Search form

Haove 34

Goumchi Elung nouso

1Apaou nou Mosa hau 2Israelhai thaiutha ayamhan nouso kium, “Ngo asam hau kiutsün Kanan goumchi nai tilai asam nappe, asam goumchi elung nouso nungti noi-e: 3Ajepekki elung nou Zin liutsa tü yalo nou Edom elung yangkü. Nung ajepek nai Ee Khiamnok nou ta tsalo-e. 4Nung ainou ajepekki dongai sheikü Akrabim ai sunghkü Zin yankü khuküta Kades Barnea tü yangkü. Küta ajenapki nai khunai Hazar Adar naiuso Azmon yangkü, 5nung ainou Ijip elung tsamei nai shiküta Mediteranean ko laokü noi-e.

6Ajenap elung nou Mediteranean Khiamnok noi-e.

7“Ajenapki nai elung Mediteranean Khiamnok ainou Hor King tü yangkü lukü noi-e 8naiuso nung ainou Harnat Aoyan tü yangkü. Nung ainou Zedad saokü 9naiuso Zefron saokü khoküta Hazar Enan nai laokü.”

10Ajepek nai elung Hazar Enan ainou Shefam tü yangkü lukü noi-e. 11Nungthankü Harbel ajepekki naiuso Ain ajepek nai khukü, naiuso King nou tü thankü Galil shekok nai khukü, 12küta ajepekki nai Yordan Haiu sai ainou Ee Khiamnok tü yangkü noi-e.

“Nungti asam goumchi elung püle nouso noi-e.”

13Nungtiphe Mosaüh Israelhai tü ngiom, “Nung goumchi nou asamüh phongde tsangkü eppe, goumchi sübao Apaou nou kau lükao naiuso apaitso hau kiutsün nung noi-e. 14Reuben, Gad, naiuso Manase kau apaitso nou ngüso haoson epiu, kau lingkü janthat lo-iu, 15Ngüsoüh nung Yeriko tü lalutkü, Yordan Haiu ajepek etsai epiu.”

Goh Jan au thaiutha Aheihoi nouso Thsale

16Apaou nou Mosa tü ngiom, 17“Meson Eleazar naiuso Nun thso Yihusua neüh khaiuniahoi hau goh nou janthat kiu-e. 18Ngüne tü goh janthat nai hachuau kau pungkü ainou ahei tsak tsak lülo.” 19-28Apaou nou chosantsün khaiunia nungso noiküla:

Kau Ahei
Yihuda Zefune thso Kaleb
Simeon Amihud thso Shelumiel
Benjamin Kislon thso Elidad
Dan Jogli thso Bukki
Manase Efod thso Hanniel
Efraim Shiptan thso Kemuel
Zebulun Parnak thso Alizafan
Isakar Azzan thso Paltiel
Asher Shelomi thso Ahihud
Napthali Amihud thso Pedahel

29Nungso Kanan goumchi nai Israelhai ongko goh janthat au Apaou nou chosantsün khaiuniahoi noin.

ASIO THSAMLAI

©2005 Bible Society of India

More Info | Version Index