Search form

Levi 4

Tsüngeankü Phiotsün Angei thaiutha Chaithio

1Apaou ün athoilut nouso 2ajantsoüh tsüngeankü lothekü angei sunnai nung ngiokhem nouso lükankei ta Israelhai hau chiteau Apaou nou Mosa tü thoilut.

3Nung angei suntsün khaiunia nou Akhengting Meson lathakü khaiuniahoi khako aphio nou kankü shinaito, apaüh apa angei thaiutha alothe ti tsüsunkün jangtsopong tsak Apaou hau aloat chaithio kiuau noin. 4Apaüh nung jangtsopong nou Nejenkhio nai naptsün khako kankü shikü akhaiu nai apa phaüh thangküta, nung Apaou khako loatau noin. 5Küta Akhengting Meson nou nung thainian she nou intso loküta Nejenkhio nai kankü nappe. 6Nung she nouko apa phakha chamthioküta asio nekhongjeitsün khako chinyatjam satpenge. 7Naiuso apaüh nung thainian she ajantso Nejenkhio nai angannyam jahtsün amthang aniokun kheam nouso tü peilute. Apaüh ashe apoi nouso Nejenkhio nai naptsün dongko aloat chaithio jahtsün amthang athan nai thsapenge. 8Nung jangtsopong ainou apaüh iiu apem, asansimong iiu nouso, 9awe naiuso nung tü suntsün iiu nouso, naiuso asan ainou ameiting haoson apem lo-e. 10Meson nou nung iiu nou loküta, ajah chaithio thaiutha amthang nai jah-e, nung nokmei chaithio thaiutha apaüh aloattsün thainian ainou iiu nou da chhikü shitsünlilu noi-e. 11Lüko apaüh nungso akhun, atsah, akhaiu, ahok, naiuso asaih nou hakü asansimong nouso, 12asaothang pechiai luo kheppantsün amkham yamko asiothang tsak nai kankü khuküta apaüh nung pai jahkü taiutsün in nai jah-e.

13Nung Apaou ün athoilut ongko tsak Israel hoikam athum nou tsüngeankü angei sunloküta aphio iula nai, 14nung angei ngelatsünko aikü, hoikam athum nou angeiwan chaithio jangtsopong tsak kankü shiau noin. Ngüsoüh nung jangtsopong nou Apaou khako Nejenkhio nai kankü shi-e; 15hoikam nouko aheihoi nousoüh nung thainian khaiu nai ngüso pha thanglute, naiuso nungko thainian nou loate. 16Akhengting Meson nou nung jangtsopong she intso loküta Nejenkhio nai kankü nappe, 17nungko apa phakha chamthioküta nung akhongjeitsün ne khako chinyatjam satpenge. 18Apaüh Nejenkhio mongai angannyam jahtsün amthang aniokun kheam nouso da nung thainian she intso lolute; küta Nejenkhio nai naptsün dongko ajah chaithio thaiutha kankeitsün amthang athan nai lolute. 19Küta apaüh iiu nouso chikü loküta nung amthang nai jah-e. 20Apaüh nung jangtsopong nou da lüko jangtsopong tsak angei thaiutha ko chaithio kiutsün tü chhikü shitsünli lu chhi-e, nungli apaüh khaiuniahoi angei thaiutha aloat chaithio shane, naiuso ngüso hau angei wankiu-e. 21Nungaih apaüh meshen angei thaiuthako jangtsopong jahkü chaithio kiutsünli, nung jangtsopong nou lüko asaothang pechiai kankü khuküta jahkü chaithio kiu-e. Nung chaithio hoikam angei kankü khuwanau nou chaithio tsak noin.

22Nung Apaou ün athoilut ongko tsak nou nokpao tsaküh tsüngeankü angei sunloküta aphio iula nai, 23nungaih apaüh nung angei noin ta ngelakü iulanai, apaüh won apong tsak ti alothe tsüsunkü chaithio tsak kankü shi-e. 24Apaüh apa pha nung wonkhaiu nai thangkü nung amthang nou tü ajenapki, tiai ajah chaithio thainian nouso loatji, nungko loat au noin. Nung angei kankü khuwantsün chaithio tsak noin. 25Meson nou apa phakhason nung thainian she nai chamthioküta, amthang aniokun kheam nouso tü satlute, naiuso apoi nouso amthang athan nai thsa-ane. 26Küta nokmei thaiutha thainian nouso loatkü iiu jahtsün khekkü, apaüh iiu nouso apem amthang nai jah-anau noin. Nungli meson nou nokpao tsak angei thaiutha aloat chaithio nou kiu-e, naiuso apa hau angei nou wankiu-e.

27Nung Apaou ün athoilut ongko tsak nou sauühlünou tsünge-ankü angei sunlo küta aphio iulanai, 28nungaih apaüh nungto angei ta ngelakü iula nai, apaüh meshen angei mai ti alothe tsüsunkün won asang tsak chaithio kankü shiau noin. 29Apaüh apa pha nung thainian khaiu nai thangkü, amthang noutü ajenapki nai noitsün tiai thainian nouso ajah chaithio thioji nungko loatau noin. 30Meson nou apa phakhatso nung thainian she nai chamthio küta, amthang aniokun kheam nouso tü satlute, küta apoi nouso amthang athan nai thsa-ane. 31Nungaih nokmei thaiutha kiutsün thainian ainou iiu lowantsünli, apaüh nung thainian ainou iiu nouso apem lowane, naiuso apaüh nung Apaou ta angannyam nou monglengiau amthang nai jahwane. Nungli meson nou khaiunia ün angei thaiutha aloat chaithio nou thio-e, naiuso nung khaiunia hau wankiu-e.

32Khaiunia tsaküh angei chaithioau onnemok tsak kankü shinai, nung thainian to alothe ti tsüsunkün asangtso tsak theau noin. 33Apaüh apa pha nung thainian khaiu nai thanglutküta, amthang tü ajenapki nai noitsün thainian jahkü loattsün amthang nai loate. 34Meson nou apa phakhatso nung thainian she nai chamthio-e küta amthang aniokun kheam nouso tü satlute, naiuso apoi nouso amthang athan nai thsa-ane. 35Nungaih apaüh nokmei chaithio thiotsün onnemok ainou iiu nouso lowantsünli, iiu nouso apem lowane, naiuso apaüh nungh Apaou hau kiutsün chih chaithio nousoko aikü amthang nai jah-e. Nunghli meson nou nung khaiunia ün angei thaiutha aloat chaithio thioau noin, naiuso nung khaiunia hau angei nou wankiu-e.

ASIO THSAMLAI

©2005 Bible Society of India

More Info | Version Index