Search form

โรม 13

ก๋าน​เจื้อฟัง​ผู้ปกครอง

1ต้าน​กู้​คน​ต้อง​เจื้อฟัง​ผู้​ปกครอง​บ้าน​เมือง ย้อน​ว่า​บ่มี​ใผ​มี​อำนาจ​ปกครอง​ได้​นอกจาก​พระเจ้า​จะ​ยอม ผู้​ปกครอง​ตี้​มี​อยู่​นั้น​พระองค์​เป๋น​ผู้​แต่งตั้ง​หมู่​เขา 2ย้อน​จาอั้น คน​ใด​ตี้​ขัดขืน​ผู้​มี​อำนาจ​นั้น​ก็​ขัดขืน​สิ่ง​ตี้​พระเจ้า​แต่งตั้ง​ตวย แล้ว​คน​ตี้​เยียะ​จาอั้น​ก็​จะ​ถูก​ลงโต้ษ 3คน​ตี้​เยียะ​ตั๋ว​ดี​ก็​บ่ต้อง​กั๋ว​อำนาจ​ของ​ผู้​ปกครอง แต่​คน​ตี้​เยียะ​บ่ดี​นั้น​ต้อง​กั๋ว ถ้า​บ่ใค่​กั๋ว​ผู้​ปกครอง ก็​หื้อ​เยียะ​สิ่ง​ดี​เน่อ แล้ว​หมู่​เขา​ก็​จะ​ปอใจ๋​ต้าน 4ย้อน​ผู้​ปกครอง​บ้าน​เมือง​นั้น​เป๋น​คน​ฮับใจ๊​พระเจ้า​เปื้อ​หื้อ​เป๋น​ประโยชน์​แก่​หมู่​ต้าน แต่​ถ้า​หมู่​ต้าน​เยียะ​บ่ดี​ก็​หื้อ​กั๋ว​เขา​เน่อ ย้อน​หมู่​เขา​มี​อำนาจ​ลงโต้ษ​หมู่​ต้าน​ได้ หมู่​เขา​เป๋น​คน​ฮับใจ๊​ตี้​พระเจ้า​ใจ๊​เปื้อ​ลงโต้ษ​คน​เยียะ​บ่ดี​แตน​พระเจ้า 5ย้อนจาอั้น​ต้าน​ตังหลาย​จ๋ำเป๋น​ต้อง​เจื้อฟัง​ผู้ปกครอง บ่ใจ้​ย้อน​กั๋ว​ถูก​ลงโต้ษ​เต้าอั้น แต่​เจื้อฟัง​ย้อน​เยียะ​ต๋าม​จิต​สำนึก​ของ​ต้าน​ตวย 6จาอั้น ต้าน​ตังหลาย​ต้อง​เสีย​ภาษี​ตวย ย้อน​ว่า​ผู้​มี​อำนาจ​นั้น​เป๋น​ผู้​ฮับใจ๊​ของ​พระเจ้า​ตี้​เยียะ​ต๋าม​หน้าตี้​ของ​เขา​อยู่ 7ต้าน​ต้อง​หื้อ​กู้​คน​ต๋าม​ตี้​ต้อง​หื้อ​เขา คือ​หื้อ​ส่ง​ส่วย​แก่​ผู้​ตี้​ต้อง​ส่ง หื้อ​เสีย​ภาษี​แก่​คน​ตี้​ต้อง​เสีย​หื้อ หื้อ​ยำเก๋ง​แก่​คน​ตี้​ต้อง​ยำเก๋ง หื้อ​เกียรติ​แก่​คน​ตี้​สมควร​ได้ฮับ

หน้า​ตี้​ของ​เฮา

8บ่ดี​เป๋น​หนี้​ใผ ยกเว้น​หนี้​ตี้​เกี่ยวกับ​ความ​ฮัก​ตี้​มี​ต่อ​กั๋น คน​ใด​ตี้​ฮัก​คน​อื่น​ก็​ได้​เยียะ​ต๋าม​บท​บัญญัติ​ครบถ้วน​แล้ว 9บท​บัญญัติ​มี​ว่า “ห้าม​เป๋น​จู๊​ผัว​เมีย​เปิ้น ห้าม​ฆ่า​คน ห้าม​ลัก​ของ ห้าม​โลภ” ข้อ​หมู่​นี้​ตึง​ข้อ​อื่นๆ ก็​รวม​อยู่​ใน​ข้อ​เดียว​นี้ คือ “จง​ฮัก​เปื้อน​บ้าน​เหมือน​ฮัก​ตั๋ว​เก่า” 10ความ​ฮัก​บ่เยียะ​อันตราย​หื้อ​เปื้อน​บ้าน จาอั้น​ความ​ฮัก​จึง​เป๋น​ก๋าน​เยียะ​ต๋าม​บท​บัญญัติ​ครบถ้วน

11หื้อ​ต้าน​เยียะ​จาอี้​ย้อน​ต้าน​ฮู้​ดี​ว่า บ่าเดี่ยว​นี้​เถิง​เวลา​ตี้​สมควร​จะ​ตื่น​จาก​หลับ​แล้ว เวลา​ตี้​เฮา​จะ​ได้ฮับ​ความ​รอด​นั้น​ก็​ใก้​เข้า​มา​เถิง​เหลือ​ต๋อน​ตี้​เฮา​ฮับ​เจื้อ​ใหม่ๆ 12เมื่อคืน​ใก้​จะ​ผ่าน​ไป​แล้ว ต๋อน​เจ๊า​ก็​ใก้​เข้า​มา ย้อนจาอั้น​หื้อ​เลิก​เยียะ​สิ่ง​ตี้​เป๋น​ของ​ความ​มืด​เหีย แล้ว​ใส่​เครื่อง​ป้องกั๋น​ตี้​เป๋น​ของ​ความ​เป่งแจ้ง 13หื้อ​หมู่​เฮา​ใจ๊​จีวิต​หื้อ​สม​กับ​เป๋น​คน​ตี้​อยู่​ใน​ความ​เป่งแจ้ง บ่ใจ้​กิ๋น​เลี้ยง​เมา​เหล้า​กั๋น บ่ใจ้​เยียะ​บาป​ตาง​เพศ​กับ​ลามก บ่ใจ้​ผิดหัว​กั๋น​กับ​ขอย​กั๋น 14แต่​ต้าน​ตังหลาย​ควร​เยียะ​ตั๋ว​ต๋าม​แบบ​อย่าง​พระเยซู​คริสต์ องค์​พระ​ผู้​เป๋น​เจ้า กับ​ห้าม​เปิด​โอกาส​หื้อ​เยียะ​ต๋าม​กิเลส​ตั๋ณหา​ของ​สันดาน​บาป