Search form

Haove 11

Tabera Athang Niankiu

1Khaiuniahoi nou ngüso angja thaiutha Apaou tü namnam ao yachu.Tilai Apaou nou ngüso namnamtsün lula, Apa mongmat küta khaiuniahoi nou chiai in nou hong.Nung ngüso ongko nyaisan küta ngüso saothang athun tsakai lothean. 2Khaiuniahoi nou Mosa tü ahachu thaiutha wekü ngiom, nungai Mosaüh Apaou tü misao sao, naiuso in nou nyatkü shin. 3Nungtiphe nung athang nou tü Tabera ta jon, tiautenai nungko Apaou in ngüso ongko nyaikü noiküla.

Mosaüh Aheihoi Aochinyat Chosanji

4Israel haiko melemao hai ajantso khuhakü noiküla. Ngüso nyih nou tü chinektsün thatü thsüokü iula, naiuso Israel hai lüko namnam au yachukü ngiom, “Samüh lüko nyih eheau intso noitünto! 5Ijip ai naito ngou lüko samüh aiutsün alum, amai tsüyangkü hean. Mülong nouso, Chongmülong nouso, hauthaisun nouso, hauthai khaiu nouso, naiuso amao hauthai nouso samüh hetsün yangsanji. 6Lüko lo sam oukong khuwaniu; nungko eheau ti tsünoi, ajekhaiu tsütokü manna tü simkü eheau ti tsünoi!”

7Manna nung aluao pai eiu ehen tsakli aleng athaiu si jamlung khekkü noiküla. 8-9Nung asoh ngüso saothang nai khiamle ko hakü salitsün noiküla. Nungthan nyap khaiuniahoi alumai lemkü khuküta nung kamlo, küta nung thaopekkü wonne au shan naiuso nung thengkü themtsai patpengkü shan. Nung Olip khiam ko hakü saitsün themtsaili samkü noiküla.

10Mosaüh khaiuniahoi ngüso nejenkhio koukhanko hoihoi ta tsakü namnamtsün lula. Apaou ngüso ko mongmat nou shioko Mosa mong- kiakü noiküla, 11küta apaüh Apaou tü ngiom, “Ni tiau ngü tü nungti tsümeitingkü kankei? Ni tiau ngüko tsümonglingji? Ni ngü hau nungso khaiunia apem thaiutha thsale tiau kium? 12Ngo ngüso shithokü tsünoi, tsüdekünai chetsinyim kiukü tsünoi! Ngüso paosipo tü thaloutaiutsün goumchi mothasaokün lektso ngüso chikü methsoli jükongai pipkü kankeikü apaotsang tsün tsak chhisiyali chhiao ni ngü tü tiauta sang? 13Nung khaiunia chikü thaiutha ngo nyih saiukü tiai eppe? tiautenai samüh heau nyih sam hau akiu, ta shapkü ngüsoüh ngü tü ngioji. 14Ngo jüchija nung khaiunia apem thaiutha thsale loau tsüshio-e, nung jü thaiutha chhisiya thatü aphop tsak noin! 15Ni ngü tü nungtilu kankei-e tünaito, ngü tü tsüojinyangkiu küta ngo aloatan, nungaito ni mongmattsün ngü tilaitso jeiloshitsün tsünoi-e.”

16Apaou nou Mosa tü ngiom, “Khaiunia nouso aheihoi sauhai ngesan kü noin nung asuhat suntsün khaiunia aochinyat akamshi, küta ngüso Ngü noitsün Nejenkhio dongai nialokü shiküta ngüso nungai aphiko tsakü anoi ta lüngio. 17Ngo saokü niko nungai chite-e, naiuso ngo asam hau kiutaiutsün loüh ngüso hau kiu-e, naito nung thsale ni shioau ngüsoüh ni tü hachuau shio-e, naiuso nung thsale apemsaüh tsükane. 18Lo ni khaiuniahoi nouso tü lüngio, asamüh nyih heao thaiutha asam chija lühom thaiutha lülosiolo. Tiautenai Apaou nou lulakü sam hau eheao nyih kiu-e, Ijip naito sam achet maikü noiküla ta asamüh shapiu. Lo Apaou nou asam hau nyih nou kiu-e, naiuso asamüh nunglu heao noin. 19Asamüh nung nyih ajekhaiu tsak si nime tsüdekünai pungo si che nyi, loüh ajekhaiu eknime nyi thaiuthalu tsühe-e; 20lüko alei thamokü, nungüh asam akia iulakü, noukhan nai saokü shitsatkü mongchio mothasangkün lektso he-e. Tiautenai asam ongko noitsün Apaou asamüh tsülo, naiuso apa khako tiauta asam Ijip ainou shikho ta namnamkü ngiom?”

21Mosaüh Apaou tü ngiom, “Nungai ngo khaiunia 600, 000 (heng tsom louk) niakü keiji, naiuso ni ngüso hau alei tsak thaiutha nyih saiukü kiu-e ta ngiom? 22Ngüso thaiutha onnemok hoi naiuso jangtsohoi saiukü loate süne? Khiamnok nai noitsün ngou apem nou ngüso thaiutha saiu-e süne?”

23“Jü oukong athat yangkülu noin süne?” ta Apaou nou thalan. “Ngo ti ngiom nung thawao-e süne tsüthawao-e ta ni lo piamkü eppe!”

24Nungtiphe Mosa khaiuniahoi dongai khukü Apaou nou apa tü ti ngiom nung chiten. Apaüh aheihoi aochinyat kamshi-i küta ngüso Nejenkhio lemkü noi-i. 25Nungai Apaou nou thengmia nai saoküta apa ko chite. Apaüh Mosa hau kiukü noi- tsün onthso ajantso loküta aheihoi aochinyat nouso hau kium.Nung tilai onthso nou ngüso chiai saom, ngüsoüh e-po hoi khekkü sang songkü ween, lüko atao laiukü tsüdekü noiküla.

26Ahei aochinyat nouso ongko, khaiunia nime Eldad naiuso Medad ne Nejenkhio nai tsükhu hakü asao- thang nai noian. Nung asaothang nai lüko ngüso chiai onthso nou saom, naiuso ngüso lüko e-po hoi khekkü songkü wekü ngiom. 27Oum tsak Mosa dongai jingkü khukü Eldad si Medad neüh ti chhiji nung chiten.

28Nungai Nun thso Yihusua, sau Mosa hachutsün oum tsak noiküla, apa oum tsak noikü thaphe, apaüh Mosa tü ngiom, “Jü Apaou Mosa, ngüso alolaowan!”

29Mosaüh thalakü ngiom, “Jü mongchio thaiutha ni yangelatjiso? Ngo to Apaou nou khaiunia apem hau apa onthso kiuküta e-pohoi li ngüso hau we-iao aiuküla!” 30Küta Mosa naiuso Israel hai ahei aochinyat nouso asaothang nai laokü shin.

Apaou nou Daokom Waio nouso Hongji

31Alekta Apaou nou daokom waio nouso shipjikantsün khiamnok ainou ahsheih goh nou ta phayam tsüngoi- kü taiukü shei-i. Nung waio nouso asaothang shimkü, aniokun tsakaiüh tsakaiüh ta ajekhaiu tsak yam asaothang lemkü sathio-i. 32Nung- tiphe asoh anyi ajekhaiu chikü, naiuso nungthan ajekhaiu nouso saokü, khaiuniahoi nou daokom waio nouso thalotsün chhikü noiküla; nungko khaiunia sauühtso tsoi heng tsak khemai tsüthalo. Ngüsoüh asaothang lemkü nung lowanao yampeng. 33Ngüso eheau nyih saiukü noi taoko, Apaou khaiuniahoi nouso tü mongmat küta ngüso ongko imkia tsak sungi. 34Nung athang nou tü Kibrot Hatava ta jon, nung athat “Achinektsünso Eetam” ta noiküla, tiautenai ngüsoüh nungko nyih chinektsün khaiunia nouso khanan.

35Kibrot Hatava ainou hoi nouso Hazerod ai khu, küta ngüso nungai asaothang shankü noi.

ASIO THSAMLAI

©2005 Bible Society of India

More Info | Version Index