Search form

MAAK 5

Jesu ing Geraseni na umlae Ichuwng mee yngkheh Amandam

(Met 8.28-34; Luk 8.26-39)

1Galili chifhuw alaarna om Gera-seni ichii paam nache enuw tungsae. 2Amana Jesu ing ruwkuwng tanii ajungchum thoh, umlae ing ichuwng mee yngkheh inche thaen-kung tanii jungsuwhka Jesu chu aantuwhfhuwpa. 3Atak i thaenkungna ong meeva, achuw ingkho siir runoh ing iphuwp achehmahva; 4akhaechuve atak i siir runoh ing phuwpchak khang ae nakho amanche korkhiing ing charchak khang ae nakho, ama ing ipehka abathingchir chaktah nache, achuw ingkho atakchu irahnii maesa deenmahsa. 5Ama ing siim jaen naeruung thaenkungna vokhehkho reenna uungka asanaensah ing rung ing ynsuknum chakva.

6Ama ing Jesu chu laarkhehna ajemuthoh vataenka arumpa; 7amana ipirpak ing uungka ariir, “Yngkaang-sehna ong Thangnang sapa Jesu, nang ing kaningna ynchii tukata nachiiva? Thangnang rumingna kathamsahnahchii, ki imamaang samahra.” 8Havi Jesu ing aningna umlae nang aningtanii hungsuwhra taka ariirvasah tahnava. 9Amana Jesu ing asii, “Naruming achuwva?” Ama ing abasang, “Karuming chuve ‘Inem’ achiiva; akhaechuve kenuw nempaknung.” 10Ama ing Jesu ningna athamsah, “Kenuwchu hava paam tanii ithurmahra.”

11Changlae ama reen nache voh aruwr yngkheh imaar ae; 12amana enuw ing Jesu ningna enthamsah, “Kenuwchu voh ae sungting iruwhnii khaena ibathensara.” 13Amana anikung narapche Jesu ing enuwchu ynthen arupa. Changlaenche umlae aeng aningtanii taang suwh aeka voh ae sungting ruwhsae; voh aruwr lising ynnii vakhaechu reen tanii jungtaen aeka Galili chifhuw ting ruwh aeka thikchirsae.

14Amana voh aacheer aenche hungtaen aeka khuwruung vokhehkho khuw khuw ting amachu emanthangpa, amana ynchii isuwhva ta aeka aanbuwr mee itheng. 15Enuw ing Jesu ningting envaklae, achingnii umlae inempak ing ichuwng vasahchu peendiir heniika vokhehkho iriing idam ing heong emutah nache enuw ynchikpohsae. 16Amana heong aenche umlae ing ichuwng mee re voh ae taklina ynchii isuwhva ichiichu ivatheng ae ningnache entongpa. 17Amatah nache ivatheng aenche Jesu ningna khuwveen ibathenpeeh tahra ta aeka enthamsah. 18Jesu ing ruwkuwng ting ahangkarlae, umlae ing ichuwng vasah mee inche Jesu chu ijiinii khaena athamsah. 19Changvakonchu Jesu ing daaka aningna ariir, “Een ting yngkaenana amanche naarang ae ningna Aafhuw ing nakhaena aajaehmeh iruung nong atuva, vo-khehkho nataklina ynsaangkhe ichii ing aningsiih amandangva ichiichu eningna hungtongla.” 20Atii ama ing yngkaeka Jesu ing akhaena aajaehmeh iruung nong atupeehse ichiichu Dekapolis (Jordan chiilaar iniisuwhtah yntongting khuwruung suum om) nache ynthang abasenpa, amana asii mee vakhae aenche enruw iriim.

Jairus Sanuw re Kumsuum ariinii Ina

(Met 9.18-26; Luk 8.40-50)

21Jesu ing athar vokheh ruwkuwng nache Galili chifhuw laar kahka, ama ing chifhuw kuurna aonglae mee inempak akuurting vaangkongsae. 22Changlae Jairus ichii meekongnii aapuh mee yngkheh vathengka Jesu amuthoh 23aningna athamsah, “Ki kasanuw thik ynthongna, atakchu adamnii ing vokhehkho iring apha-sahnii khaenache ivakpeeh nana nakik ataklina isiipeehra.” 24Amana Jesu ing amathohche vaksae. Changlaenche Jesu chu mee inempak ing ibuumpoh aeka ahenjii ae.

25Enuw ing envakraenche kumsuum ariiniina sii ynta ing ina rupanuw yngkheh heong, 26ama rupanuwchu ithiim aajaeh yngenka vokhehkho adeen seer aajaehkho abathangchir, changvakonchu damchehru ing ina athisehseh. 27Hava rupanuw inge Jesu nongtuchu asiitahna mee changjaeh inem kaarnache Jesu tuknungting vakka apeenchu aparpa. 28Akhaechuve ama ing amandensah, “Jesu apeendiir ruwchu parningve, ki damva kata.”

29Aphachak nache asii yntachu daesa, vokhehkho ina damsing ichii ataksah ing ynghuwsa. 30Amana Jesu ing aruwreng sisa ichii amanghuwtahna mee kaarna vaanlehka asiipae, “Achuw ing kapeen aparva.”

31Asebok ae ing embasang, “Mee hangjaeh inem ing nakuurna eeburpoh ae raenche, ynsaangkhe achuw ing ymparva ynchiipeeh vachii.”

32Changvakonchu Jesu ing achuw ing ymparva taka akuurna ong aechu aabuwr. 33Changlae rupa-nuw ing ataklina ynchii suwhne ichii amanghuwthoh ynchikpak ing vokhehkho ynchiim ing Jesu maen-sokna vakhupsaka, ama ing Jesu ningna athamin aangkheng atongpa. 34Amana Jesu ing rupanuw ningnache kasanuw namandensah inuwzii ing damsachii; nang nungaejaeh ing yngkaera, amanche ina tanii damkiirla taka ariir.

35Jesu ing changche ichii ing achong raenche meekongnii aapuh een tanii mee topoh vatheng aeka enriir, “Nasanuw kha thiksa, ynchii khaena oja kha namanjava.” 36Changvakonchu Jesu ing enchongchu rungaepeehru ing meekongnii aapuh ningnache ariir, “Ynchik mahra, yndenpang mandenjaeh tahra.” 37Amana Jesu ing Pitar re Jems vokhehkho anaepa Johon mahnaka achuwkho ruwmahsa. 38Enuw ing meekongnii aapuh een emphathoh, mee vakhae aeng ynchii tuva kenchiiva ichii manghuwru ing vokhehkho uung aeka ichap aechu amupa. 39Jesu ing een sungting varuwhka mee vakhae ningnache ariir, “Nenuw ynchii khaena ichap vachuw? Naepang i ithiimahva, ijaarsah vatah.” 40Amana enuw ing Jesu chu emaniisah ae. Changvakonchu Jesu ing enuw vakhaechu taang basuw chirka, naepang ampa re amnuw vokhehkho asebok ynthum aechu ruwka naepang aantorniiting varuwhsae. 41Amana Jesu ing naepangchu akikna jeba-chuwka ariir, “Talitha, Koum,” havi arutho chuve, “Achiihnuw, hangsuwra ta ingka kariirnah achiiniiva.” 42Changlaenche rupanuwti inche hangsuwka baversa; atak chuve kum suum ariinii naepangva. Amana enuw vakhae enruw riimpohsa. 43Amana Jesu ing meeningna riirmah dehruw taka eningna ipirpak ing ariirpa, vokhehkho rupanuwti i asahfhuw piruw taka ariir.

ITHAR CHONGHAK

©2008 Bible Society of India

More Info | Version Index