Search form

Haove 36

Tsamsigoh Yangkü noitsün Menyiuhoi Tengkam

1Gilead kau aheihoi, Makir thso, naiuso Yosep thso nou Manase thsaoso, Mosa naiuso amao aheihoi nouso dongai khukü chite. 2Ngüsoüh ngiom, “Apaou nou asam Israel khaiuniahoi hau phongde tsangkü goh nou janthat kiuao thoilut. Loüh apaüh sam deisinio Zelofehat menyiuthsoso hau lüko deisiniohai goh jankiu haau thoilut. 3Lüko lüyangshi, ngüso amao mele haiko tsamsigoh yangkü khuwan nai, ngüso tengkam haoson nung mele thaiutha iula-e, küta sam hau sonkiutsün apem thsaokü shiane. 4Alaokiushitsün pon nouko, tilai janankü noitsün jengtsaiu apem aya pao hau laokü kiushi-e, Zelofehat menyiuthso nouso jengtsaiu haoson ngüso sau mele ko tsamsigoh yangkü noin nung mele hau asaichi tengkamao hoilutkü theane, naiuso sam mele tengkam thsao wane.”

5Nungtiphe Mosaüh Israelhai hau Apaou ainou athoiluttsünso kiu kü apaüh ngiom, “Manase kau nou ti ngioji nung thakü noin, 6nungtiphe Apaou nou ngioji, Zelofehad menyiu- thsoso ngüsoüh mongchio naito, sau- ko lünou tsamsigoh yangau shio-e, lüko ngüso kau mongkolu tsamsigoh yangau shio-e. 7Israelhai thso pungkü tengkam apem apa kau ko thsanekü noi-e. 8Menyiu pungkü sauhaiüh tengkam Israel kau mong- ko kame apaüh nung kau mongko noulu melo ko tsamsigoh yangau shio-e. Nungli Israelhai pungkü nou apa paosiposo tengkam haoson kamao noin. 9Naiuso tengkam nou kau tsaküh nou kau tsakai ta tsüli-e-e. Kau pungkü nou momo tengkam tsülaokü kankeikü noi-e.”

10-11Nungtiphe Zelofehad menyiu- thsoso: Mahla, Tirza, Hogla, Milka, naiuso Noah, ngüsoüh Apaou nou Mosa tü thoiluttsünli chhin, küta ngüso po thansithong thsoso ko ngüso tsamsigoh yang. 12Ngüso Yosep thso Manase kau mongko tsamsigoh yang, naiuso ngüso tengkam ngüso po kau mongai noi.

13Yordan Haiu yankü Yeriko nai Moab tsamei ko Apaou nou Israelhai hau Mosa tsangkü kiutsün ngio- khem naiuso don yam nouso nungso noin.

ASIO THSAMLAI

©2005 Bible Society of India

More Info | Version Index