Search form

Levi 10

Nadab si Abihu ne Angei

1Aron thso Nadab si Abihu neüh ngüne pungkü inkaiujek chai loküta nungko inkaiu jekthio, angannyamtsün kamlut küta Apaou khako taiukiu. Lüko nung in nou tsüsio, tiautenai Apaou nou ngüso tü nung thioau tsüthoilut. 2Alekta Apaou nou in hongkü Apa khako ngüne thaatkü jekkatan. 3Nungaih Mosaüh Aron tü ngiom, “Apaou nou apaüh ngiotsün taoko nung thaiutha chitekü noiküla, ‘Ngo yathsüotsünso chikü jü asio asuhat kiuau noin; ngü jü ajinka jükhaiuniaso hau hanne.’” Lüko Aron ngio tsüsingiokü noian.

4Mosaüh Aron po ehen nou Uzziel thso Mishael si Elzafan netü jonkü ngiom, “Nungai ashi küta asam po ashe nou thsone mea nung asio Nejenkhio ainou kankü khukü asaothang pechiai lüwan.” 5Nungtiphe ngüne shikü, Mosaüh thoiluttsünli mea lopoktaiutsün ne nou tü thaloküta asaothang pechiai kankü khu.

6Nungaih Mosaüh Aron naiuso apa thso Eleazar si Ithamar netü ngiom, “Asam amongsaiu noin ta hanau asam khaiu tsühethekü lawan naiuso asam ne chipekkü lanoi, asamüh nung chhi naito asam eane; naiuso Apaou nou hoikam athum nou tü mongmate. Lüko asam paiusihaiso Israelhai chikü to Apaou nou hongtsün in nou ee thawaophe mongsaiu au ayam thakü noin. 7Nejenkhio nai naptsün athang lale-an, lean naito asam eane, tiautenai asam Apaou ün atsomkiutsün khaiutsom nou losiokü taim.” Nungtiphe ngüsoüh Mosaüh ngiotsünli chhin.

Mesonhoi Thaiutha Ngiokhem

8Apaou nou Aron tü ngiom, 9“Theng tsüdekünai phopkhiam shiukütün phiai ni naiuso athsoso Ngü noitsün Nejenkhio mongai tsünape; napnaito, asam eane. Nung athsaosithsoso chikü nou kankeiau ngiokhem noin. 10Ni Goa ün kotha nou ti in, naiuso athatha kankeiau nou ti nungne jetko janthat au noin, naiuso amsikham nai ayanthsüo si tsüyanthsüo nungne jetko ajanthat noiau noin. 11Ngü Mosa tsangkü asam hau kiutsün ngiokhem nouso apem Israelhai hau tsandeau noin.”

12Mosaüh Aron naiuso apa thso apoi nou Eleazar si Ithamar sotü ngiom, “Chih chaithio Apaou hau kiutsün ainou apoiantsün lülo; küta nungh phoplao tsüthiokün themtsai lüshan, naiuso nungh amthang phiai lühe, tiautenai nung chaithio to thatü asio noin. 13Nung asiothang tsak ko lühe, nungh Apaou hau kiutsün chih ainou ni naiuso athsoso ün haoson noin. Nung Apaou nou ngü tü thoilutkü noin. 14Lüko ni naiuso atsamkhaiuüh anyaolak naiuso ashiophi sübao amothi paopei naiuso amothi chaishi mesonhoi thaiuthako Apaou hau kium nung heau shio-e. Ni nung amsikham asiothang tikolünou heau shio-e. Nung chaithio nouso ni naiuso athsoso hau asam kotha haoson Israel khaiunia ün nokmei chaithio kiuwankü noin. 15Apaou hau ii-iu nou chih chaithio thaiutha kiutsün taoko ngüsoüh ashiolakphi nou naiuso anyaolak nou kankü shi-e. Apaou nou thoiluttsünli nung haoson nouso ni naiuso athsoso kotha nou asaita hau noi-e.”

16Mosaüh angei chaithio kiuau noitsün won thaiutha sangnai nung ja-ankü noiküla ta ngela. Nungüh apa Eleazar si Ithamar neko mongmat-ikü apaüh sangkü ngiom, 17“Tiauta asamüh nung angei chaithio nou asiothang tsak nai tsühe? Nung thatü asio noin, naiuso Apaou nou nung hoikam angei kankü khuwanau thaiuthako asam hau kiukü noiküla. 18Nungh she asio Nejenkhio nai kankü tsünapphe, ngü thoiluttsünli asamüh aloat chaithio nou nungko heanau noiküla.”

19Aronüh thalakü ngiom, “Ngü lonyi nung angei chaithio nou hean naito, Apaou khako nung thakü noi-e süne? Lonyi khaiuniahoi nousoüh Apaou dongai ngüso angei chaithio kankü shiji, lüko losaokü nung athsüoting ahat nou ngü da thawaokü noin.” 20Tilai Mosaüh nung lula, apa mongtsamkü noiküla.

ASIO THSAMLAI

©2005 Bible Society of India

More Info | Version Index