Search form

Haove 31

Midiahai thako Asio Ehli

1Apaou nou Mosa tü ngiom, 2“Midia haiüh Israelhai tü ti chhin nung thaiutha ni ngüso tü phaosan lüshan. Nung chhikütün phiai ni eane.”

3Nungtiphe Mosaüh khaiuniahoi nouso tü ngiom, “Ngüsoüh Apaou tü ti chhin, nung thaiutha asamüh Midiahai komhekü ngüso phaosanao asam ehli ao lükhemlo. 4Israel kau pungkü ainou ehli ao pohai mepem heng tsak tsak ahong.”

5Nungtiphe kau pungkü ainou khaiunia mepem heng tsak tsak chosan, apem kamko nai mepem heng chekü nime ngüso ehliao khemlokü taiu. 6Nungtiphe Mosaüh ngüso meson Eleazar thso nou Phinehas sauüh amkham tsam jengtsaiu nouso naiuso ii hanao thaiutha poipoi nouso chiai paotsangao noiküla apa ngiokhem ko ngüso ehli hong. 7Apaou nou Mosa tü thoiluttsünli ngüsoüh Midiahai koman, küta pohai apem loatkü wan, 8nungko Midiahai nokpao pungo: Evi, Rekem, Zur, Hur, naiuso Reba ngüso hakü loatan. Ngüsoüh Peor thso Balam lüko loatan.

9Israel haiüh Midiahai menyiuhoi, methsohoi, thalo, naiuso janghoi, onnemokhoi, naiuso jengtsaiu apem kamhean, 10naiuso ngüso noknio nouso naiuso nok nouso apem in nou jekthiowan. 11Ngüsoüh aketaiutsün khaiuniahoi, thainianhoi, naiuso jengtsaiu apem kamhe, 12küta Yeriko ainou Yordan yankü Moab tsamei nai asaothang ko noitsün Israel hoikam, Eleazar naiuso Mosa dongai ngüso kankü shin.

Süpaihoi Laokü Shiji

13Mosa naiuso Eleazar, naiuso amao hoikam ahei nouso apem süpaihoi ko pheteau asaothang nai khu. 14Ehli ainou laokü yatsünso ahoi, ahoi, tsom khaiuko aheihoi, si asonghoi nouso tü Mosa mongmatkü noiküla. 15Apaüh ngüso tü sangkü ngiom, “Tiauta asamüh menyiuhoi apem aa poikü taiuwan? 16Balamüh ayam hantsün tü hoiluttsün naiuso Peor nai khaiuniahoi nou Apaou tü mong tsülamkü nialokü khutsün nung menyiuhoi nou noiküla ta lüyangsan. Apaou khaiuniahoi khako imkia kankü shitsün nung noiküla. 17Nungtiphe lo melothso naiuso menyiuthsohoi apem sauhai shesinyih emetsün chhi nou chhiankü noin nungso apem lüloat; 18lüko asangting menyiuthsohoi naiuso menyiuhoi asam thaiutha hau aa poikü lütaiu. 19Asam sauhaiüh khaiunia loatkü noin naiuso meadang nou tü than tankü noin nungso ajekhaiu chinyatnyi thaiutha bechiai noi-ela. Samnyi nouko naiuso chinyatnyi nouko asam naiuso asamüh thalotsün menyiuhoi lülosiolo. 20Asamüh loüh neshe apem, nyihkhun nou shantsün apem, wonkoi nou shantsün jengtsaiu, tsüdekünai pai nou shantsün jengtsaiu, apem lülosiolo.”

21Meson Eleazarüh ehli ainou laokü yashitsün khaiuniahoi tü ngiom, “Apaou nou Mosa hau kiutaiutsün nung ngiokhem yam nouso noin. 22-23Acheteao tsüshiokün nungtin jengtsaiu: chaiou lakkeng, tangkason taoson lung son, sonkhiu, tsüdekünai akap nouso to in tha nai sakkü theküta losioao noin. Amao jengtsaiu nouso to khiam nou tsaowantsün tsangkü alosio chhi ao noin. 24Chinyatnyi nouko asamüh asam neshe nouso phetanela, nungphiai asam amkham yamko yanthsüokü noi-e naiuso asaothang nai napao ayam sopkiu-e.”

Jengtsaiu Thalotsün Janthatji

25Apaou nou Mosa tü ngiom, 26“Ni naiuso Eleazar, amao hoikam aheihoi ko hakü athalotsün jengtsaiu nouso naiuso aketaiuhoi naiuso thainianhoi nouso hakü alum ta veluao noin. 27Tilüsong jengtsaiu thalokü noin, nung haoson nime hau thekü wekü lüjanthat, haoson tsak nou süpaihoi hau, naiuso amao haoson tsak nou hoikam hau ta lüjanthat. 28Süpaihoi haoson ainou, Apaou thaiutha ake- taiuhoi tsom 500, nouko tsak liukim lülo, naiuso nunglilu janghoi, gadohoi, onnemokhoi, naiuso wonhoi ta lülo. 29Nungso Apaou hau amothi chaithio tsakli meson Eleazar hau lükiu. 30Khaiuniahoi hau kiutsün haoson ainou aketaiutsün khaiuniahoi aopungo pungkü nouko tsak, naiuso nung tsoithat lilu janghoi, gadohoi, onnemokhoi, naiuso wonhoi nouso ainou ta nungso sauhai Apaou Nejenkhio khako Apaou noin nung Levihoi hau lükiu.” 31Mosa naiuso Eleazar neüh Apaou nou ngüne tü ti thoilut nung chhikü noiküla.

32-35Süpaihoi nou ngüsoüh theao lotsün khengai, athalotsün jengtsaiu nouso lingsan künai nungti noin: Onnemok naiuso wonhoi=675, 000, janghoi=72, 000, gado=61, 000, naiuso menyiu asangting nouso=32, 000. 36-40Süpaihoi haoson jansantsün nungti=337, 500, onnemok naiuso won hoi nouko=675, nou APAOU hau liukim noiküla, 36, 000 jangtso nou süpaihoi thaiutha noiküla. Nungko 72, nouso APAOU hau liukim noiküla, gado=30, 500 nung süpaihoi haoson, nungko nou gado=61, nung APAOU hau liukim noiküla, naiuso asangting mesohoi=16, 000 nung süpaihoi haoson noiküla, nungko nou 32, nung APAOU hau liukim noiküla. 41Nungtiphe Mosaüh Apaou hau liukim nou amothi chaithio tsakli kiu.

42-46Hoikam thaiutha janthattsün haoson nou süpaihoi hau jankiutsün lilu noiküla: Onnemok naiuso wonhoi=337, 500, jangtso=36, 000, gadohoi=30, 500, naiuso asangting menyiuhoi=16, 000 noiküla. 47Nung haoson ainou Mosaüh aketaiuhoi naiuso thainianhoi aopungo pungkü ainou tsak loküta Apaou Nejenkhio khako paotsangtsün Levihoi sauhai noin ngüso hau kiu.

48Nungai süpai ahei asonghoi nouso Mosa dongai khu 49küta nung ngiongem chitekü ngiom, “Apaou, samüh sam ahei khemko süpaihoi nouso ta welu-iu, naiuso ngüso tsak- tso tsümowan. 50Nungtiphe samüh sam khaiunia pungkü nou lotsün chaiou lakkeng daosilak, khiap nouso, kongwoi nouso, khiapthso nouso, nuodao nouso, naiuso lak nouso kankü shiji. Apaüh sam kipsanao thaiutha sam aa liko amai tsakli nungso samüh Apaou hau chaithio kiuji.” 51Mosa naiuso Eleazar neüh nung daosilak ao iulakü noitsün chaiou lakkeng nouso lo. 52Asonghoi nou kiutsün apem kamko that nai, tsoi tsom nime thashimkü noiküla 53sauhai asonghoi tsüde, ngüsoüh jengtsaiu janthat lotsün tsükiuhakü taiuwan. 54Nungtiphe Apaou nou Israelhai kipsanao thaiutha Mosa si Eleazar neüh nung chaiou lakkeng loküta Nejenkhio nai kankü shin.

ASIO THSAMLAI

©2005 Bible Society of India

More Info | Version Index