Search form

Haove 23

1Apaüh Balak tü ngiom, “Jü thaiutha nungko amthang chinyat ashan naiuso jüdongai jangtsopong chinyat naiuso onnemokpong chinyat kankü ashi.”

2Balaküh apa tü ngiotsünli chhin, naiuso apa si Balam neüh jang- tsopong tsak naiuso onnemokpong tsak ta amthang pungkü amkham kiu. 3Nungai Balamüh Balak tü ngiom, “Ni nou ajahtsün amkham chaithio dongko tsakü anoi, nungai ngo khukü Apaou ngüko phete-e süne tsüphete-e ta lou-e. Apaüh ngü tü tilüsong atsangshei hane ngü nung ni hau chite-e.” Nungtiphe apa pemsa kingson nai sungh, 4naiuso nungai Goa apa ko pheten. Balamüh Apa tü ngiom, “Ngo amthang chinyat shanküta jangtsopong tsak naiuso onnemokpong tsak ta nung pungkü chaithio kiu-iu.”

5Apaou nou Balam hau Balak tü ti ngio-e nung chiten, küta apa Balak dongai laokü khukü ngiongem kiuao hong. 6Apa laokü khunai Balak losaokü ajahtsün chaithio amkham dongko Moabhai aheihoi apem hakü tsakü noikü ep.

7Balamüh nung khapiam ngio nouso ngiosan:

“Moab nokpao Balaküh ngü nialokü shin

Siria ainou naiuso ajepek king nouso ainou.

‘Shiküta jü thaiutha achite’ ta apaüh ngiom.

Israelhai thako athesan tsak ataiu!

8Goa nou athesan tsükiukü ngo titi athesan kiu-e,

tsüdekünai Goa nou tsüngiokün ngo titi alekkat ngio ngio-e?

9Lung atsok nouso ainou ngo ngüso epao shioji;

king nouso ainou ngo ngüsotü thapao shioji.

Ngüso mele chija kihtsün mele tsak noin;

amao mele nouso chiai ngüso ouk ta ngüsoüh ngeji.

10Israel thsaosithsoso to pukhao khekkü noin-

ngüso haove ao thatü piakü noin.

Goa khaiuniahoi tsakli ngü jü ajekhaiu thonane;

Ngo asio khaiuniali aalo nai eane.”

11Nungai Balaküh Balam tü ngiom, “Ni ngü tü ti chhin? Ngo ni nungai jü ehoiso athesan kiu-iao nialokü shin,

lüko ni chhitsün apem ngüso ouk kiu.”

12Apaüh thalakü ngiom, “Apaou nou ngü tü ti lüngio ta ngiom, nunglu ngo ngioau shioji.”

Balam ün Khapiam Ngio Müjam nou

13Nungai Balaküh Balam tü ngiom, “Athang amao tsakai tiai ni Israelhai ajantsolu epao shioji nung athang ai ni ngüko hakü ashi. Nungko noikü jü thaiutha ko ngüso athesan akiu.” 14Apaüh Zofim tsamei Pisga kingson nai niakü sungh. Nungai lüko apaüh amthang chinyat shankü jangtsopong tsak naiuso onnemok apong tsak ta nung pungkü chaithio kiu.

15Balamüh Balak tü ngiom, “Nungko ni nou ajahtsün chaithio dongko anoi, küta ngo Goa ko nungai khukü phete.”

16Apaou nou Balam ko phete küta ti ngio-e nung apa ko chite, naiuso apa Balak dongai nung apa ngiongem kiuao laokü hongshi. 17Nungtiphe apa laokü shi, naiuso nung atao sao- kü Balak apa ün ajahtsün chaithio dongko Moabhai aheihoi hakü tsakü noikü ep, nungai Balaküh Apaou nou ti ngiom ta apa tü sang,

18nai Balamüh nung khapiam ngio chitesan:

“Zippor thso Balak ashi,

naiuso ngo ti ngio-e nungtü anglu.

19Goa to khaiuniali yaang tsandetsün tsüde,

Apa to mongyang li-etsün khaiunia tsak tsüde.

Tilüsong apaüh thalou-e, apaüh chhiji;

Apaüh chiteji, naiuso nung chhianji.

20Ngo tü ouk kiuao thaiutha ayam han

Naiuso tilai Goa nou ouk kiu-e,

ngo nung lolao au tsüshio.

21Ngo Israelhai ashiao nou aküo epji nungüh apa hau aküothe,

naiuso angja tsükanjikan kiu-e.

Ngüso Goa Apaou nou ngüso ko hakü noin;

Ngüsoüh apa ngüso nokpao ta veji.

22Goa nou ngüso Ijip ainou niasan;

Mothasanglokün jangtsopong tsak khekkü apa ngüsoko hakü ehli li-e.

23Tiautenai Yakob thako athesan ngio tsünoi,

naiuso Israel thako khapiam ngio tsünoi.

Lo khaiuniahoi nou Israel thaiutha ngio-e,

‘Athaplu, Goa nou ti in chhin!’

24Israel mele to chongkhao oukong tsak khekkü noin;

Nelangkü mochipekkün lektso nung aalo tsünoiji.

Apaüh loat nouso she moshiukün lektso nung aalo tsünoiji.”

25Nungai Balaküh Balam tü ngiom, “Ni Israel khaiunia athesan kiuao tsümongchio, lüko ngüso ouk to la ouk kiu!”

26Balamüh thalakü ngiom, “Ngo Apaou nou ngü tü chitetsün alum chhi-e ta ni hau tsüchite süne?”

Balam ün Khapiam Ngio Samjam nou

27Balaküh ngiom, “Ngü ko ashi, küta ngo ni athang amao tsakai nialokü khu-e. Tsüngean jü thaiutha ni nungai noiküta Goa nou ngüso tü athesan kiu-iao mongchiokü noiao shio-e.” 28Nungtiphe apaüh Balam Peor Kingson nai singtso goh yankü thapao nialokü khu. 29Balamüh apa tü ngiom, “Nungko jü thaiutha amthang chinyat ashan küta ngü hao jangtsopong chinyat naiuso onnemok chinyat kankü ashi.”

30Balaküh apa tü ngiotsünli chhin, naiuso jangtsopong tsak naiuso onnemokpong tsak ta amthang pungkü chaithio kiu.

ASIO THSAMLAI

©2005 Bible Society of India

More Info | Version Index