Search form

Haove 3

Aron Thsoso

1Apaou nou Mosa tü Sinai King ai chitetsün taoko Aron naiuso Mosa tsammongso nungti noiküla: 2Aron thsoso püle: ngüso ongko petche nou Nadab, Abihu, Eleazar, naiuso Itamar ta noiküla. 3Ngüso meson theao tsomkiu naiuso thumkü yathsüoau kiuwan, 4lüko Nadab si Abihu ne ngüneüh Sinai liutsa nai Apaou tü In chaithio tsüsiokü kiutsün taoko loatan. Ngüne tü thsohai mochetlutkü noiküla, nungtiphe Eleazar si Itamar neüh Aron aakih taoko meson ayathsüo chhili chhikü noiküla.

Levihoi Meson nouso yathsüoau taiukiu

5Apaou nou Mosa tü ngiom, 6“Levi kau shimkü nialokü ashi naiuso meson Aron yathsüoau ngüso lütaiukiu. 7Ngüsoüh Ngü noitsün Nejenkhio thaiutha apotsün chhisiya chhi-e, naiuso mesonhoi nouso si hoithum thaiutha chhikü noi-e. 8Ngüsoüh Nejenkhio jengtsaiu apem khako paotsange naiuso Israel hai thaiutha chhisiya-e. 9Levi haiüh chhiau nou thsale nung Aron naiuso apa thsoso yathsüoau noiküla. 10Ni Aron naiuso apa thsoso meson chhisiya nou chhiao lüchosan, amao hai khaiunia ajantsoüh nung chhisiya chhiao kowe nai apa to loatkü wane.” 11Apaou nou Mosa tü ngiom, 12-13“Loto Levi hai Ngü nou noi-e.Tilai Ngo Ijip hai nioyamchong nouso apem loatan, Ngo Israel hai tsamkhaiu pungkü ainou melo thsoyamchong naiuso thainian chongting puntsün pungkü jühaoson theao losiokü wan.Israel hai melothso yamchong nouso jühaoson ta losiokü taiutsün liko loto, Levi hai Ngo nou noin; ngüso Ngü nou noi-e.Ngo Apaou nou noin.”

Levi hai Haove Loutsün

14Apaou nou Sinai liutsa ai nai Mosa tü thoilutkü ngiom, 15Levi hai kau kau naiuso pothso nai melothso pungkü alei tsak khengai nouso haove nai lüsatthio. 16Küta Mosaüh apa tü Apaou nou thoiluttsünli ngüso haove satlo. 17-20Levi thso melothso süme nouso Gershon, Kohat naiuso Merari noiküla; nung ngüso nianphi niantsün kau nouso paosiposo ngüso noin. Gershon thso melothso nime- Libni si Shimei ne noiküla, Kohat thso melothso püle-Amram, Izhar, Hebron naiuso Uzziel noiküla, naiuso Merari thso melothso nime-Mahli naiuso Mushi ne noiküla.Ngüso pothso ko kau nian nianlokü shitsün nung paosipo nou ngüso noiküla.

21Gershon kau nouso nung Libni naiuso Shimei pothsoso hoi-ekü noiküla. 22Melothso alei tsak naiuso nung khengai nouso sauhai haove nai monglo, nungso apem kamko nai mepem 7, 500 noiküla.

23-24Nung kau nai Lael thso Eliasap akhengting ahei thekü Nejenkhio phiai ngüso saothang shanlo. 25Ngüso chhisiya thsale nung Nejenkhio, nung sapoktsün ne, achiai si akhei ai nouso, bekhan nai khongjeitsün ne, Nejenkhio lemkü khongjeitsün naiuso amthang, naiuso nung mongai naptsün bekhan khongjeitsün ne, 26Nejenkhio lemkü khongjeitsün naiuso amthang, naiuso nung mongai naptsün bekhan khongjeitsün ne, ngüso nung chhisiya nouso tü sunkü noitsün ayathsüo- tsün chhisiya apem thaiutha thsale noiküla.

27Kohat kau nung Amram, Izhar, Hebron, naiuso Uzziel pothsoso hoi-ekü noiküla. 28Nung kau mongko melothso alei tsak naiuso nung khengai nouso sauhai haove nai vethiohaküla, ngüso apem kamko nai mepem 8, 600 noiküla. 29-30Uzziel thso Elizafan atengting nung kau nai ahei thekü, nung kau nou Nejenkhio ajepekki nai ngüso saothang shanlo. 31Ngüso chhisiya thsale nung: Athalou-e Paidan thaiutha, puo thaiutha, tson taiutsün thaiutha, amthang nouso thaiutha, AsioThang nai mesonhoi nou kankeitsün chiosilak thaiutha, naiuso thatü Asio Thang nai naptsün koukhan khongjeitsün ne thaiutha noiküla. Ngüso nung chhisiya nouso tü sunkü noitsün ayathsüotsün apem thaiutha thsale noiküla.

32Levi kau mongko atengting nou meson Aron thso Eleazar noiküla. Apa chhisiya nung AsioThang nai chhitsün tü paotsangao noiküla.

33Merari kau nung Mahli naiuso Mushi pothsoso hoi-ekü noiküla. 34Nung kau mongko melothso alei tsak naiuso nung khengai nouso sauhai haove nai wethioha, apem kamko nai mepem 6, 200 noiküla. 35Nung kau nai ahei Abihail thso Zuriel thekü, nung kau nou ngüso saothang Nejenkhio ajenapki nai shanlo. 36Ngüso chhisiya thsale nung: Nejenkhio athanya nouso thaiutha, süon nouso thaiutha, kheam nouso thaiutha, anoilutao nou thaiutha, naiuso nungso apem waokü jippeao thaiutha kiu.Ngüso hau nungso chhisiya yathsüotsün au ai in pungkü thaiutha ko thsale kiu. 37Ngüso hau loüh kheam nouso nung noiluttsün, pai ehen nouso, naiuso kam nai achiai lopoktsün thaiutha thsale kiu.

38Mosa si Aron naiuso apa thsosoüh to Nejenkhio khako ajepek nai shinkü ngüso saothang shan. Ngüso tü Israel khaiunia thaiutha AsioThang nai chhisiyatsün kankü khuau thsale thoilut. Khaiunia ajantsoüh ngüsoli chhisiya ha au kowe nai apa to loatkü wanao noin. 39Apaou nou thoiluttsün tsangkü Mosaüh Levi hai melothso alei tsak ainou nung khengai kau kau tsangkü haove nai mongthio hatsün apem kamko nai mepem 22, 000 noiküla.

Melothso Yamchong nouso Thangko Levihoi

40-41Apaou nou Mosa tü ngiom, “Israelhai melothso yamchong apem jü haoson noin. Nungtiphe Israelhai thso melothso yamchong pungkü pon tsak ainou nung kheng ai nouso lüsatlo.Lüko nungso thangko Levihai thso apem Ngü nou ta Ngo loji! Ngo APAOU nou noin! Naiuso Israelthsoso ün chongting puntsün tsam thainian thangko Levihai ünchongting puntsün tsam thainian apem alo.” 42Mosaüh angiotsün angkü, tsam thainian chongting puntsün apong 43apem alei tsak nai nou nung khengai nouso satlo, küta nungso apem kamko nai 22, 273 noiküla.

44Apaou nou Mosa tü ngiom, 45“Lo Israelhai melothso yamchong nouso apem thangko Levihai thso Ngü nou ta lülosio, naiuso Israelhai tsam thainian chong ting puntsün thangko Levihai tsam thainian lülosio. 46Israelhai thso yamchong haove 273 nou Levihai thso yamchong haove nou shela anphe, ni melothso aphop nouso laokü tuhshiao noin. 47Apem chaithat tsangkü methso nai tangkason pungongo lükiu, 48küta nung chai nou Aron naiuso apa thsoso hau lükiu.” 49Mosaüh angiotsün angkü nung chhin, 50küta tangkason 1, 365 loküta, 51nung Aron naiuso apa thsoso hau kiuwan.

ASIO THSAMLAI

©2005 Bible Society of India

More Info | Version Index