Search form

Haove 27

Zelofehad Menyiuthso nouso

1Nungai Yosep thso Manase kau ainou Makir naiuso thsao nou Gilead thso Hefer, apa thso Zelofehad ün menyiuthsoso-Mahla, Noah, Hokla, Milka, naiuso Tirza noiküla. 2Ngüso khukü Mosa, meson Eleazar, aheihoi, naiuso hoikam athum khako Apaou noitsün Nejen- khio bekhan dongko tsaküta ngiom, 3“Sam Po liutsa nai melothso tsaktso tsüsataiukiukü ean. Apa Kora sauüh Apaou thako khengshi apa sahoi mongko tsüha, tiautenai apa meshen angei shioko ean. 4Apa melothso tsühakü nou shioko to, tiauta sam Po nian Israel hai ngiolat ainou mowane? Sam hau sam Po deisinioso ongko tengkam akiu.”

5Mosaüh ngüso thaiutha Apaou khako kankü shin, 6naiuso Apaou nou apa tü ngiom, 7“Zelofehad menyiuthsosoüh ti kojaji nung thakü noin, ngüso hau ngüso Po deisinioso ongko tengkam lükiu. Apa tengkam ngüso hau lükami. 8Israelhai tü nung lüngio, tilai khaiunia tsak apa tengkamao melothso tsüsataiu kiukü eane, apa menyiuthso nou apa jengtsaiu teng kame. 9Apaüh me- nyiuthso lüko tsüsataiu kiukü naito, apa deisiniosoüh teng kame. 10Apa deisinioso tsünoikü naito, apa Po deisiniosoüh teng kame. 11Apa deisinio tsüdekünai posidei tsünoikü naito, apa pothso so ashimting nou teng kame, naiuso nung apa tengkhaiu jengtsaiuli kankei-e. Ngo, Apaou nou ni tü thoiluttsünli, Israel thsoso thaiutha nung asaita kankeitsün ngiokhem noi-e.”

Mosa Thangko Yihusua Cholo

(Ngiokhem 31:1-8)

12Apaou nou Mosa tü ngiom, “Abarim King chiai sungküta Ngo Israelhai hau kiutsün goumchi nou tü lüthaplu. 13Ni nung epküta adei Aronli ni lüko eane, 14tiautenai aje nemtsoüh Zin liutsa nai noi taoko Ngü thoiluttsün thako khengshi. Tilai hoikam athum nou Meriba nai Ngü thako namnamkü noiküla, nungai ajeüh jü oukong ngüso khako nianlom kiukü loksanao tsümong- chio.” (Meriba nung Zin liutsa Kades nai haiu noin.)

15Mosaüh misaokü ngiom, 16“Aa apem nyimsantsün Apaou Goa, ahoikamso onnemok ajimtsün tsünoikünhoi tsak khekkü tsütheao; 17hoitsak niakeiao montsün naiuso shiotsün khaiunia tsak athio ta ngo misaoji.”

18Apaou nou Mosa tü ngiom, “Nun thso Yihusua sau tü chhisiya shioau onthso noin, ni apa lülo küta apa khaiu da apha lüthanglut. 19Apa meson Eleazar naiuso hoikam athum khako tsakü anoi-i, küta nungko khaiunia chikü nou achhikam thangko cholotsün ta apa tü lüvelut. 20Israel hoikam athum nou apa ngio angao, apa hau ni nou oukong ajantso lükiu. 21Apa meson Eleazar khako tsa-e naiuso meson nou apa thaiutha Apaou khako Urim naiuso Thummim tsangkü janekiuao sange. Nungti Eleazarüh Yihusua naiuso Israel hoikam athum ngüso chhisiya apem nouko niakei-e.” 22Mosaüh Apaou nou apa tü thoiluttsünli chhikü noiküla. Apaüh Yihusua naiuso hoikam athum meson Eleazar khako tsakü noi-i. 23Apaou nou thoilut- tsünli, Mosaüh apa pha Yihusua khaiu ai thanglut küta apaüh apa thangko cholotsün ta velut.

ASIO THSAMLAI

©2005 Bible Society of India

More Info | Version Index