Search form

มัทธิว 14

เฮโรด​ได้ยิน​เรื่อง​พระเยซู

1เมื่อ​กษัตริย์​เฮโรด​ตี้​ปกครอง​แคว้น​กาลิลี​ได้ยิน​เรื่อง​ราว​ของ​พระเยซู 2ก็​อู้​กับ​หมู่​ตี้​เปิ็กษา​ว่า “เขา​คน​นี้​จะ​ต้อง​เป๋น​ยอห์น​ผู้​หื้อ​บัพติศมา​เป๋น​ขึ้น​จาก​ความ​ต๋าย​แหม​เตื้อ​แน่ๆ เขา​เถิง​เยียะ​ก๋าน​อัศจ๋รรย์​หมู่​นี้​ได้”

เฮโรด​ฆ่า​ยอห์น​ผู้​หื้อ​บัพติศมา

3กษัตริย์​เฮโรด​กึ๊ด​จาอั้น​ย้อน​ว่า​ต้าน​ได้​ยับ​ยอห์น​เอา​เจื้อก​เหล็ก​ล่าม​ไว้​ใน​คอก ย้อน​หันแก่​นาง​เฮโรเดียส เมีย​ฟีลิป​น้อง​บ่าว​ของ​ต๋น 4เซิ่ง​ยอห์น​เกย​อู้​กับ​เฮโรด​ว่า “ต้าน​บ่มี​สิทธิ์​เอา​เมีย​ของ​น้อง​มา​เป๋น​เมีย​ของ​ตั๋ว” 5เยียะ​หื้อ​เฮโรด​ใค่​ฆ่า​ยอห์น แต่​ก็​กั๋ว​จาว​เมือง​ตังหลาย​ตี้​นับถือ​ยอห์น​ว่า​เป๋น​ผู้​เป๋น​ปาก​เป๋น​เสียง​แตน​พระเจ้า

6ใน​งาน​วัน​เกิด​ของ​กษัตริย์​เฮโรด ใน​งาน​นั้น​ลูก​สาว​ของ​เฮโรเดียส​ฟ้อน​หื้อ​เฮโรด​กับ​แขก​ตี้​มา​ใน​งาน​ผ่อ เฮโรด​ปอ​อก​ปอ​ใจ๋​ขนาด 7จึง​ได้​สัญญา​ต่อ​คน​ตังหลาย​ว่า​นาง​ขอ​อะหยัง​ก็​จะ​หื้อ 8นาง​ก็​เลย​ขอ​ต๋าม​ตี้​แม่​ของ​นาง​บอก​คือ “ข้าเจ้า​ขอ​หัว​ของ​ยอห์น​ผู้​หื้อ​บัพติศมา​ใส่​ถาด​มา​หื้อ​ข้าเจ้า​ตี้​นี่” 9กษัตริย์​เฮโรด​ก็​ตุ๊ก​ใจ๋​ขนาด แต่​ได้​สัญญา​ต่อหน้า​แขก​ตังหลาย​ไว้ แล้ว ก็​สั่ง​คน​หื้อ​เยียะ​ต๋าม​ตี้​นาง​ขอ 10เฮโรด​ก็​ใจ๊​คน​ไป​กก​คอ​ยอห์น​ขำ​ใน​คอก 11แล้ว​เอา​หัว​ใส่​ถาด​มา​หื้อ​นาง​คน​นั้น แล้ว​นาง​ก็​เอา​ไป​หื้อ​แม่ 12ส่วน​หมู่​สาวก​ของ​ยอห์น​ก็​มา​ฮับ​ศพ​ของ​ยอห์น​ไป​ฝัง แล้ว​ไป​เล่า​เรื่อง​ตี้​เกิด​ขึ้น​นี้​หื้อ​พระเยซู​ฟัง

พระเยซู​เลี้ยง​ห้า​ปัน​คน

13เมื่อ​พระเยซู​ได้ยิน​เรื่อง​ของ​ยอห์น​แล้ว ก็​ลง​เฮือ​ไป​ตี้​เงียบๆ เป๋น​ส่วน​ตั๋ว คน​ตังหลาย​ต๋าม​เมือง​ต่างๆ ฮู้​ก็​ปา​กั๋น​เตียว​ตวย​พระองค์​ไป 14เมื่อ​พระเยซู​ขึ้น​จาก​เฮือ ก็​หัน​คน​เป๋น​จ๋ำนวน​นัก พระองค์​ก็​ฮู้สึก​อินดู แล้ว​ฮักษา​คน​เป๋น​พยาธิ​ใน​หมู่​นั้น​หื้อ​หาย

15ตก​ต๋อน​แลง​หมู่​สาวก​ก็​มา​บอก​พระเยซู​ว่า “อาจ๋ารย์ บ่าเดี่ยว​นี้​ก็​ค่ำ​นัก​แก​แล้ว ต๋ำ​หมู่​นี้​ก็​ทุรกั๋นดาร หื้อ​คน​หมู่​นี้​ปิ๊ก​ไป​ก่อน​บ๋อ เปื้อ​จะ​ได้​ไป​เซาะ​ซื้อ​ของกิ๋น​กั๋น​ต๋าม​หมู่​บ้าน​ต่างๆ นั้น”

16แต่​พระเยซู​ตอบ​ว่า “หื้อ​หมู่​เขา​อยู่​กั๋น​ตี้​นี่​เต๊อะ แต่​หมู่​ต้าน​ไป​เซาะ​ของ​กิ๋น​มา​เลี้ยง​เขา​เหีย”

17หมู่​สาวก​ตอบ​ว่า “ตี้​นี่​หมู่​เฮา​มี​ก้า​เข้าหนมปัง​ห้า​ก้อน​กับ​ป๋า​สอง​ตั๋ว​เต้าอั้น”

18พระเยซู​บอก​ว่า “เอา​มา​หื้อ​เฮา​ตี้​นี่​ลอ” 19พระเยซู​สั่ง​คน​ตังหลาย​นั่ง​ลง​บน​หญ้า แล้ว​ฮับ​เข้าหนมปัง​ห้า​ก้อน​กับ​ป๋า​สอง​ตั๋ว​นั้น​มา แล้ว​แหงน​หน้า​ขึ้น​ไป​ผ่อ​ฟ้า​สวรรค์​ขอบ​พระคุณ​พระเจ้า พระองค์​ก็​หัก​เข้าหนมปัง​แล้ว​เอา​เข้าหนมปัง​กับ​ป๋า​นั้น​หื้อ​หมู่​สาวก​แจก​คน​ตังหลาย 20คน​ตึง​หมด​ได้​กิ๋น​อิ่ม​กู้​คน แล้ว​หมู่​สาวก​ก็​เก็บ​ของ​กิ๋น​ตี้​เหลือ​ได้​สิบ​สอง​ซ้า​เต๋มๆ 21คน​ตี้​กิ๋น​อยู่​ตี้​หั้น​มี​ป้อจาย​ประมาณ​ห้า​ปัน​คน แม่ญิง​กับ​หละอ่อน​บ่ได้​นับ

พระเยซู​เตียว​บน​น้ำ

22หลัง​จาก​นั้น​สัก​กำ พระเยซู​ก็​บอก​หื้อ​หมู่​สาวก​ลง​เฮือ​ข้าม​ฟาก​ไป​ก่อน ส่วน​พระองค์​ยัง​อยู่​ตี้​หั้น​เปื้อ​ส่ง​คน​ตังหลาย​ปิ๊ก​บ้าน 23เมื่อ​ส่ง​คน​ตังหลาย​ปิ๊ก​เมือ​บ้าน​หมด​แล้ว พระองค์​ก็​ขึ้น​ไป​บน​ดอย​คน​เดียว​เปื้อ​อธิษฐาน มืด​ค่ำ​แล้ว​พระองค์​ก็​ยัง​อยู่​ตี้​หั้น​คน​เดียว 24ส่วน​เฮือ​ของ​หมู่​สาวก​ได้​ออก​จาก​ฝั่ง​ไป​จ้าดไก๋​แล้ว ก่ำลัง​ถูก​คลื่น​ลม​ปั๊ด​ไป​ปั๊ด​มา​ย้อน​เฮือ​ตอ​ลม

25ประมาณ​ตี๋​สาม​เถิง​หก​โมง​เจ๊า พระเยซู​เตียว​บน​น้ำ​ไป​หา​หมู่​เขา 26เมื่อ​หมู่​สาวก​หัน​พระองค์​เตียว​มา​บน​น้ำ ก็​ตกใจ๋​กั๋ว ปา​กั๋น​ฮ้อง​เสียง​ดัง​ว่า “ผี”

27แต่​พระเยซู​อู้​กับ​หมู่​เขา​ต๋อน​นั้น​ว่า “แป๋ง​ใจ๋​ดีๆ ไว้ นี่​เฮา​เน่อ บ่ถ้า​กั๋ว”

28เปโตร​อู้​ว่า “ถ้า​เป๋น​อาจ๋ารย์​แต๊ๆ แล้ว ฮ้อง​ข้าพเจ้า​เตียว​บน​น้ำ​ไป​หา​กำ”

29พระเยซู​บอก​ว่า “มา​แหละ” เปโตร​ก็​ออก​จาก​เฮือ​เตียว​บน​น้ำ​ไป​หา​พระเยซู 30แต่​เมื่อ​เปโตร​หัน​คลื่น​ลม​แฮง​ก็​กั๋ว เมื่อ​ก่ำลัง​จะ​จ๋ม​ลง​น้ำ ก็​เอิ้น​เสียง​ดัง​ว่า “อาจ๋ารย์ จ้วย​กำ​เต๊อะ”

31พระเยซู​ก็​ฟั่ง​ยื่น​มือ​จั๊ก​ตั๋ว​เขา​ไว้​อู้​ว่า “ต้าน​มี​ความ​เจื้อ​หน้อย​แต๊ๆ สงสัย​เยียะ​หยัง”

32เมื่อ​พระเยซู​กับ​เปโตร​ขึ้น​เฮือ​แล้ว​ลม​ก็​ย้าง 33หมู่​สาวก​ตี้​อยู่​ใน​เฮือ​ปา​กั๋น​มา​กราบ​ไหว้​พระเยซู แล้ว​อู้​ว่า “ต้าน​เป๋น​พระบุตร​ของ​พระเจ้า​แต๊ๆ”

พระเยซู​ฮักษา​คน​ป่วย​จ๋ำนวน​นัก

34หลัง​จาก​ข้าม​ฟาก​มา​แล้ว ก็​มา​แผว​ฝั่ง​แคว้น​เยนเนซาเรท 35เมื่อ​คน​ตี้​หั้น​จ๋ำ​พระเยซู​ได้ ก็​ส่ง​ข่าว​เอิ้น​บอก​กั๋น​ไป​ใคว่​แคว้น คน​ตังหลาย​ก็​ปา​คน​ป่วย​มา​หา​พระองค์ 36เปื้อ​อ้อนวอน​ขอ​หยุบ​ตี๋น​เสื้อ​ของ​พระองค์​เต้าอั้น​ก็​ปอ​แล้ว ใผ​ตี้​ได้​หยุบ​ตี๋น​เสื้อ​คุม​ของ​พระองค์​ก็​หาย​ป่วย​กั๋น​หมด​กู้​คน