Search form

Haove 17

Aron ün Pailai

1Apaou nou Mosa tü ngiom, 2“Israelhai kau pungkü ahei tsak tsak ainou Pailai chekü nime ni hau akiu ta lüngio. Khaiunia pungkü nian apa pailai tü lüsatlut 3naiuso Pailai nou tü Levi kau liko Aron nian lüsat. Kau ahei pungkü thaiutha Pailai tsak tsak noi-e. 4Nungso Ngü noitsün Nejenkhio nai kankü lükhu, küta tilai ngo niko epeji nung Athalou-e Paidan khako lütaiu. 5Nungai Ngo chosantsün khaiunia nou Pailai da asun nyimsane. Nungti ngo asam thako Israel haiüh asaita namnamtsün lolaoao nung thio-e.”

6Nungti Mosaüh Israelhai hau chite, naiuso kau pungkü aheihoi nou apa hau Pailai tsak tsak kiu, nung kau pungkü Pailai tsak tsak, apem nai Pailai chekü nime, naiuso Aron Pailai lüko nungko taiuha. 7Nungai Mosaüh nung Pailai nouso apem Nejenkhio nai Apaou Athalou-e Paidan khako taiukiu. 8Nungthan ajekhaiu nai, tilai Mosa Nejenkhio nai nap, apaüh Levi kau liko taiutsün Aron Pailai tü asun sungankü ep. Ajong nou poku, apun nou punkü, naiuso almond shep semankü eiusankü ep! 9Mosaüh Pailai apem lokü Israelhai hau han, nungko ngüsoüh ti shithawao nung ep, naiuso ahei pungkü nou meshen Pailai laokü lo. 10Apaou nou Mosa tü ngiom, “Aron Pailai Athalou-e Paidan khako laokü lületaiu. Nung Israelhai ngüso akhengshi nou tsülaokülu naito, ngüso eane ta akhengshitsünso lotsüoao tsak taiukü noin.” 11Mosaüh Apaou nou thoiluttsünli chhikü noiküla.

12Israel haiüh Mosa tü ngiom, “Naito, sam thaiutha nungko yang- külu athunan! 13Nejenkhio shimkü khaiunia ajantso shi nai, eane tünaito, nungaito sam apem amowanhai tübao meitsokü noi-e!”

ASIO THSAMLAI

©2005 Bible Society of India

More Info | Version Index