Search form

โรม 11

พระเจ้า​เมตต๋า​จาว​อิสราเอล

1ข้าพเจ้า​ขอ​ถาม​ว่า “พระเจ้า​ละ​ขว้าง​คน​ของ​พระองค์​แล้ว​กา” บ่ใจ้​เน่อ ข้าพเจ้า​เอง​ก็​เป๋น​จาว​อิสราเอล เป๋น​ลูกหลาน​ของ​อับราฮัม เป๋น​คน​จาก​เผ่า​เบนยามิน 2พระเจ้า​บ่ได้​ละขว้าง​คน​ตี้​พระองค์​เลือก​ไว้​แล้ว​ตั้งแต่​เมื่อ​เก๊าหัวที ต้าน​จ๋ำ​พระคัมภีร์​ตี้​มี​เขียน​ไว้​เกี่ยว​กับ​เอลียาห์​ได้​ก่อ ต๋อน​ตี้​เขา​นาบโต้ษ​จาว​อิสราเอล​ต่อ​พระเจ้า​ว่า 3“พระองค์​เจ้า​ข้า หมู่​เขา​ได้​ฆ่า​ผู้​เป๋น​ปาก​เป๋น​เสียง​แตน​พระองค์ กับ​แต้น​ปู่จา​ของ​พระองค์​เขา​ก็​เต​เหีย เหลือ​ข้า​พระองค์​คน​เดียว แต่​เขา​ก็​ฮิ​ฆ่า​ข้า​พระองค์​ตวย” 4แล้ว​พระเจ้า​ตอบ​เอลียาห์​ว่า​จาใด “เฮา​ยัง​ฮักษา​คน​ของ​เฮา​ไว้​เจ็ด​ปัน​คน เป๋น​คน​ตี้​บ่ได้​กราบ​ไหว้​พระ​บาอัล” 5สมัย​นี้​ก็​เหมือน​กั๋น ยัง​มี​จาว​ยิว​เหลือ​อยู่​พ่อง ตี้​พระเจ้า​เลือก​ไว้​หื้อ​รอด​ป๊น​บาป​โต้ษ​โดย​พระคุณ 6พระเจ้า​เลือก​โดย​พระคุณ​เป๋น​หลัก บ่ใจ้​ต๋าม​ก๋าน​เยียะ​ดี​ของ​มนุษย์ ย้อน​ว่า​ถ้า​เลือก​โดย​ก๋าน​เยียะ​ดี​เป๋น​หลัก พระคุณ​ของ​พระเจ้า​จะ​เป๋น​พระคุณ​ได้​จาใด

7ถ้า​จาอั้น​จะ​ว่า​จาใด​ดี จาว​อิสราเอล​บ่ได้​ปะ​สิ่ง​ตี้​เขา​เซาะ​หา แต่​มี​คน​จ๋ำนวน​หน้อย​ตี้​พระเจ้า​เลือก​ไว้​นั้น​ได้​ปะ ส่วน​จาว​อิสราเอล​คน​อื่นๆ นั้น พระเจ้า​ก็​เยียะ​หื้อ​ใจ๋​เขา​หลึกหลึ่ง​ไป​เหีย 8ต๋าม​ตี้​พระคัมภีร์​มี​เขียน​ไว้​ว่า

“พระเจ้า​เยียะ​หื้อ​จิตใจ๋​เขา​เซื่องซึม

ต๋า​ของ​เขา​ก็​ผ่อ​บ่หัน

หู​ของ​เขา​ก็​บ่ได้ยิน​จ๋น​แผว​ตึง​วัน​นี้”

9กษัตริย์​ดาวิด​ได้​อู้​อย่าง​เดียว​กั๋น​นี้​ไว้​ว่า

“ขอ​หื้อ​ก๋าน​มี​กิ๋น​อย่าง​เหลือเฟือ​ของ​เขา​เป๋น​แฮ้ว​ดัก​เขา

เป๋น​สิ่ง​ตี้​เยียะ​เขา​ล้ม​ลง กับ​ฮับ​ผล​ใน​สิ่ง​ตี้​เยียะ​ไว้

10ขอ​หื้อ​ต๋า​เขา​บอด​ไป เปื้อ​จะ​ได้​ผ่อ​อะหยัง​บ่หัน

กับ​ขอ​หื้อ​หลัง​เขา​ก่อง​ ตลอด​ไป”

11ข้าพเจ้า​ขอ​ถาม​แหม​ว่า จาว​อิสราเอล​ต้าว​จ๋น​ลุก​บ่ได้​กา บ่ใจ้​จาอั้น​เน่อ แต่​ย้อน​บาป​ของ​หมู่​เขา คน​ต่างจ้าด​จึง​ได้​ฮับ​ความ​รอด​ป๊น​บาป​โต้ษ เปื้อ​เยียะ​หื้อ​จาว​อิสราเอล​ขอย 12ถ้า​ก๋าน​เยียะ​บาป​ของ​จาว​อิสราเอล​เยียะ​หื้อ​คน​ตึง​โลก​ได้​ฮับ​ปอน​จาก​พระเจ้า กับ​ถ้า​ความ​ผิดพลาด​ของ​จาว​ยิว​เยียะ​หื้อ​คน​ต่างจ้าด​ได้​ฮับ​ปอน​นัก​ขนาด​นี้ แล้ว​ลอง​กึ๊ด​ผ่อ​เต๊อะ ถ้า​ได้​จาว​ยิว​มา​ยอมฮับ​ครบ​หมด ปอน​จะ​นัก​เหลือ​นั้น​มอก​ใด

13ต๋อน​นี้​ข้าพเจ้า​จะ​อู้​กับ​ต้าน​ตังหลาย​ตี้​เป๋น​คน​ต่างจ้าด​ว่า พระเจ้า​แต่งตั้ง​หื้อ​ข้าพเจ้า​เป๋น​อัครทูต​สำหรับ​คน​ต่างจ้าด ข้าพเจ้า​จึง​ภูมิใจ๋​ใน​พันธกิจ​ของ​ข้าพเจ้า 14เปื้อ​จะ​กระตุ้น​หื้อ​ปี้น้อง​จาว​ยิว​ขอย แล้ว​จะ​ได้​จ้วย​หมู่​เขา​บาง​คน​หื้อ​รอด​ป๊น​บาป​โต้ษ​ได้ 15ย้อน​ถ้า​พระเจ้า​ละ​จาว​ยิว เยียะ​หื้อ​คน​ตึง​โลก​คืนดี​กับ​พระเจ้า จะ​ดี​มอก​ใด​ถ้า​พระเจ้า​จะ​ฮับ​หมู่​จาว​ยิว​ปิ๊ก​มา​แหม​ใหม่ ก็​เป๋น​เหมือน​หมู่​เขา​ต๋าย​แล้ว​แต่​เป๋น​ขึ้น​มา​ใหม่ 16ถ้า​เข้าหนมปัง​ส่วน​แรก​ตี้​เอา​ไป​ถวาย​พระเจ้า​นั้น​บริสุทธิ์ ส่วน​ตี้​เหลือ​ตึง​หมด​ก็​บริสุทธิ์​ตวย เก๊าไม้​ก็​เหมือน​กั๋น ถ้า​ฮาก​ของ​เก๊าไม้​บริสุทธิ์ ตึง​เก๊า​ก็​บริสุทธิ์​ตวย

17แต่​พระเจ้า​ได้​หัก​บาง​กิ่ง​ของ​เก๊า​บ่ากอกเทศ​สวน​ตี้​เผียบ​เหมือน​จาว​ยิว​ออก​เหีย แล้ว​เอา​หมู่​ต้าน​ตี้​เป๋น​คน​ต่างจ้าด​เผียบ​เหมือน​กิ่ง​บ่ากอก​เทศ​ป่า​มา​ต่อ​ไว้​แตน หมู่​ต้าน​จึง​ได้ฮับ​ก๋าน​หล่อเลี้ยง​จาก​ฮาก​เก๊า​บ่ากอก​เทศ​สวน 18หมู่​ต้าน​ห้าม​อวด​ดี​ตี้​ได้​เข้า​แตน​กิ่ง​ตี้​ถูก​หัก​ไป​แล้ว​นั้น ต้าน​จะ​อวด​ดี​ได้​จาใด ต้าน​บ่ได้​หล่อเลี้ยง​ฮาก แต่​เป๋น​ฮาก​เน่อ​ตี้​หล่อเลี้ยง​หมู่​ต้าน

19หมู่​ต้าน​อาจ​อู้​ว่า “กิ่ง​หมู่​นั้น​ถูก​หัก​ขว้าง​เปื้อ​จะ​เอา​หมู่​ข้า​เข้า​มา​แตน” 20ก็​แม่น​อยู่​แล้ว ตี้​หมู่​เขา​ถูก​หัก​ขว้าง​ก็​ย้อน​บ่เจื้อ ตี้​ต้าน​ตังหลาย​อยู่​แตน​ได้​ก็​ย้อน​ว่า​ต้าน​ตังหลาย​เจื้อ​เต้าอั้น ห้าม​อวด​ดี​เน่อ แต่​หื้อ​เก๋งกั๋ว 21ย้อน​ว่า​ถ้า​พระเจ้า​ตัด​จาว​ยิว​ตี้​เป๋น​เหมือน​กิ่ง​เก่า​ได้ พระองค์​ก็​ตัด​ต้าน​ตี้​เป๋น​เหมือน​กิ่ง​ใหม่​ได้​เหมือน​กั๋น 22ย้อนจาอั้น​หื้อ​ตอง​ผ่อ​เรื่อง​ความ​เมตต๋า​กับ​ความ​เด็ดขาด​ของ​พระเจ้า​หื้อ​ดี พระองค์​เยียะ​กับ​คน​ตี้​บ่เจื้อ​อย่าง​เด็ดขาด แต่​จะ​เมตต๋า​ต่อ​ต้าน ถ้า​ต้าน​เยียะ​ตั๋ว​หื้อ​สม​กับ​ความ​เมตต๋า​นั้น​ต่อไป แต่​ถ้า​ต้าน​บ่เยียะ​จาอั้น พระองค์​ก็​จะ​ตัด​ต้าน​ขว้าง​เหมือน​กั๋น 23ส่วน​หมู่​จาว​ยิว​นั้น ถ้า​เปี่ยนใจ๋​ปิ๊ก​มา​เจื้อ​พระเจ้า​แหม พระองค์​ก็​จะ​เอา​หมู่​เขา​ปิ๊ก​มา​ต่อ​กับ​เก๊า​แหม​ใหม่ ย้อน​พระเจ้า​เยียะ​จาอั้น​ได้ 24หมู่​ต้าน​เผียบ​เหมือน​กิ่ง​บ่ากอก​เทศ​ป่า พระเจ้า​ยัง​เอา​มา​ต่อ​เข้า​กับ​เก๊า​บ่ากอกเทศ​สวน​ได้ เซิ่ง​บ่ใจ้​เป๋น​เรื่อง​ปกติ แล้ว​ถ้า​จะ​เอา​จาว​ยิว​ตี้​เผียบ​เหมือน​กิ่ง​ตี้​ถูก​ตัด​ขว้าง​ไป​แล้ว​นั้น มา​ต่อ​เข้า​กับ​เก๊า​เก่า จะ​ง่าย​เหลือ​นั้น​มอก​ใด

ความ​เมตต๋า​ของ​พระเจ้า​ต่อ​กู้​คน

25ปี้น้อง​ตังหลาย ข้าพเจ้า​ใค่​หื้อ​หมู่​ต้าน​ฮู้​เรื่อง​เกี่ยว​กับ​ความ​จริง​อัน​ล้ำเลิ็ก​นี้ เปื้อ​หมู่​ต้าน​จะ​บ่อวด​ฮู้ คือ​หมู่​จาว​อิสราเอล​บาง​ส่วน​ใจ๋แข็ง แต่​จะ​เป๋น​จาอั้น​จ๋น​เถิง​คน​ต่างจ้าด​จะ​เข้า​มา​เจื้อ​พระเจ้า​จ๋น​ครบ​จ๋ำนวน​ก่อน 26ตาง​นี้​ละ เป๋น​ตาง​ตี้​จาว​อิสราเอล​ตึง​หมด​ก็​จะ​ได้​ฮับ​ความ​รอด​ป๊น​บาป​โต้ษ​ต๋าม​ตี้​มี​เขียน​ไว้​ใน​พระคัมภีร์​ว่า

“พระ​ผู้​จ้วย​หื้อ​รอด​ป๊น​บาป​โต้ษ​จะ​มา​จาก​เมือง​ศิโยน

พระองค์​จะ​เอา​ความ​บ่ดี​ตึงหมด​ออก​ไป​จาก​เจื๊อสาย​ของ​ยาโคบ

27นี่​คือ​พันธสัญญา​ของ​เฮา​กับ​หมู่​เขา

เมื่อ​เฮา​ได้​ยก​โต้ษ​บาป​หมู่​เขา​แล้ว”

28จาว​ยิว​บ่ยอมฮับ​ข่าวดี​จึง​เป๋น​ศัตรู๋​ต่อ​พระเจ้า เซิ่ง​เป๋น​ประโยชน์​ต่อ​ต้าน​ตังหลาย ส่วน​เรื่อง​ตี้​พระเจ้า​ได้​เลือก​หมู่​เขา​ไว้ พระองค์​ก็​ยัง​ฮัก​หมู่​เขา ย้อน​เกย​สัญญา​กับ​ป้อ​อุ๊ย​แม่​หม่อน​ของ​หมู่​เขา​ไว้​แล้ว 29ย้อน​เมื่อ​พระเจ้า​หื้อ​ปอน​กับ​ใผ​ก็​จะ​บ่เอา​คืน กับ​เมื่อ​เลือก​ใผ​แล้ว​ก็​จะ​บ่เปี่ยนใจ๋ 30ตะก่อน​ต้าน​ตังหลาย​บ่ได้​เจื้อฟัง​พระเจ้า แต่​บ่าเดี่ยวนี้​พระเจ้า​เมตต๋า​หมู่​ต้าน​ก็​ย้อน​จาว​ยิว​บ่เจื้อฟัง 31ก็​เป๋น​อย่าง​เดียว​กั๋น หมู่​จาว​ยิว​ก็​บ่เจื้อฟัง​พระเจ้า แต่​โดย​ความ​เมตต๋า​ตี้​ได้​หื้อ​กับ​หมู่​ต้าน หมู่​เขา​ก็​ได้ฮับ​ความ​เมตต๋า​จาก​พระเจ้า​ตวย 32ย้อน​ว่า​คน​กู้​คน​ถูก​ก๋ำหนด​หื้อ​อยู่​ใน​ฐานะ​ตี้​บ่เจื้อฟัง​พระเจ้า เปื้อ​พระองค์​จะ​ได้​เมตต๋า​ต่อ​เขา​ตังหลาย​กู้​คน

สรรเสริญ​พระเจ้า

33โอ ปั๋ญญา​กับ​ความ​ฮู้​ของ​พระเจ้า​ก็​ล้ำเลิ็ก

ก๋าน​ตัดสิน​ของ​พระองค์​นั้น​บ่มี​ใผ​อธิบาย​ได้

กับ​วิถี​ตาง​ต่างๆ ของ​พระองค์​ใผ​ก็​บ่เข้าใจ๋

34“ใผ​จะ​ฮู้​จิตใจ๋​ของ​พระองค์​ได้​พ่อง

ใผ​จะ​หื้อ​กำ​เปิ็กษา​พระองค์​ได้”

35“ใผ​หื้อ​สิ่ง​ใด​สิ่ง​นึ่ง​แก่​พระเจ้า​กา พระองค์​เถิง​จะ​ต้อง​ส้าย​เขา”

36ย้อน​ว่า​กู้​สิ่ง​กู้​อย่าง​มา​จาก​พระองค์ โดย​พระองค์ กับ​อยู่​เปื้อ​พระองค์

ขอ​เกียรติ​จง​มี​แก่​พระองค์​ตลอด​ไป อาเมน