Search form

Haove 12

Miriam hau Angja kiu

1Mosaüh Kus hai menyiu tsak tsamsigoh yang, naiuso nung thaiutha ko Miriam si Aron ne namnam. 2Ngüneüh ngiom, “Apaou nou Mosa tsangkülu chiteji süne? Apaüh sam tsangkü lüko tsüchite süne?” Apaou nou ngüneüh ti ngiom, nung lula. 3(Goumchi khaiunia apem khengai Mosa atsamlotsün khaiunia tsak noiküla.)

4Alekta Apaou nou Mosa si Aron naiuso Miriam sotü ngiom, “Ngo asam khaiunia süme nouso Ngü noitsün Nejenkhio nai shi-iao aiuji.” Ngüso khu, 5nungai Apaou nou thengmia kheam tsak nai noikü saoküta Nejenkhio bekhan dongko tsakü jonkü ngiom, “Aron! Miriam!” Nungai nung khaiunia nime nou ne kha ai shin, 6küta Apaou nou ngiom, “Ngo ti ngio-e, nung lo anglu! Tilai asam ongko e-pohoi noiküla, Ngo ngüso tü jüchija atsangshei sungkü han naiuso ngüsoko mea mean nai chite. 7Tilai Ngo, Ngü yathsüotsün Mosa ko chiteji, nung amomo noin, Ngo apa jü khaiunia Israelhai khaiuko ataotum theau taiukiukü noin. 8Nungtiphe Ngo apatü athat nai tsüdekü tsangsheikü nai khasikha ko chiteji, apaüh Jüpem lüko epiu! Nungaito asamüh Ngü yathsüotsün Mosa thako titi chitesomji?”

9Apaou ngüso thako mongmat sung, küta apa pungekü khuwan, 10naiuso thengmia nou Nejenkhio nou wankü khuwan, nungai Miriam khun alekta jeekia nou meanan naiuso nyinli thaiukü iula. Tilai Aronüh Miriam tü thap, nungai apa jeekia nou meankü ep, 11apaüh Mosa tü ngiom, “O jü Apaou, sam ün mainga chhisiya naiuso samüh sunhetsün angei shioko sam hau angja lakiu-i. 12Meshen nyiu thai ainou chettsün taoko nyih apaitso tsühakü chettsün khaiunia tsakli apa e khaiunia la iula-i ta ngo ni tü kojaji.”

13Nungtiphe Mosa Apaou dongai nung ngio kankü khuküta, “O Goa, apa alomei!” ta vekü ngiom.

14Apaou nou thalakü ngiom, “Apa poüh apa khanai lei thoplutnai, apa amiam nai chinyatnyi pamkü tsünoi-e süne? Nungtiphe apa anojet tsak asaothang nai kiapjeikü awan, küta nungphiai apa nialokü shiao shio-e.” 15Miriam, asaothang nai chinyatnyi kiapjeikü wan, naiuso apahoi nai nialokü moshikün lektso khaiuniahoi nou nungkolu noi. 16Nungai ngüso Hazerod ainou tsalokü khuküta Paran liutsa nai asaothang shankü noi.

ASIO THSAMLAI

©2005 Bible Society of India

More Info | Version Index