Search form

Haove 4

Kohat kau Chhisiya

1Apaou nou Mosa tü ngiom, 2Levi kau nouso ongko Kohat thsoso, kau kau si pothso pothso, 3pon aosam ainou aopungo saokü, Apaou noitsün Nejenkhio nai chhi chhiao omkü nouso apem lüwelo. 4Asioting jengtsaiu nouso thaiutha, Nejenkhio nai Kohat thsoso chhisiya nung noin.

5Apaou nou Mosa hau ayam nungso han: Tilai asaothang nou soiane, Aron naiuso apa thsoso Nejenkhio mongai nappe, naiuso akhongjeitsün ne Athalou-e Paidan khako sa-iküta nungüh Paidan nou sajeikü taiu-e. 6Nung chiai ngüsoüh nyikhun amei nou lolutkü, nung ne asangnya nou chiekü, küta api-ao thetsün pai chinthioao noin.

7Ngüsoüh puo chinai asangnya nepat nou Apaou hau themtsai chaithio kiutsün thaiutha satlute, küta nung chiai chiosilak, angan- nyam jahtsün chio nouso, chaishi chio nouso, naiuso khiam meng sübao theng chaithio thioau theji nungso ataiu.Nung puo nai themtsai asaita taiuao noin. 8Nung chikü chiai ngüsoüh ne aseng nou satlut ao noin, küta nung nyikhon amei tsak nou kapjeikü ataiu, naiuso api-ao thetsün pai chinthio-e.

9Tson taiutsün, tson nouso, nyikhun amatchai nouso, chio nouso, naiuso olip khaiutsom meng apem ngüsoüh ne asangnya nou patpokkü taiuao noin. 10Nungso jengtsaiu nouso ngüsoüh nyikhon amei nouko tsanshiküta patpokkü apitsün chiai taiukiu-ela.

11Nungthan ko chaiou lakkeng amthang chiai ngüsoüh ne asangnya leng nou satlut ao noin, küta nung nyikhun amei nou kapjei-e, naiuso nung chiai apitsün pai thiokü wanao noin. 12Ngüsoüh AsioThang nai kankeitsün chiosilak apem loküta ne asangnya nou tsanshikü, kappokau nyikhun amei tsak nung chiai lolut küta nungso apitsün pai chiai taiukiu-ela. 13Ngüsoüh amthang ainou apaichao luo nou wanküta ashethop ne nou nung chiai salutela. 14Ngüsoüh nung chiai amthang chhisiya nai kankeitsün jengtsaiu nouso apem, sonlak, akhojeitsün, chappun, naiuso chiokaoh, naiuso amthang nai chiosilak apem, naiuso nung chiai ngüsoüh nyikhun nou sapokkü ta apitsün pai chinthio-e. 15Tilai ngüso saothang wankü khuau atao shi-e, naiuso Aron si apa thsosoüh amthang sapoktsün khemsane naiuso amthang nai jengtsaiu apem khemsan kiu-e, nungai Kohat thsosoüh nung tinao shioau noin: Lüko ngüso eanao noin ta amkham Nejenkhio nou tü ngüsoüh tsüthantanela.

Nungso jengtsaiu nouso amkham Nejenkhio nai Kohat thsoso thsale noin:

16Amkham Nejenkhio nai kankei- tsün tson thaiutha inkhiam, ajah- tsün, chih chaithio, atsomkiutsün khaiutsom, naiuso Amkham Ne- jenkhio nai kankeitsün alum Apaou tü losiokü taiutsün nung chhisiya apem thaiutha meson Aron thso Eleazar thsale noi-e.

17Apaou nou Mosa si Aron netü ngiom, 18“Kohat kau nung amkham asioting Nejenkhio dongai shimkü shitsün tsangkü la ean-i. 19Nung thawaoau noitsün loyangau Aron naiuso apa thsoso khukü khaiunia pungkü hau apa chhisiya kiuküta apaüh ti chhilükhune nung apa hau chite-e. 20Lüko Kohat kau nung amkham Nejenkhio nai napkü mesonhoi nou Asio jengtsaiu khemlotsün epnai ngüso eane.”

Gershon kau Chhisiya

21Apaou nou Mosa ko chitekü ngiom, 22Gershon kau mongko kau kau, naiuso pothso pothso, 23am- kham Nejenkhio nai chhi chhiao tsalokü naptsünso pon aosam ainou aopungo saokü ashe, ni ngüso lüvelo. 24Nungso jengtsaiu nouso kankeiao thaiutha ngüso thsale noin. 25Ne- jenkhio nou among nai lopoktsün, naiuso achiai lopoktsün, nung achei khating nou lojei ao nyikhun amei nou, koukhan thaiutha nekhong, 26Nejenkhio naiuso amthang lemkü thaiutha akhongjeitsün ne, naiuso aochan nung kam thaiutha, kam nai naptsün koukhan nouko akhong- jeitsün ne, naiuso nung jengtsaiu shanao ajipetsün apem. Ngüsoüh nung jengtsaiu chhisiya nou potsün alum shanao noin. 27Aron naiuso apa thsosoüh ngüso hau chhisiya alum chhiao thoilutkü taiutsün Gershon haiüh chhi si tsüchhi nungtü thapao Mosa naiuso Aron noiküla. 28Ne- jenkhio nai Gershon kau chhisiya kiutsün nungso noiküla: Ngüsoüh nungso meson Aron thso Itamar ayamhan khemko chhikü noiküla.

Merari kau Chhisiya

29Apaou nou Mosa ko chitekü Merari kau vetaoling haove kau kau naiuso pothso pothso, 30pon aosam ainou pon aopungo jetko nouso pohai chikü sauhai Apaou noitsün Nejenkhio nai chhisiya ao omkü noin nungso lüsatlo ta ngiom. 31Ngüso chhisiya kengchek nouso kankü, suon naiuso kheam nouso, naiuso Nejen- khio noiluttsün, 32naiuso kheam nouso, nung noiluttsünso, pai ehen nouso, kam thaiutha aochan nouso Nejenkhio lemkü sübao waokü jipeküta ngüsoüh lekthsa nungso noi-e. Khaiunia pungkü jengtsaiu in tsak tsak kanao thsale noiküla. 33Nejenkhio nai Merari kau nou chhiao ayathsüotsün chhi thsale nungso noin: Ngüsoüh nungso meson Aron thso Itamar ayamhan khemko chhikü noiküla.

Levihoi Vetaoling Haove

34-48Apaou athoiluttsün tsangkü, Mosa, Aron, naiuso hoikam ahei hoi nou Levi kau süme nouso: Kohat Gershon naiuso Merari kau nouso vetaoling haove loum.Ngüsoüh nung kau kau, pothso pothso, khaiunia pon aosam ainou aopungo sauhai Apaou Noitsün Nejenkhio chhiao omkü noiküla nungso satlotsün nungti noi-e:

Kau Haove
Kohat 2, 750
Gershon 2, 630
Merari 3, 200
Apem kamko 8, 580

49Khaiunia pungkü Mosaüh Apaou nou thoiluttsünli satthio, naiuso Apaou nou Mosa tsangkü athoilut kiutsün nung: Khaiunia pungkü apa chhisiya thsale aya- thsüotsün tsüdekünai akanlükhunao chhi haoson kium.

ASIO THSAMLAI

©2005 Bible Society of India

More Info | Version Index