Search form

LUK 4

Jesu Abatheemraennii

(Met 4.1-11; Mk 1.12-13)

1Jesu ynthiing laetha ing sipka Jordan tanii hungnganrisa, amana inii nisommanrii ipha ing lampana umlae ing batheemka akhaanglae laetha inche Jesu chu aruwpa, 2apha ichiinache Jesu yntanga samahdeh, inii changjaehchu ahungchitheeh raenche ama aven hungchaamsa. 3Amana umlae ing aningna ariir, “Nang Thangnang sapa vataniive, havana rung i tar uurla tanana nachong bathahra.”

4Jesu ing aningna abasang, “Tar pang ing mee ringmah taka ynziihka omna.”

5Havi aanuwna atakchu umlae ing ruwka laaruw paamna iruwngpaam vakhae amongpang tina amansiipa, 6vokhehkho aningna ariir, “Hava vakhae aruwreng vokhehkho alaar isa aangkheng havi naningna pivakachii; hava vakhae i kaningna ymmansirpa, amanche ki ing kamanden ningnache havi pivakata. 7Chukhaenache nang ing ki irum taniive, aangkhenglaang havi nata vaata.”

8Jesu ing aningna abasang, “Havi ynziih vasahva, nang ing naafhuw Thangnang chu rumvanachiiva, vokhehkho ama pangchu rukuum tuva nachiiva.”

9Athar vokheh atakchu Jerusalem ting ruwka rumniieen basuwrting mangkarka aningna ariir, “Nang Thang-nang sapa rem vataniive thangtingse jungkhuwngla; 10akhaechuve ynziihka omna, ‘Nangchu ahaebachuw vachii ae Aafhuw ing nakhaena avaarmee aechu jenchiir vaata,’ 11vokhehkho nakhina rung ing nasuhniimah ing enuw engkik ing ihengahpeeh vaatae.”

12Amana Jesu ing abasang, “Jinge ichii ing ariirsa amachuve, nang ing naafhuw Thangnang chu batheem mahva nachiiva.”

13Jinge ichii ing abatheemchu hungchika, vokheh batheemnii aphachu aphamahri raentaang umlae ing Aafhuw chu abathenpa.

Jesu ing Galili na Nong Abasen

(Met 4.12-17; Mk 1.14-15)

14Jesu ing laetha ruwreng ajaar-nache Galili ting hunganrisa, vokhehkho ama paam sungna om khuw chaap nache Jesu athaminchu thangsa. 15Amana Jesu ing meekongnii nache amanchuwpae vokhehkho mee vakhae ing amanpahsahpae.

Nazaret na Jesu Enrumah

(Met 13.53-58; Mk 6.1-6)

16Aanuwna Jesu ing aongnii Nazaret nache hungtungsa; vokhehkho enunu inuwzii ing Deennii inii nache meekongnii tingche varuwhsa. Ama ing ynthiing thiimbuwrchu ipaanii khaenache hangiirsa; 17amana Isaia thiimbuwrchu aningting enjepeehpa, ama ing thiimziihchu phaenka hava chong i aanthinniichu atuwhpa,

18“Aafhuw laethachu kataklina chuwngna,

yntuurpak sara naeriing ae ningna isa thamin itongpeehnii khaenache kataklina thou itaehpa.

Ynsuwr aeka ong aechu bathenpeehnii khaena amanche mikchu aenche athar imunii khaena,

ijachaam peehrik ing ong aechu ruwkuwrjoh pinii khaena,

19vokhehkho Thangnang ing aru kumchu itongnii khaena kichu ynjenchiirpa.”

20Jesu ing thiimbuwrchu aapanii ningtingche jepika ongsa; changlaenche meekongnii sungna ong mee vakhae aenche Jesu chu engenpa. 21Amachu ama ing amutah nache eningna chong iriir abasenpa, “Atanii havana nensii ynthiing thiimziih i areer suwhsa achii.”

22Chukhaenache enuw vakhae ing akhaenache isa ing chongsae, vokhehkho ama ing atong ningshiih thaminchu ensiitah nache inempak ngik aeka enriir, “Havi Josep sapa khamah vakhang?”

23Amana eningna ama ing ariir, “Hava chongthram i nenuw ing kaningna ynthiir rudeh ing riirva nenta, amachuve ithiim nataksahchu yndamsara; kaparnaum na natu nari nong kenuw ing kensiichu nakhuwsah nenkho tura tavanenta.” 24Vokhehkho ama ing ariir, “Ki ing neningna atatak ing kariirnah, jaepharchu apaamsah mee aenche rupeehmahnii ae.”

25Ki ing neningna atatak ing kariirnah, “Elija aaniina kumthum tharuk sungna thangbaen ynthingka, laaruw paamna isah taangka inempak ijanii isuwh; changlae Isrel sungna muwkhuwnuw musara om ae. 26Changkhang nare Elija chu eningting vechiirmah, changvakonchu Sidon paamna om Zerephat tanii muwkhuwnuw yngkheh ong aningna pangche ajechiir. 27Amanche jaephar Elisha aanii nakho Isrel sungna ynchor riirae ing ina mee inempak om; amanche achuw kho dammah ae, changvakonchu Sairia tanii Naaman ichii pasar pangchu idam.”

28Enuw ing amachu ensiitah nache, meekongniina ong vakhae aenche embarung siksa. 29Amana enuw ing hangiir aeka Jesu chu khuwruung taangting basuw aeka amanche engkhuwruung enseemnii yngkhohpak bung tingche ruw aeka renkenta enchiipa. 30Changvakonchu Jesu ing enkaar tanii hungsuwhka sisa.

Umlae Ichuwng Pasar Yngkheh

(Mk 1.21-28)

31Aanuwnache Jesu ing Galili khuw-ruung Kaparnaum ting jungruwhsa, amanche Deennii inii nache Jesu ing enuwchu amanchuw ae; 32Ama ing ajeerpeeh ae chongchu enuw vakhae ing ensiitah nache inempak ngiksae, akhaechuve Jesu achongjeer chaapchu aatuaricheh om ing chongsa. 33Changlaenche meekongnii sungnache mee yngkheh umlae ynthiingmah laetha ing ichuwng ong; ama mee inche engkaarna hangiirka uungsa, 34Nazaret tanii Jesu, “Nangle kenuw ynchii ynsuwh muwkhang? Kenuwchu mamaangnii khaena itheng vachii? Nang achuw vachii ichii kamanghuw sachii, nang Thangnang tanii ynthiing chuvachii.”

35Jesu ing ynthiingmah laethachu rukuhka ariir, “Nahuw mandae nana aningtanii hungsuwhra!” Amana umlae ing ichuwng meechu enrik chimbang nache bathiihka ahakchaang suhrudeh ing umlae inche taangting suwhsa.

36Amatah nache mee vakhae aenche enruw riimka yngkheh ing yngkheh ningna ynriir ae, “Hava chong i ynchiiva? Aatuaricheh vokhehkho ruwreng thoh ynruw ing ama ing ynthiingmah laetha aechu chonghak apeehtahna enuw hungsuwhsae.” 37Chutahnache ama paam aangkheng nache thangka ynseer chorsae.

Jesu ing mee inempak Amandam

(Met 8.14-17; Mk 1.29-34)

38Atii Jesu ing meekongnii tanii jungsuwhka Simon een ting varuwhsa. Changlae Simon ampuw chu ipirpak ing arii hethengsa; chukhaenache ama akhaena Jesu ningnache enriirpa. 39Jesu ing abuumna vangiirka riithengchu arakuhtah nache vadamsa; amana hangiirka enuwchu rukuum atupeehpae.

40Atii inii ajungtak nuwting reentaang reentaang ing ina mee vakhaechu Jesu ningting averuwpae; amana Jesu ing mee yngkhehkheh taklina akik siika enuwchu amandam-pae. 41Changlaenche ynthiingmah umlae laetha aenche mee aanem tanii jungsuwh aeka enriir, “Nang i Thangnang sapa Khrista chuvachii!” Amana Jesu ing enuwchu rukuhka manchong mahsae, akhaechuve enuw ing Jesu i Khrista va ichii isajaeh ing emanghuwpa.

Jesu ing Meekongniina thamin Atong

(Mk 1.35-39)

42Khuwchu hungvaarka Jesu ing michuwr daereng minting sisa. Changvakonchu mee vakhae aenche Jesu una ongva ta aeka aongtahnii tingche vaksae, vokhehkho aajong aenche Jesu chu reentaang ting asiniimah khaena khaam kenta enchii; 43changvakonchu ama ing eningna ariir, “Ki chuve Thangnang iruwngpaam isa chongchu reentaang reentaang khuwruung tingkho siningka tongva kachiiva; akhaechuve hava isa chong khaene kichu ynjenchiirva.”

44Chukhaenache Jesu ing Judia ae meekongnii chaap nache isa thaminchu atongpa.

ITHAR CHONGHAK

©2008 Bible Society of India

More Info | Version Index