Search form

Haove 32

Yordan Ajepek Etsai Kihtsün Mele nouso

(Ngiokhem 3:12-22)

1Reuben kau naiuso Gad kau nousoüh tsam thainian piakü nyiokü noiküla. Tilai ngüsoüh Jazer naiuso Gilead goumchi nung thainian thaiutha titi ameiting ta epsan, 2ngüso Mosa, Eleazar, naiuso amao hoikam aheihoi dongai khukü ngiom, 3-4“APAOU nou Israelhai tü anoijeiloau hachukü shitsün khiam- khan nungko noksong nouso: Atarod, Dibon, Jazer, Ninra, Hesbon, Eleale, Sibma, Nebo, naiuso Beon nungso thainian thaiutha goh amei noin, naiuso samüh thainian piakü taim. 5Ngüsoüh ngiom, tsüojinyangkü sam hau nung goumchi sam tengkamao akiu, sam Yordan Haiu yankü kihloau lakhu ha-i.”

6Mosaüh thalakü ngiom, “Asam meshen khaiunia Israelhai ehli khu nai asam nungko noi-e ta aiuji süne? 7Yordan yankü goumchi sübao Apaou nou asam hau kiutaim nungai khuau Israelhai kowetsün ainou monglohenao asamüh titi kowesomji? 8Tilai ngo Kades Barnea ainou goumchi kautha ao hong, nungai asam poüh lüko nungti chhikü noiküla. 9Ngüso Eskol tsamei saokü laiukü khuküta goumchi nou ep, lüko tilai ngüso laokü shishin, ngüsoüh Apaou nou ngüso hau kiutaiutsün goumchi nai naptsün ainou khaiuniahoi monghen-ikü noiküla. 10Nung ajekhaiu ko Apaou mongmat küta athalo tsak shan. 11‘Atsüoting ngo Abraham, Isak, naiuso Yakobso tü thalotsün goumchi nou, Ijip ainou shikhutsünso pon eknime naiuso nung khengai nousoüh to tsüepe; tiautenai ngüso jüphiai thumkü tsühoilut.’ 12Keni- zhai nou Jefune thso Kaleb naiuso Nun thso Yihusua netü simkü amaohai to jüphiai tsühoilut, lüko ngüne to jüphiai thumkü hoilut. 13Apaou khaiuniahoi nouko mong- matkü noiküla, naiuso apaüh ngüso liutsa nai apa tsümonglingitsün vetao athum moeankhemkün lektso ngüso liutsa nai tsakei-i. 14Naiuso lo asamüh asam poso noithang lo-iu, nung angei khaiuniahoi nouso vetao ayan nou loüh Israel khako Apaou mongmat sungtsün kanjikanao khemkü noin. 15Asam Reuben naiuso Gad kau nouso, asamüh lo apako hoilutao tsümongchiokü naito, apaüh lojam nung khaiuniahoi nouso apem liutsa nai leane, küta ngüso mowan- tsün thaiutha asam thsale noi-e.”

16Ngüsoüh Mosa dongai shimkü shikü ngiom, “Tsam thainian thaiutha samüh nungko tsam tsak lah-e, naiuso ehenhoi thaiutha nok- song nouso shanao sam hau ayam asopkiu. 17Lüko ngüso meshen kih- thang ai nialokü moshikün lektso, sam chija Israelhai thso khaai khuau sahsingio khemlokü noi-e, naiuso nung goumchi khaiuniahoi ainou kipsankü noiau sam thsoso samüh noksong pemongko noi-i-e. 18Samüh sam tsamai amao Israel thsosoüh ngüso haoson goumchi tengkam nai monoilokün lektso laokü tsükhu-e. 19Yordan etsai samüh ngüso ongko tengkam titso tsüloha-e, tiautenai samüh nungai Yordan ajepek nai sam haoson lowaniu.”

20Mosaüh thalakü ngiom, “Asamüh ti ngioji nung atsüoting ngioji tünaito, nungko Apaou khako ehli nai khuau lükhemlo. 21Asam ehli khaiuniahoi apemüh Yordan yanao noin naiuso Apaou ngiokhem khemko ngüsoüh sam ehoiso Apaou nou moshiolokün lektso lihe ao noin 22küta goumchi tengkam nou loau noin.Nungphiai asam laokü khuau shio-e, tiautenai asamüh Apaou nouko asam chhisiya thawao-iao naiuso meshen Israel khaiunia khako thawao-iao. Naito, Apaou nou nung Yordan ajepek goumchi nou asam haoson ta mitha kiu-e. 23Lüko asamüh athaloutsün tsükankeikü naito, Ngo asam tü ngiotsün mongko asamüh Apaou thako angei sunheji ta lütsüolo. Nung thaiutha ti phiokü lathe, asam meshen angei thaiutha angja-e. 24Nungtiphe asamüh asam noksong nouso naiuso asam onnemok thaiutha tsam nou lülahlo, nung asamüh ti thalotaim nung lüchhi!”

25Gad naiuso Reuben khaiuniasoüh ngiom, “Apaou, sam ni yathsüotsünsoüh ni thoiluttsünli chhi-e. 26Sam tsammongnyiuso, methsoso, naiuso sam thainianso, naiuso sam onnemokso, nung Gilead noksong nai noi-e. 27Lüko sam apem Apaou ngiokhem khemko ehli nai khuau khemlokü noin. Sam Yordan yankü khuküta ni ngiotsünli sam ehli lihe-e.”

28Nungtiphe Mosaüh Eleazar si Yihusua naiuso Israelhai aheihoi nouso tü nung thoilutkü kiu: 29“Reuben naiuso Gad khaiuniasoüh Apaou nou thoiluttsün nai ehli-ao Yordan yan naito, naiuso asamüh lüko ngüso ahachu tsangkü nai goumchi nou shiolo naito, Gilead goumchi ngüso tengkamao ngüso hau lükiu. 30Lüko ngüsoüh Yordan tsüyankü naiuso asamko ehli nai tsükhukü naito, ngüsoüh ngüso haoson asam lilu Kanan goumchi nai tengkam kame.”

31Gad naiuso Reuben khaiunia- soüh thalakü ngiom, “Apaou, samüh Apaou nou thoiluttsünli chhi-e. 32Apa ngiokhem khemko samüh Kanan goumchi mongai yanküta ehli nai khu-e, nungaito samüh sam tengkam Yordan ajepek nai lu noi-e.”

33Nungtiphe Mosaüh Gad naiuso Reuben kau naiuso Manase kau apaitso nouso hau Amorhai nokpao Sihon nokshing apem naiuso Bashan nokpao Og goumchi noksong nouso, naiuso nung lemkü noitsün goumchi nou kium. 34Gad kau nou alengmei noksong Dihon, Atarot, Aroer, 35Atrot, Shofan, Jazer, Jogbehal, 36Bet, Nimra, naiuso Bet Haran nouso shanshi. 37Reuben kau nou Hesbon, Eleale, Kiriataim, 38Nebo, Baal Meon, (nung nian leanio) naiuso Sibma noksong nouso shanshi. Ngüsoüh shanshitsün noksong nouso nian ngüsoüh ayan niankiushi.

39Manase thso Makir kau nou Gilead goumchi shiolo, küta nungko noitsün khaiunia nouso komankü nung thangko kihlo. 40Nungtiphe Mosaüh Gilead goumchi nung Makir kau hau kiuwan, küta ngüso nungai kih. 41Manase thso Jairüh nok ajantso komankü thalo, naiuso nungso tü “Jair nokso ta nian.” 42Nobaüh nok ajantso koman küta Kenat naiuso nung nok nouso thalo, naiuso apaüh nung nok nian nou apa nianphi Noba ta nian.

ASIO THSAMLAI

©2005 Bible Society of India

More Info | Version Index