Search form

Haove 22

Moab Nokpaoüh Balam Dongai Hongji

1Israelhai tsalokü khuküta Yeriko tü lalutkü noitsün ajepek Yordan nai Moab Tsamei nousoko nejenkhio lahkü noi.

2Tilai Moab nokpao Zippor thso Balaküh Israel haiüh Amorhai tü ti chhin, naiuso nungai Israelhai khaiunia titso noiküla nung lula, 3nungai apa naiuso apa khaiuniaso apem hattat. 4Moab haiüh Midian aheihoi nouso tü ngiom, “Jangtso- pong nou khenglio thsanyan hean- tsün khekkü, nung hoi asong nou sam lemkü alum shakta lotheane.” 5Nungtiphe Balak nokpaoüh Peor thso Balam sau Eufrates Haiu shimkü Amaw goumchi nai noiküla apa dongai ngiongem kantsünso hong. Ngüsoüh apa dongai Balak ainou ngiongem nung kankü shin: “Mele tsak athum Ijip ainou shikü nung khaiunia nouso alumai peng- küta sam goumchi lowanao lohatkü kankeiji ta ngo ni hau nge-iao aiuji. 6Ngüso mepem haove nou sam khengai noin, nungtiphe tsüojin- yangkü ashi küta jü thaiutha ngüso khako athesan tsak ataiukiu. Naito tsüngean, samüh ngüso sam goumchi ainou komankü shiolo-e sao. Tilai ni khaiuniahoi tü ouk velute, khaiunia nouso ouk kiuji, naiuso tilai ni athesan velute ngüso athesan khemai noiji ta ngo ngeji.”

7Nungtiphe Moabhai naiuso Midianhai aheihoi nou athesan kiutsün thaiutha athamao amai lokü Balam dongai khu, küta apa hau Balak ainou ngiongem nge-in. 8Balamüh ngüso tü ngiom, “Lüsoh nungai anoian, küta Apaou nou ngü tü tilüsong ngio-e ngo nung asam tü lühom ngio kiu-e.” Nungtiphe Moabhai aheihoi nouso Balam ko shaman.

9Goa nou Balam dongai shiküta sang, “Niko noihatsün nung khaiunia nouso sauhai?”

10Apaüh thalakü ngiom, “Moab nokpao Balaküh ngüso ngü hao chiteao hong- 11nung Ijip ainou shitsün khaiuniahoi nou nung goumchi meankü khu-iu. Apaüh ngüsoko ehli küta apa goumchi ainou ngüso koman ao apa thaiutha ngü ngüso thako athesan kiuao aiuji.”

12Goa nou Balam tü ngiom, “Nung khaiunia nouso ko lakhuha, naiuso Israel thako athesan nou lakiu, tiautenai ngüso tü jü ouk noin.”

13Nungthan nyap nai Balam ngiongem kantsünso dongai khukü ngiom, “Asam tsamai laokü lükhu; Apaou nou ngü asam ko khuha-iao tsümongchio.” 14Nungtiphe ngüso Balak dongai laokü shiküta Balam ngüso ko khuha ao tsümongchio ta chiten.

15Nungtiphe Balaküh chonghoi nouso ahei chiai phopkü loüh aheihoi asong atengting nouso hongshin. 16Ngüso Balam dongai khuküta apa hau Balak ainou nung ngiongem kium: “Tsüojinyangkü ni jüdongai shitsün ainou tiüh lalolao! 17Ngo ni hau amai meikü kiu-e, naiuso ni ti ngioji nung chhi-e. Tsüojinyangkü shiküta jü thaiutha ko nung khaiunia nouso athesan lükiu.”

18Lüko Balamüh thalakü ngiom, “Balaküh apa tsam ainou tangkason naiuso chaiou lakkeng ngü hao apem kiu lüko, ehentso chhisiya nai lüko jü Apaou Goaüh thoiluttsün ngo angio tsüangkü theao tsüshio. 19Lüko nung thaiuko amao nousoüh chhikü shitsünli, tsüojinyang kü lüsoh ashaman, nungaito ngü hao Apaou nou loüh chiteshiao noishi süne tsünoishi nung ngo ngela-e.”

20Nungsoh nai Goa nou Balam dongai shiküta ngiom, “Nung kha- iunia nouso shikü ni tü ngüsoko khuha ao sang naito, akhuha ao lükhemlo, lüko ngo ni tü ti chite-e nunglu lüchhi.” 21Nungtiphe nung- than nyap nai Balam apa gado chiai moknoikü Moab ainou shitsün aheihoi nouso ko khuha.

Balam naiuso Apa Gado

22Balam khutsün ko Goa mongmatkü noiküla, Balam apa gado chiai noikü apa tsamkei nimeüh lamthiokü khutsün taoko, Apaou hongthon nou apa khutsün kiapao yamko tsakü noiküla. 23Tilai gado nou hongthon nou salaiu tsak semkü tsakü noitsün ep, apaüh nung yam leanküta eiu ai khuau kha phokle, Balamüh gado nou tü shiuh küta yamkheng nai nialokü shin. 24Nungai sainaoshep eiu nime jetko yam atsotsan nai tisübao yamkok nemtso ai lungpe noiküla nungko hongthon nou tsakü noi. 25Tilai gado nou nung hongthon nou ep, nungai lungpe nou dongai khukü nung lungpe nou Balam hok ai thio, nungtiphe Balamüh apa gado tü shiuh. 26Loüh jam hongthon nou kha ai khuküta yankü khuao tsüshiokü noitsün aojen yam tsak ko apa tsakü noi. 27Nung taoko gado nou hongthon ep nai apa saian. Nungai Balam mongmat sungkü apa gado tü pailai nou shiuh ao yalo. 28Nungai Apaou nou gado hau ngiosingio ao oukong kiukü Balam tü ngiom, “Ngo ni tü ti chhikü noin? Ni nungühto samjam ngoikü ngü tü tiauta shiuhji?”

29Balamüh thalakü ngiom, “Tiau- tenai ni ngo tsüvesan! Jüphako salaiu tsak taiukü thatünto, ngo ni loatela.”

30Gado nou thalakü ngiom, “Ni aakihlaiu thumkü moknoitsün ngo nung gadolu tsüde süne? Nung khako ngo ni tü nungti kankeikü shin süne?”

Apaüh “Tsüde,” ta thalan.

31Nungai Apaou nou Balam hau hongthon nou apa salaiu semkü tsakü noitsün epi; nungko Balam gohai kha thaothiokü loian. 32Hongthon nou apa tü sang, “Tiauta ni agado tü samjam ngoikü shiuh keikü kankei? Ngo ayam kiapao thaiutha shin, tiautenai ni nung süme nou tsü-iu ao noin. 33Lüko agadoüh ngü epküta samjam soikü noiküla. Nungti tsüdetünto ngo ni loatküta agado poi-ela.”

34Balamüh thalakü ngiom, “Ngo angei nou sunhe-iu. Ni yamko ngo kiapao noin ta ngo tsüngekü noiküla, lüko lo, ngo khuau ayam tsünoi ta ni yang naito, ngo tsamai laokü shi-e.”

35Lüko hongthon nou ngiom, “Nung khaiunia nousoko lükhuha, lüko ngo ni tü ti lüngio ta ngiom, nunglu lüngio.” Nungtiphe Balam ngüso ko aikü khuha.

Balaküh Balam Monglingkü louji

36Tilai Balaküh Balam shitsün lula, apa Moab elung Arnon Haiukok Ar noknio ko apako pheteao shin. 37Balaküh apa tü ngiom, “Ngo adongai chongting hongtsün taoko ni tiauta tsüshi? Ngo ni hau paopei saiukü kiuao tsüshio-e ta ni yang süne?”

38Balamüh thalakü ngiom, “Ngo shi-iu, ngo tsüshi süne? Lüko lo ngo ti oukong taim. Ngü tü Goa nou ti chiteao ngio-e, nunglu ngo chiteao shio-e.” 39Nungtiphe Balam, Balak ko Huzod noksongai khu, 40Nungai Balaküh jangtso naiuso onnemok loatküta Balam naiuso apa ko hakü noitsün aheihoi hau eheao nyih ajantso kium.

Balam ün Chongting Khapiam Ngio

41Nungthan nyap Balaküh Balam Israelhai apaitso epao shiokü noitsün Bamot Baal nai nialokü sungh.

ASIO THSAMLAI

©2005 Bible Society of India

More Info | Version Index