Search form

Haove 16

Kora, Datan, naiuso Abiram soüh Khengshitsün

1-2Levihai Kohat kau ainou Izhar thso Koraüh Mosa ahei thako khengshi. Apa ko Reuben kau ainou Eliab thso Datan naiuso Abiram, naiuso Pelet thso On naiuso amao Israelhai mepem 250 hoi tsangkü chosantsün aheihoi nou niakü Mosa ahei thako khengshikü tsalo. 3Ngüso Mosa si Aron ne khako kamshi küta ngüne tü ngiom, “Asam thatü thsüokü khu-iu! Hoikam mepem apem Apaou haoson noin, naiuso Apaou nou sam ko asaita noin. Naito, Mosa, ni tiau Apaou hoi- kam khengai achija ashe shanloji?”

4Tilai Mosaüh nung ngio lula, apa chija gohai loikü ta misao sao. 5Nungai apaüh Kora naiuso apako hatsün hoiso tü ngiom,

“Lühom ahom Apaou nou apa ko sauhai hakü noin nung sam tü hane; apako hakü noitsünso, apaüh chosantsünso amthang nai apa khako shi-e. 6-7Lühom ahom ni naiuso niko hatsünsoüh sonlak nai inthio nou thiokü, loüh nung chiai angannyamtsün lolutkü, nung amthang nai kankü lükhu. Nungai samüh Apaou nou chosantsün sübao nou noin nung eppe. Asam Levihai thatü thsüokü khuwantsün tsak noin!”

8Mosaüh Kora tü tsülaokü chite.

“Asam Levihai, anglu! 9Asam apa khako shiao shiokü hao, Apaou Nejenkhio nai asam ayathsüotsün chhi chhiao, naiuso hoikam nouso yathsüotsün chhiao hoikam thum ainou Israel Goa nou asam mothikü shingsan taiutsün nung chhi ehentso ta asamüh yangji süne? 10Ni naiuso amao Levihai apem nou nung asuhat taim naiuso loüh asamüh meson chhisiya lüko loha ao koweji! 11Tilai asamüh Aron thako namnam, nung ni naiuso ahoisoüh khengshitsün atsüoting Apaou thako noin.”

12Nungai Mosaüh Datan naiuso Abiram ne jonao hong, lüko ngüsoüh ngiom, “Sam tsüshi-e! 13Ni sam Ijip gohtsa goumchi ainou sam nung liutsa nai loatao niasantsün nou tsüsaiu süne! Ni loüh sam khako Apaou theshi-e süne! 14Loüh ni nyaokhiam naiuso liukhiam tsangkü noitsün goumchi ai sam nialokü tsüshi, tsüdekünai sam hau eiu tsüdekünai eiu tengkam kamao tsükiu, naiuso ni lo sam kausaiat ao koweji.Sam tsüsunge!”

15Mosa mongmat sungkü Apaou tü ngiom, “Nungsoüh kankü shitsün chaithio titso lalo. Ngo ngüso thako sau tü tsümeikü tsüchhi; naiuso ngo ngüso gado tsaktso tsülo.”

16Mosaüh Kora tü ngiom, “Lühom ni naiuso niko hatsün khaiunia 250 nouso titilünou Apaou Nejenkhio nai shiao noin, Aron lüko nungko noi-e. 17Asam khaiunia pungkü nou sonlak nai angan nyamtsün thiokü alo, küta nung amthang nai kiuwane.” 18Nungtiphe ngüso khaiunia pungkü nou meshen sonlak lo, nungko inthio naiuso angan nyamtsün thio, naiuso Nejenkhio bekhan nai Mosa si Aron neko hakü tsakü noiküla. 19Nungai Koraüh hoikam thum kamshi-in, naiuso ngüso Nejenkhio bekhan nai Mosa si Aron netü kha seilutkü tsakü noiküla. Alekta hoikam athum khako Apaou hatsün ajinka awon nou thsalut kü sungh, 20nungai Apaou nou Mosa si Aron netü ngiom, 21“Nung khaiunia nouso ainou soikü tsakü anoi, küta ngo ngüso loting mowani-e.”

22Lüko Mosa si Aron neüh ngüne kha gohai kauthio küta ngiom, “O Goa, ni khaiuniathso aa apem chet- santsün noin. Tilai khaiunia tsaküh angei sunhe-e, nungai nung hoikam athum tü ni mongmat sunge süne?”

23Apaou nou Mosa tü ngiom, 24“Khaiuniahoi nou tü Kora si Datan naiuso Abiram so nejenkhio dongko nou asoian ta lüngio.”

25Nungai Mosa Israel ahei hoi nouso hakü Datan naiuso Abiram dongai khu. 26Apaüh khaiuniahoi nou tü ngiom, “Nung akausai khaiuniahoi nejenkhio ainou soikü atsa naiuso jengtsaiu titatso lathantan. Thantan naito, asam lüko ngüso angei shioko ngüso ko aikü moisemkü mowane.” 27Nungtiphe ngüso Kora si Datan naiuso Abiram so nejenkhio ainou soikü khuwan.

Datan si Abiram ne ngüne tsam- mongnyiu naiuso thsoso hakü ngüso nejenkhio bekhan dongko kingchiai shiküta tsakü noi. 28Mosaüh khaiuniahoi nou tü ngiom, “Nung chhisiya apem ngo jüchija cholotsün tsüde, lüko Apaou nou hong ta asamüh nge-e. 29Nung khaiunia nouso Goa ainou tso angja tsühakü elun e naito, naito, Apaou nou ngü tsühong. 30Lüko tsüludekü nou chhisiya Apaou nou ajantso chhi nai, naiuso goh nou pai an küta ngüso ko ngüsoüh taiutsün apem hakü miolian nai, küta ngüso eantsün goumchi nai aa napan nai, asamüh nung khaiuniahoi nou Apaou nou tsüthalokü nanan ta ngela-e.”

31Apa ngio chitekhem kü thunkü, Datan naiuso Abiram thakü goh nou pai an 32küta ngüso tsammongso Kora hoiko ngüso tengkam apem mioliküwan. 33Nungtiphe ngüso eantsün goumchi nai ngüso tengkam hakü aa noikü napan. Goh nou ngüso khütha nai waokü shikü nungko ngüso mowan. 34Israel hai nungko noitsünsoüh tilai ngüso shaptsün lula, ngüso hatatkü khuwan.Nungai ngüsoüh lüko nungti wekü ngiom, “Lükhaolao! Goum nou sam lüko mioliane.”

35Nungai Apaou ainou in tsak hongkü angannyam chaithio kiutsün khaiunia 250 nouso apem chethean.

Sonlak nouso

36Nungai Apaou nou Mosa tü ngiom, 37“Meson Aron thso Eleazar tü achetheantsün khaiuniahoi ainou taoson lung lakpai ainou apoitaiu nouso naiuso inthio nouso loküta nung lusokpeng ta lüngio, tiautenai nung inthio nouso asio noin. 38Tilai ngüsoüh nung Apaou amthang nai thio, nungai nung asio iula. Nung- tiphe sauhai mowankü noin nung khaiunia nouso sonlak ngüso angei thaiuthako alo, küta nungüh chio matchaikü ashan shi, naiuso nung amthang thaiutha akapjeiao athe. Nung Israel khaiunia thaiutha alotsüoau tsak noi-e.” 39Nungtiphe meson Eleazarüh sonlak nou loküta nelangkü thiopek naiuso nungüh chio amatchai tsak shan, nung amthang kapjeitsün akap tsak noiküla. 40Aron thsoso tsüdekünaito, amthang nai angan nyamtsün jahkü amkham kiuao sau tsüshi-e ta Israel hai thaiutha alotsüo tsak noiküla. Meson kau ainou tsüdekü shinaito, apa lüko Kora ko apa khaiuniaso hakü lomowantsün khekkü mowane. Nung chhisiya apem Apaou nou Mosa tsangkü Eleazar tü thoiluttsünli, chhikü noiküla.

Aronüh Khaiuniahoi Kipsanji

41Nungthan ajekhaiu hoikam athum nou Mosa si Aron ne tü namnamkü ngiom, “Asamüh Apaou khaiunia ajantso loataniu.” 42Mosa naiuso Aron tü khengshiao ngüso apem kamshikü phiai ngüso kha Nejenkhio dongai sheishi nai nung thengmia nou loijei kü ep, küta Apaou hatsün ajinka awon nou sungh!. 43Nungai Mosa si Aron ne khukü Nejenkhio khako tsakü noiküla, 44naiuso Apaou nou Mosa tü ngiom, 45“nung khaiunia nouso ainou phiai soikü atsa, naiuso ngo ngüso nungkolu lomowane!”

Nung ngio lula nai Mosa si Aron ne nemthso kha gohai thaothiokü kaukü nap, 46naiuso Mosaüh Aron tü ngiom, “Asonlak lülo, amthang ainou nungko inthio nou lüthio, naiuso inthio chiai angan nyamkü jahtsün intso lülolut. Küta nung lokü ngüso thaiutha alosio amkham kiuao liukü lükhu, tiautenai imkia tsak nou tsalowaniu.”

47Aronüh angiotsün angkü, apa sonlak loküta khaiuniahoi kamshikü noitsün mongai kopkü nap. Tilai apaüh imkia nou yalowankü ep, apaüh inthio chinai angannyam jah- tsün lolut küta khaiuniahoi thaiutha alosio amkham shan. 48Nung chhi nou imkia lolao, naiuso apa e si aa jetko tsakü noi. 49Koraüh kheng- shitsün taoko eantsünso tsüwehakü, khaiuniahoi eantsün haove apem kamko nai 14, 700 noiküla. 50Tilai imkia nou laolo, Aron Nejenkhio bekhan nai Mosa dongai laokü shi.

ASIO THSAMLAI

©2005 Bible Society of India

More Info | Version Index