Search form

Haove 1

Israelhai Vetao Chongting Haove Loutsün

1Israel khaiunia nousüh Ijip lean küta nepon nouko alei nime nou da chongting ajekhaiu nouko nai Apaou nou Sinai liutsa nai Apa noitsün Nejenkhio nouko Mosa tü chite. Apaüh ngiom, 2“Aron ajeüh Israel khaiunia kau kau, naiuso pothso pothso ta vetaoling haove lülo, nungko pon eknime tsüdekünai 3nung khengai nouso sauhai süpai chhisiya nai hau waokü noin nungso melohoi apem nian alingsan. 4Aje tü hachuau pothso naiuso kau nouso pungkü ainou ateng tsak tsak kiuao lüsang.” 5-16Nung chhisiya thaiutha ngüso hoikam ainou chosantsün khaiunia nungso noiküla:

Kau Pothso nai ateng
Reuben Shedeur thso Elizur
Simeon Zurishadai thso Shelumiel
Judah Aminadab thso Nashon
Issachar Zuar thso Nethanel
Zebulun Helon thso Eliab
Efraim Amihud thso Elishama
Manase Pedazur thso Gamaliel
Bejamin Gideoni thso Abidan
Dan Amishadai thso Ahiezer
Asher Okran thso Pagiel
Gad Deuel thso Eliasap
Naptali Enan thso Ahira

17Nungso khaiunia chekü nime ahachu hakü Mosa naiuso Aronüh 18ngüso hoikam ainou alei nime chongting ajekhaiu nouko nai jonkam küta ateng nouso niakü pon eknime ainou nung khengai nouso khaiunia pungkü kau kau, pothso pothso, nian satthio küta vesani. 19Apaou nou Mosa tü thoiluttsünli, apaüh Sinai liutsa nai khaiuniahoi nian satthio. 20-46Yakob thso- yamchong Reuben tü chetsinyimtsün kau kau, pothso pothso atengthso nou niakü süpai theao waokü noitsünso pohai pon eknime naiuso nung khengai nouso nian satlo. Nungso apem kamkü nai nungti noiküla:

Kau Haove
Reuben 46, 500
Simeon 59, 300
Gad 45, 650
Yihuda 74, 600
Isakar 54, 400
Zebulun 57, 400
Efraim 40, 500
Manase 32, 200
Bejamin 35, 400
Dan 62, 700
Asher 41, 500
Naptali 53, 400
Apem Kamkou: 603, 550

47Levihai to amao kau nouso haove nai tsüvelutha, 48tiautenai Apaou nou Mosa tü nungti ngiokü noiküla: 49“Tilai ni süpai chhisiya thaiutha waokü noitsün khaiuniahoi vetaoling haove lo-e, Levi kau to lamonglohakü ataiu. 50Nungliko Levihai hau Ngo Noitsün Nejenkhio naiuso nungko noitsün jengtsaiu chiai apaotsangau lütaiu. Ngüsoüh nung Nejenkhio naiuso nungko noitsün jengtsaiu nou pi-kei-e, naiuso nungko yathsüoe, naiuso ngüsoüh nung lemjeikü asaothang shane. 51Ti taoko asamüh asaothang nou soisoi-e, Levi haiüh nung Nejenkhio nou pi-lokü khu-e küta asaothang ayan pungkü loüh nung lachoshiao noin, sau nung Nejenkhio shimkü shi-e apa to loatkü wane. 52Israel thsoso apoi nousoüh ngüso nejenkhio khaiunia pungkü nou momo saothang nai naiuso hoihoi akhengting hoili lingtaiukü shanela. 53Lüko ajantso shimkü shikü Ngü mongmat sungtsün Israel hoikam tü tsüshi-iao thaiutha Levi haiüh to Nejenkhio lemkü ngüso saothang shane küta nungtü jime.” 54Nungti Apaou nou Mosa tü thoiluttsünli Israel thsosoüh alum chhin.

ASIO THSAMLAI

©2005 Bible Society of India

More Info | Version Index