Search form

Haove 13

Akauthahoi Hong

(Ngiokhem 1:19-33)

1Apaou nou Mosa tü ngiom, 2“Israel kau chekü nime nouso pungkü ainou ahei tsak tsak chosan küta Ngo tisübao Kanan goumchi Israelhai hau kiuji nungai khukü thapau ngüso akauthahoili lühong.” 3-15Mosaüh angiotsün angkü Paran liutsa ainou aheihoi nungso hongkü noiküla:

Kau Ahei
Reuben Zakkur thso Shammua
Simeon Hori thso Shaphat
Yihuda Jefune thso Kaleb
Isakar Yosep thso Igal
Efraim Nun thso Hoshea
Bejamin Raphu thso Palti
Zebulun Sodi thso Gaddiel
Manase Susi thso Gaddi
Dan Gemali thso Amiel
Asher Maikel thso Sethur
Napthali Vopsi thso Nabi
Gad Makhi thso Geuel

16Mosaüh goumchi tü thapau akauthahoi hongtsün nungso noiküla. Apaüh Nun thso Hoshea nian nung Yihusua ta li-ekiu.

17Tilai Mosaüh ngüso hong, apaüh ngüso tü ngiom, “Nung ainou ajepekki nai lünap, küta king goh nai lüsungh. 18Nung goumchi ti inli, nungai khaiunia titso kihkü noin? naiuso ngüso titithatso kongkü noin nung lüthaisan. 19Goh nou mei si tsümei, naiuso nungai noitsün khaiuniahoi noksong süne noknio nai kihji nung lüthaisan. 20Goh nou tsahkü süne tsüde naiuso pai si aou noi süne tsünoi lüthaisan. Küta nungai eiusantsün pai eiu ajantso kankü ashi” (Nung ah tao sainaoshep semtsün atao noiküla)

21Nungtiphe ngüso Hamat Aoyan dongai nai sungkü, Zin liutsa ainou Rehob saokü goumchi nou tü kautha. 22Ngüso chongting nai ajepekki goumchi nai khu küta Hebron ai shin, nungai Ahiman, Sheshai naiuso Talmai kau oukongting Anakim tü chetsinyimtsünso kihküla. (Hebron nung to Ijip nai Zoan ainou pon chinyat khako shantaiukü noiküla) 23Ngüso Eskol tsamei ai shin, nungai ngüsoüh sainaoshep paikia tsak lethsangkü eiutsün thamsan küta api ao pai tsatthiokü ngüsoüh nung pihlo. Ngüsoüh loüh sasashep, naiuso phiushep ajantso kankü shin. 24(Nung athang nou tü Eskol Tsamei ta jonkü noiküla, tiautenai nungai Israel haiüh sainaoshep apung tsak hesanan.)

25Ajekhaiu aopülenyi nung goumchi thapekkü thapküta phiai akauthahoi 26Mosa, Aron naiuso Israel hoikam Paran liutsa Kades nai noi taoko laokü shin. Ngüsoüh epkü shitsün chiten, nungko aikü pai eiu nou kankü shin. 27Ngüsoüh Mosa tü ngiom, “Samüh goumchi nou tü sailu-iu, naiuso nung goh nou tsahkü naiuso meikü noin ta epsan; naiuso nung ainou nungko pai-eiu ajantso noin. 28Lüko khaiunia sauhai nungai kihji, ngüso oukongkü noin, naiuso ngüso noknio nouso thatü thsüokü meikü pejeikü noin. Nungtü simkü akonghoi thsüokü tsaokü samüh nungai ep. 29Amalek hai nung goumchi ajepekki nai kihkü noin; Hit hai, Jebus hai, naiuso Amorhai king goh nai kihkü noin, naiuso Kananhai Mediteranian khiamnok sai ai naiuso Yordan haiukok nai kihkü noin.”

30Kalebüh Mosa thako namnam- tsün khaiuniahoi nou tsamlokü iula-i küta ngiom, “Lo samüh nung khaiunia nouso koman küta goh nou loau noin, tiautenai samüh nungso shiolowaniu.”

31Lüko khaiunia sau Kaleb ko khuhakü noiküla apaüh ngiom,

Tsüde, samüh ngüso komheao momai, nungai noitsün khaiuniahoi nou sam tü simkü oukong noin. 32Nungtiphe ngüso Israel khaiunia ongko ngüsoüh sailutsün goh thaiutha atsüotsüdekün ngiongem lopeng. Ngüsoüh ngiom, “Nung goumchi nou nungai kihtsün khaiuniahoi tsadaotso eheshiu saiukü tsüsungh. Samüh eptsün khaiuniahoi nou konsitheng nai laiu laiukü hoi jije noin. 33Naiuso loüh nungai akengtinghoi nouso lüko ep, nungso Anak thsaosithsoso noiküla. Sam ngüso khako to jongku ehenthso tsakli yangji, naiuso nungli samüh ngüso tü thappao noin.”

ASIO THSAMLAI

©2005 Bible Society of India

More Info | Version Index