Search form

Levi 16

Atuhsantsün Ajekhaiu

1Aron thso nime neüh tilai Apaou hau tsüsiokün chaithio kiu, ngüne loatkü wan, nungphiai Apaou nou Mosa ko chitekü 2apatü ngiom, “Adei Aron tü Thatü AsioThang nai napau akhongjeitsün ne phiai khuau atao waokü nailu lüthe ta lüngio, tiautenai nung Athalue Ngiokhem Paidan Kap chinai thengmiakhao nouko Ngü atsangshei sungh. Apaüh nung angio tsü-ang naito, apa loatkü wane. 3Apaüh angei chaithio thaiutha jangtsopong tsak naiuso ajah chaithio thaiutha onnemokpong tsak ta kankü shikütün phiailu apa Thatü AsioThang nai napau shio-e.”

4Küta Apaou nou nung ayamhan nouso kiu: Aron Thatü AsioThang nai mokhukün khako apaüh khiam pengküta meson sheitho nouso ashethup phakhut naiuso kongwoi, omkhi, naiuso kandio nou tholo-e.

5Israelhai hoikam nou Aron hau angei chaithio thaiutha wonpong nime naiuso ajah chaithio thaiutha onnemokpong tsak kiu-e. 6Apaüh meshen angei thaiutha naiuso apa tsamkhaiu thaiutha awan epau jangtsopong tsak aloat chaithio kiu-e. 7Küta won nime nou Apaou Nejenkhio ai naptsün ko kankü shi-e. 8Nungko apaüh lung nime nou tsak tü “Apaou thaiutha” naiuso amao tsak nou tü “Azazel thaiutha” ta iikü phongde-e. 9Aronüh phongde tsangkü chosantsün won nou Apaou thaiutha aloat chaithio naiuso nung angei chaithio tsakli thio-e. 10Azazel thaiutha chosantsün won nou Apaou hau aa thiowane küta nungh khaiuniahoi angei kankü khuwanau thaiutha ko Azazel dongai singtso goh nai napkü hongane.

11Tilai Aronüh jangtsopong nou apa naiuso apa tsamkhaiu thaiutha angei chaithioli aloat chaithio kiu-e, 12apaüh inkaio nyaikü meankü napkü amthang ainou chai tsak lo-e, naiuso nungh Thatü AsioThang nai kankü nape. 13Nungko Apaou khako apaüh angannyamtsün in nai jah-e, naiuso nungh angannyamtsün inkhao nou Athalou-e Ngiokhem Paidan Kap nou loijei-e, nungtiphe apaüh nung epkü tsü eane. 14Apaüh nung jangtsopong she ajantso loküta nungko apa phakhatso chamthiokü nung Athalou-e Ngiokhem Paidan Kap kha ai nai naiuso nung Paidan nou da chinyatjam satlute.

15Nungphiai apaüh khaiuniahoi thaiutha angei chaithio won nou loate, naiuso nungh she Thatü AsioThang nai kankü nape, küta Athalou-e Ngiokhem Paidan kha ai si akap noutü jangtsopong she nou chhikü shitsünli, satlute. 16Nungli apaüh Israelhai tsüyanthsüokün naiuso ngüso angei apem ainou Thatü AsioThang losioau amsikham shane. Apaüh nung Nejenkhio nou da chhiau noin, tiautenai nung amkham yamko tsüyanthsüokü asaothang awemting nouko noin. 17Alosio amkham kiuau Thatü AsioThang nai Aron naptsün tao ainou apa moshikhukün tao saokü Nejenkhio mongai sau tsünoi au noin.Tilai apaüh apa thaiutha, apa tsamkhaiu thaiutha, naiuso hoikam athum thaiutha amkham kiu-e, 18apaüh amthang nai ajah chaithio kiuau naiuso nung losiokiu au khu-e. Apaüh jangtsopong she intso naiuso won she intso ta loküta amthang aniokun kheam nouso apem tü satlute. 19Apa phakhatsoüh she intso chamloküta amthang nai chinyatjam satlute. Nungli apaüh Israelhai angei ainou losange naiuso nungh siokü iula-e.

Amaohai Aphio Kankiutsün

20Tilai Aronüh Thatü AsioThang nou, Apaou Nejenkhio nouso, naiuso amthang losiotsün amkham shankheme, apaüh won aa Azazel thaiutha chosantsün Apaou hau thio-e. 21Apa pha nemtso nung wonkhaiu nai thanglutküta Israelhaiüh khengshitsün, tsümeikü chhitsün, angei nouso chikü pheksane, naiuso nungti nung wonkhaiu nai lelutane. Küta achhiau thoiluttsün khaiunia nou tsangkü nung won singtso goh nai lemlokü komane. 22Nung won nou ngüso ün angei nouso apem apako aodangkün gohthang ai kankü khuwane.

23Nungaih Aron Nejenkhio nai napküta Thatü AsioThang nai monapkün khako meson neshe shitho nouso losankü nungso nungko taiuwane. 24Apaüh AsioThang tsak nai khiam pengküta apa neshe theloshi-e. Nungthankü apa meshen angei nouso naiuso khaiuniahoi nouso angei lowanau ajah chaithio nouso kiuau kengchiai khu-e. 25Naiuso angei chaithio thaiutha nung thainian i-iu nou apaüh amthang nai jah-e. 26Khaiunia sauüh Azazel hau singtso goh nai won nou komkü khun, apa asaothang nai moshinapkün khako apa neshe phetankü naiuso khiam pengau noin. 27Angei chaithio kiutsün jangtsopong naiuso won she nou angei lowanau thaiutha Thatü AsioThang nai kankü naptsün nung asaothang pe-chiai kankü khukü jahwan. Akhun, anyih, naiuso athaisisai apem jahwanau noin. 28Nung jahwantsün nou apa asaothang nai moshikün khako apa neshe phetankü khiam pengau noin.

Atuhsantsün Ajekhaiu yangsankü Nuotsün

29Ashiau tao chikü nouko nung ngiokhem nouso yangsanau noin. Alei chinyat nou da ajekhaiu chenyi nouko nai Israelhai naiuso ngüso ongko kihatsün gohmao khaiunia nousoüh titso tsüchhikü keithon noiau noin. 30Nungnyi ko ngüso angei chikü ainou ngüso losioau amsikham shanau noin, nungti ngüso amkham yamko yanthsüokü noi-e. 31Nungh ajekhaiu to sauühtso ti chhi tsüchhikü keithon lotsün Thatü Asio ajekhaiu tsak hau noi-e. Nung ngiokhem nouso ashiau noitsün atao chikü thaiutha kankeiau noin. 32Akhengting meson sau meshen po liluau thaiutha ayam nai tsomkiukü losiokü noin nungühlu nung alosio amkham shanau noin. Apaüh meson shitho nouso tholokü 33Thatü AsioThang, Apaou Nejenkhio, amthang nou, meson nouso, naiuso hoikam khaiunia nouso apem losioau amkham shane. 34Nung ngiokhem nouso ashiau atao apem nouko yangsankü nuo au noin. Nung amkham Israelhai ngüso angei apem ainou losioau pon tsakko jam shanau noin.

ASIO THSAMLAI

©2005 Bible Society of India

More Info | Version Index