko achetpon 110 noiküla. 23Apa Efraim thsoso naiuso thsaoso lüko epkü aakihlaiukü kih. 24Apaüh apa deisinioso tü ngiom, “Ngo eanau atao saokü noin, lüko Goa nou Abraham tü, Isak tü, naiuso Yakob tü, mongkü thalotaiutsün goumchi nai nung goumchi ainou khukü sam yam nia-e naiuso paotsang-e.” 25Nungphiai Yosepüh apa khaiuniaso tü ngiomong shinge tsak shanau sanghkü ngiom, “Ngü tü Athalou,” “Tilai Goa nou asam nung athalotsün goumchi nai nialokü khu-e, asamüh jü mea asamko kankü khuau noin.” 26Nungti Yosep achetpon 110 kihkü Ijip nai ean. Ngüsoüh apa mea tü khaiutsom tsomlutkü paotsangküta mea paidan nai lokthio.

ASIO THSAMLAI

©2005 Bible Society of India

More Info | Version Index