Search form

Haove 24

1Lo taoko Balamüh Apaou nou apa hau Israel khaiunia ouk kiu-iao aiuji ta ngekü iula, nungtiphe apaüh nung khako athatlu ngio yamkü khutsünli tsükhushi. Apa singtso goh dongai phoklekü khu,

2naiuso Israelhai kaukau ta lingkü saotaiu nou ep.

Goa Onthso nou apa mean,

3küta apaüh nung khapiam ngio nou ngiom:

“Beor thso Balam ün ngiongem,

Thsümonkü noitsün khaiunia nou ngioji:

4Goa ngio sauüh lulaji, apaüh ngioji,

sauüh Apemshiotsün ajeiaikam epji,

kaukü napkü lüko niovei tsümaishikü.

5Israelhai nejenkhio nouso alengmei noin.

6Mepai alaiu nouso khekkü,

tsüdekünai haiusai nai noitsün aimong nouso khekkü,

Apaou tsangkü thomtsün Aloe pai khekkü,

tsüdekünai haiusai cedar pai nouso khekkü.

7Ngüsoüh ah uo saiukü eppe naiuso ngüso chihle khiamle

goh paithsao nai kihtsün khekkü,

ngüso nokpao Agag tü songkü noi-e,

naiuso nokshing atheng atham losunge.

8Goa nou ngüso Ijip ainou niasan,

Apa mothatsangkün jangtsopong khekkü

ngüso thaiutha ehli liheji.

Ngüsoüh ngüso ehso chipek,

ngüso uo nouso sutne-e

naiuso ngüso uokop pai nouso longekke.

9Nung mele chongkhao akong tsak khekkü noin;

tilai nung saiane khaiunia sauüh apa lothsümonao tsüsom.

Sauhaiüh Israel ouk kiuji, ngüso ouk kiu-e,

naiuso sauhaiüh Israel athesan kiuji,

ngüso athesan kiu-e.”

10Nungai Balak Balam thako mongmat sungküta Balam tü ngiom, “Ngo ni jü ehoi athesan kiuao jon, lüko lo nouto ni ngüso bao samjam ngoikü ouk kiuwaniu. 11Nungtiphe ni, lo atsamai lükhuwan! Ngo nih au amai kiuao thalo, lüko amai epao Goa nou ni lolaokü wan.”

12Balamüh thalakü ngiom, “Ni jüdongai ngiongem kantsünso ta ngo ngio-iu 13ni ngü hau atsamai nou tangkasan tsudekünai chaiou lak- keng apem kiu lüko, ngo jüchija chhitsün tsangkü Apaou nou thoi- luttsün tsüchhikü noianao tsüshio, Apaou nou ngü tü ti lüngio ta ngio-e, nunglu ngo ngio-e.”

Balam ün Khapiam Ngio Athon nouso

14Balamüh Balak tü ngiom, “Lo ngo jü khaiuniaso dongai laokü khuji, lüko ngo khuau nou khako, akhaiunia so tü Israel haiüh ti chhi-e nung ngo ni tü lotsüoji.” 15Nungai apaüh khapiam ngio nung ngiom:

“Beor thso Balam ün ngiongem,

Thsümonkü noitsün khaiunia nou ngioji,

16Goa ngio sauüh lulaji, apaüh ngioji-

Naiuso Akhengting mongyang ngetsün nou ngioji,

Sauüh Apemshiotsün ajekhaiu epji

Kaukü napkü lüko niovei tsümaishikü.

17Ngo ashiao nou tü luji naiuso ngo Israel mele epji.

Nokpao tsak awon kianthsüo tsak khekkü,

nung mele ainou sunge.

Israel ainou apa nokpao pailai tsak khekkü shi-e.

Apaüh Moabhai aheihoi tü shiuh-e

Naiuso Set hai apem shiuh thiokü wane.

18Edom nai apaüh meshen ehso shiolo-e.

Naiuso ngüso goumchi apa jengtsaiu au theane,

Israel haiüh ashiolotsün tsülao-e.

19Israel mele nousoüh ngüso ngamthio-e

naiuso moisemkü soimokü wane.”

20Nungai apa atsangshei nai Balamüh

Amalek hai epküta nung khapiam ngio ngiom:

“Apem chiko Amalek mele thatü akongting noiküla,

Lüko athon nai nung asaita hau mowane.”

21Apa atsangshei nai apaüh Ken hai ep,

naiuso nung khapiam ngio nou ngiom:

“Ni noitsün athang aalo noin,

Nung waio ap nouso ongai tsokkü shankü taim,

22Lüko asam Ken hai mowane

Asiria haiüh asam ngüso sua ao theane.”

23Balamüh nung khapiam ngio ngiom:

“Ajenapki nai kamshitsün khaiuniahoi nungso sauhai noin?

24A-oulowantsünso Kupra ainou shi-e,

ngüsoüh Asiria naiuso Eber shiolowane.

Lüko phokleshikü ngüso athon tsüyangkü hau mowane.”

25Nungai Balam khemloküta apa tsamai laokü khuwan naiuso Balak apa yamai khuwan.

ASIO THSAMLAI

©2005 Bible Society of India

More Info | Version Index