Search form

Haove 8

Tson Taiutsün

1Apaou nou Mosa tü ngiom, 2“Aron tü tilai apaüh tson chinyat nouso tson taiuthang nai taiu-e, awon nou kha ai awon kiuao lümeikü lütaiu ta lüchite.” 3Aronüh angiotsün angkü tson taiutsün kha nai sheilutkü tson nouso taiu. 4Atsokting ainou asaothunting saokü tson taiutsün nung chaiou lakkeng nou meikü langkü Apaou nou Mosa hau ayam hantsün tsangkü nai shan.

Levihoi Losiotsün naiuso Thumkü kiutsün

5Apaou nou Mosa tü ngiom, 6“Israel khaiunia kau nouso ainou Levi kau mothikü ataiu küta ngüso 7nung saisile nousoli alosio: alosiotsün khiam nou ngüso tü lüsatlut küta ngüso tü tsopem thumkü lüiuwan naiuso ngüso neshe lüphetan ta lüchite.Nungai ngüso amkham tsangkü nai yanthsüokü noi-e. 8Küta ngüsoüh jangtso tsak naiuso apotsün chihsikhiam chaithio olip khaiutsom nouko wonne nou laowekü, alo, naiuso loüh angei chaithio thaiutha jangtsopong tsak alo. 9Küta Israel hoithum Ngü noitsün Nejenkhio khako kamshi- iküta Levi hai chongai tsakü noi-ikü ataiu. 10Israel hai apemüh ngüso pha Levi hai khaiu ai thanglut, 11küta ngüso jüchhi chhiao Aronüh ngüso mothikü paopei tsakli Israel hai ong ainou losio. 12Levi haiüh jangtsopong nime, angei chaithio thaiutha tsak, naiuso amao tsak nou ajahtsün chaithio au taiutsün khaiu nai ngüso pha thanglute, nung Levi hai losioau thaiutha amkham tsak shantsün noin.”

13Ngü tü amothi paopei tsakli Levihai mothikü alosio; küta Aron naiuso apa thsoso ngüso khako apaotsangao taiukiu. 14Levi hai Israel hoi ong ainou nungti mothikü ataiu, nungaito ngüso jü haoson noi-e. 15Ni Levi hai losiokü naiuso thumkü kiukütün phiai, ngüso Nejenkhio nai chhisiya au maikü iula-e. 16Ngo ngüso Israel hai thsoyamchong nouso thangko theau shanlo, naiuso ngüso Ngü nou noin. 17Tilai Ngo Ijip nai thsoyamchong nouso apem loatan, Ngo jühaoson theao kau pungkü thsoyamchong nouso naiuso thainian kau pungkü chongting puntsün losiokü taiu. 18Israel hai thsoyam- chong apem liko Ngo lo Levi hai loji, 19naiuso Ngo Levi hai Aron naiuso apa thsoso tü Israel hai ainou paopei tsakli, Israel hai thaiutha Nejenkhio nai chhisiya ao naiuso Israel hai dongai aküothe shitsün ainou kipsanao thoilutji.

20Apaou nou Mosa tü thoiluttsünli, Mosa si Aron naiuso Israel hai apemüh Levi hai losiokiu. 21Levi haiüh ngüso chija losiokü naiuso neshe phetan küta Aronüh Apaou tü ngüso amothi paopei tsakli losiokü kiu.Apaüh ngüso thaiutha alosio amkham shankiu. 22Levi hai thaiutha Apaou nou Mosa tü thoiluttsün alum khaiuniahoi nou chhikü noiküla.Nungtiphe Levi hai Aron naiuso apa thsoso ayamhan khemko Nejenkhio nai chhisiya ao maikü iula.

23Apaou nou Mosa tü ngiom, 24“Pon eknimekü pungo ko yakü Levi hai pungkü nou Ngo noitsün Nejenkhio nai chhisiya nouso tsaloau noin. 25Küta pon aopungo ngoi nai apa chhisiya ainou laowanao noin. 26Nungphiai apaüh Nejenkhio nai meshen Levihoi chhisiya nai hachu au noin, lüko apa chija nou ti amkham chhi tsüchhiao noin. Nungti ni Levi hai chhisiya asaita hau iulakü shanao noin.”

ASIO THSAMLAI

©2005 Bible Society of India

More Info | Version Index