Search form

Haove 6

Nazirithoi thaiutha Ngiokhem

1Israelhai tü ayamhan ajantso kiuao thaiutha, 2Apaou nou Mosa tü thoilut.Melo tsüdekünai menyiu ajantsoüh Apaou thaiutha meshen chija thumkü kiukü losio- lokü Nazirit theau ngiomong shinge tsak shankü iula nai, 3-4apa to theng naiuso phop khiam ainou thakhukü noiau noin.Apaüh sainaoshep nou shantsün shep theng lüko naiuso sainaoshep asang si awon lüko tsüheau noin.Apa Nazirit thekü noitsün lektso sainaoshep theng ainou shitsün ti theng in lünou tsüdekünai shepkhop lüko tsüheao noin.

5Apa Nazirit theao ngiomong shinge shantsün khemko noitsün lektso, apaüh khaiu tsü iuwane naiuso sonpun lüko tsü iuwankü theao noin. Apa Apaou thaiutha thumkü kiutsün losiolokü noin lektso apa ngiomong shinge nou kejeikü taim, naiuso apaüh apa khaiu ou naiuso sonpun nungko samsanao noin. 6-7Apa khaiu ou Apaou tüthumkü losiokü taiutsün ii noin, nungtiphe apa losiokü noitsün ataochikü nouko meshen posinyiu, deinaiuso nuo so ean nai, nung meadongai shimkü khukü meshen chijatsülochinyan loau noin. 8Apa Nazirit noitsün lektso apa Apaou hau thumkü losiokü noin.

9Khaiunia ajantso alekta apa dongko shimkü ean nai, naiuso apaüh losiokü taiutsün khaiu ou lochinyankü iula nai, nungai chinyatnyi taiuküta apa khaiu ou naiuso sonpun nou iuwanao noin; nungaito apa amkham yamai siokü noin. 10Ajekhaiu petjeinyi nouko apaüh chongmükham nime meson dongai Apaou noitsün Nejenkhio koukhan dongai kankü shiao noin. 11Meson nou nung ongko tsak angei chaithio naiuso tsak nou ajahtsün chaithio thaiutha apa losio au amkham shane, tiautenai apaüh mea tsak nou ta angei sunh-e. 12Nung ajekhaiu kolu khaiunia nou apa khaiu ou müjam losio shikü naiuso Apaou tü Nazirit tsaklu müjam losio loshi. Nung khako chhikü shitsün atao tsüwesanshi, tiautenai apa losiokü taiutsün khaiu ou lochinyan. Müjam amai kiutsün chaithio tsakli apaüh onnemoktso pon tsak shelokü nou kankü shi-e.

13Tilai Nazirit tsaküh apa ngiomong shingetsün kheme, apaüh amkham chhisiya nou tsalou-e, apa Nejenkhio bekhan nai khuküta 14ajahtsün chaithio thaiutha onnemokpongtso pon tsak shelokü nou, naiuso onnemok asangtso pon tsak shelokü nou tsak angei chaithio thaiutha, naiuso onnemok apong tsak nokmei chaithio au alothe tsüsunkü noitsün thainian süme Apaou hau akiu. 15Apaüh loüh phoplao tsüthiokü shantsün themtsai kim tsak, olip khaiutsom thiohakü wonne nou saitsün themtsai teithamkü nou naiuso atsao tsaokü tsantsün olip khiam laolutkü, nungko hakü chih chaithio naiuso theng chaithio kiu-e.

16Ajahtsün chaithio naiuso angei chaithio nouso chikü meson nou Apaou hau kiu-e. 17Apaüh Apaou hau nokmei chaithio nou loatkü thio-e, naiuso nung themtsai kim nouko hakü kiu-e, loüh chih chaithio naiuso theng chaithio lüko apaüh kiuha-e. 18Nejenkhio bekhan dongko Nazirit nou apa khaiu ou iuwane küta nung nokmei chaithio nouko in nai thio-e.

19Nungai onnemok asangdong nou theng küta, meson nou nung lokü themtsai ateitham tsak naiuso kim ainou atsao tsaokü nou themtsai tsak nouko hakü Nazirit phamongai lethio-e. 20Nungthankü meson nou nungso chaithio amothi paopei tsakli Apaou hau kiu-e, ngiokhem tsangkü nai meson haoson sübao onnemok hok naiuso nyao noin nungko hakü noi-e. Nung phiai Nazirit nou theng shiuao shio-e.

21Nung Nazirit khaiuniahoi thaiutha ngiokhem nouso noin: lüko Nazirit tsaküh apaüh kiuao shiokü hau ngiomong shinge ti noin nung chiai yanshikü chaithio kiuao thalonai, apaüh thalokü taiutsün apaüh tongtü thawao-iao noin.

Meson yam Ouk

22Apaou nou Mosa tü 23Aron naiuso apa thsosoüh Israelhai ouk kiutsün taoko nungso ngioyak kankeiao lüchite ta thoilutkü ngiom: 24Apaou nou ni oukkiu naiuso paotsangkü lükankei; 25Apaou nou Apa kha awon nitü lüthsalut naiuso nitü atsüojin lüyangkiu; 26Apaou nou nitü thapküta nihau aalo akiu. 27Naiuso Apaou nou ngiom, “Ngüsoüh Israel khütha nai jünian ouk tsakli kankeikü velut naito, Ngo ngüso ouk kiu-e.”

ASIO THSAMLAI

©2005 Bible Society of India

More Info | Version Index