Search form

Haove 10

Tangkason nou Langtsün Poipoi

1Apaou nou Mosa tü ngiom, 2“Khaiuniahoi jonkamau naiuso asaothang nouso laopengao thaiutha welutao tangkason nou langtsün poipoi nime lüshan. 3Tilai poipoi nime nou thalaiukü mate, hoikam athum Ngo noitsün Nejenkhio koukhan dongko ni lemkü kamshi-e. 4Lüko tilai poipoi tsaklu mate, naito kau pungkü ainou aheihoi lu ni lemkü kamshi-e. 5Tilai nung poipoi atao leletkü mate, ajepek nai saotaiu nouso kau hoi tsalo-e. 6Tilai atao müjam nung poipoi letletkülu mate, ajepekki nai saotaiu nouso kau hoi tsalo-e. Nungtiphe atao letletkü mattsün sang nou to asaothang laopenganao noi-e. 7Lüko hoikam athum kamshi-iao naito atao laiukü matau noin. 8Nung poipoi nouso mesonhoi Aron thsosoüh mat au noin.”

“Nung ashiao noitsün atao apem thaiutha kankeiau don yam ngiokhem nouso noin. 9Tilai asam meshen goumchi mongko ehli noi-e, niko li au shitsün ainou ni achija soloau noitsün ko ehlitsün thaiutha ii hanao nung poipoi mat au noin. Ngo, Apaou, asam Goa nou asam ehoi ainou kipsane. 10Naiuso loüh amongling tao-alei yan sümai taoko, naiuso amao don yam sümai nouso taoko asamüh tilai ajahtsün chaithio naiuso aalo chaithio kiu-e, nung taoko nung poipoi nouso mat ao noin. Nungai Ngo asam hachu-e. Ngo, Apaou, asam Goa noin.”

Israel haiüh Asaothang Laopengji

11Nepon nouko alei nime ajekhaiu eknime nouko Israel haiüh Ijip wankü khuküta, Apaou noitsün Nejenkhio khütha ainou thengmia nou soian, 12küta Sinai liutsa ainou Israel hai ngüso süme tsalo. Nung thengmia nou Paran liutsa nai saokü noi. 13Ngüso Mosa tsangkü Apaou nou thoiluttsünli tsalokü khu, 14ngüso tsalotsün tao pungkü nai alingthat taiutsünli nouko khukü noiküla. Chongting nai Yihuda kau ngüso nisan khemko tsalokü khu, hoihoi lingkü, Aminadab thso Nashonüh heikü khu. 15Isakar kau mongko Zuar thso Nethanel ahei noiküla, 16Zebulun kau mongko Helon thso Eliab ahei noiküla.

17Amkham Nejenkhio nou laopeng küta, Gershon naiuso Merari kau nou nung pilokü khu.

18Nungthanko, Shedeur thso Elizurüh niakü Reuben kau asaothang nisan ko hoihoi ta tsalo. 19Zurishadai thso Shelumiel nung Simeon kau ongai nou ahei noiküla, 20Gad kau ongai Deuel thso Eliasap nung ahei noiküla.

21Nungthanko Kohat kau Levi hai asio jengtsaiu nouso kankü tsalo. Ngüso nungthan asaothang tsaloshi- tsün shisao naito, Nejenkhio nou loüh lahshanankü noiküla.

22Nungthanko Amihud thso Elishamaüh niakü hoihoi Efraim kau saothang nisan khemko tsalo. 23Manase kau ongai Pedazur thso Gamaliel ahei noiküla; 24naiuso Benjamin kau ai Gideoni thso Abidan ahei noiküla.

25Aphiting nai Dan kau saothang nisan khemko ahoi nou tsalo, naiuso nung hoi khaiuko ahei Amishadai thso Ahiezer noiküla. Nung süpaihoi nou aphihoi nouso tü hüjeikü noiküla. 26Asher kau mongai ahei nou Okran thso Pagiel noiküla. 27Naptali kau ko ahei nou Enan thso Ahira noiküla. 28Ti taoko Israel hai ngüso saothang laopeng küta tsalo-e, ngüso ahoi ahoi yangkü lingthiokü kha ai khutsún nungti noiküla.

29Mosaüh apa kaio Midian hai nou Jethro thso Hobab tü ngiom, “Apaou nou sam hau kiuao thaloutaiutsün athang thaiutha sam lo tsaloau noin. Apaüh Israel hai shingkü khu-i-e ta thalo-iu, nungtiphe sam ko ashi, naiuso samüh asamko sam shingkü khutsün haoson noiha-e.”

30Hobabüh thalakü ngiom, “Nyah, Ngo achetsinyim goumchi nai laokü khuwanji.”

31Mosaüh ngiom, “Tsüojinyangkü sam lalean,” “Liutsa nai sam saothang samüh tilai shane ni nung ngeji, naiuso ni sam yamnia ao theau shio-e. 32Ni sam ko khuha naito, samüh niko Apaou nou sam hau ouk haoson kiutsün ko ni haoson noiha-e.”

Khaiuniahoi nou Tsaloji

33Tilai khaiuniahoi nou asio king Sinai wankü khu, ngüso samnyi yam tsakei. Ngüso shamau athang tsak eploau thaiutha Apaou Athalou-e Paidan asaita ngüso khako khukü noi. 34Asaothang pungkü ainou ngüso tsalo taoko anyi taoko ngüso khütha nai Apaou thengmia noiküla.

35Tilai Athalou-e Paidan nou akhu au tsalo-e, Mosaüh ngio, “O Apaou, tsaküta, a-ehoiso akhupengi, naiuso ni tü chinyantsünso akhako akhupengi!” 36Naiuso nung laotsün taoko apaüh ngiom, “O Apaou, Israel hai pothso heng si heng dongai laokü ashi!”

ASIO THSAMLAI

©2005 Bible Society of India

More Info | Version Index