Search form

San Juan 11

Mikki n Lázaro

1Itech altepetl de Betania okatka se tlakatl non omokokoaya. Ye itoka Lázaro, iwa ochantitoka iwan iweltiwah María iwa Marta. 2Nin María iwelti n Lázaro, ye akin okinxawili ajwiálistli itech ikxiwah n Toteko iwa okinwajwachili ika itsonkal. 3Ijkó kiné, iweltiwah n Lázaro otlatitlankeh makilitih n Jesús:

—Tejwatsi, motlasojikni Lázaro mokokoa.

4Ijkuak Jesús okikak, okijto:

—Nin kokólistli amo kimiktis, yej ika noni moteititis iweyijkachiwalis Dios, iwa ika non kokólistli noiwa kiweyijkachiwaskeh Ikone Dios.

5Jesús okintlasojtlaya n Marta, María iwa n Lázaro. 6Ijkuak okilijkeh Lázaro omokokoaya, Ye ok omoka ome tonati kan okatka. 7Otlanki Jesús okinmili itlamachtijkawah:

—Matimokopakah Judea.

8Ijkuakó itlamachtijkawah okilijkeh:

—Tlamachti, ayamó wejkawa n tlayakankeh judíojteh okinekiah mitsmiktiskeh ika tetl; ¿iwa oksepa tikneki timuikas ompa?

9Jesús okinmili:

—Se tonati kipia májtlaktli iwa ome ora. Tla se tlakatl nemis ijkuak tlanestok amo moikxitlanwis, porke kita n tláwili non kajki itech nin tlaltíkpaktli, 10pero tla se tlakatl nemi de yuak, moikxitlanwia porke n tláwili amo kajki itech.

11Satepa Jesús okinmili:

—Totlasoj Lázaro kochtok, iwa Ne nio nikijxititi.

12Ijkuakó itlamachtijkawah okilijkeh:

—Tejwatsi, tla san kochtok, pajtis.

13Pero Jesús okinekia kimilis Lázaro yomikki, pero itlamachtijkawah okiyejyekoliayah chamo okintlapowijtoka de n kochílistli non tinochteh tikpiah. 14Ijkuakó Jesús okinyekili:

—Lázaro yomikki. 15Iwa nipaki porke amo ompa onikatka, ijkó nomejwah nontlaneltokaskeh. Tiawih, matikitatih.

16Ijkuakó Tomás non okiliayah Kuatsi, okinmili non oksikimeh itlamachtijkawah:

—Matiwiah tejwah noiwa, para timikiskeh iwan Jesús.

Jesús teyolitia iwa kitemaka nemílistli

17Ijkuak Jesús okalakito Betania, Lázaro yokiwikaya nawi tonati tooktok. 18Betania amo wejka omokawaya de Jerusalén, san kanaj eyi kilómetro. 19Miakeh judíojteh owalajkeh otetlajpaloko ichan Marta iwa n María para kinyolchikawaskeh porke omikki inmikni. 20Ijkuak Marta okima Jesús yompa owalaya, okinamikito, pero María omoka itech kali. 21Iwa Marta okili n Jesús:

—Noteko, tla nika tiyetoskia, nokni amo mikiskia. 22Pero ne nikmati Dios mitsmakas nochi tlan Te tiktlajtlanilis.

23Jesús okili:

—Mokni moyolitis.

24Marta okili:

—Milák, ne nikmati moyolitis ijkuak non yomikeh moyolitiskeh itech n iksemi tonati.

25Ijkuakó Jesús okili:

—Ne niktemaka nemílistli iwa yolílistli. Akin nechneltokas maya mamiki, yolitos nochipa. 26Iwa nochteh akimeh yolitokeh iwa nechneltokah ayik mikiskeh. ¿Tikneltoka?

27Marta okili:

—Ejé, Noteko, ne nikneltoka Tejwatsi Ti Cristo Ikone Dios, Akin walaskia itech nin tlaltíkpaktli.

Jesús choka kan okitookakeh n Lázaro

28Ijkuak ijkí okijto, Marta oyá san ichtakatsi okinotsato ikni María iwa okili:

—N Tlamachti nika moitstika iwa mitsnotsa.

29Ijkuak María okikak tlan Marta okili, omoketíkiski iwa okitato n Jesús. 30Jesús ayamó okalakia kan altepetl, ok okatka kan Marta okajsito. 31Ijkuak n tlayakankeh judíojteh non okatkah itech kali okitakeh kenijki n María omoketíkiski, okikuitlapantokakeh. Okiyejyekoliayah chamo oyaya kichokiliti n Lázaro kan okitookakeh.

32Ijkuak María okalakito kan okatka n Jesús, omotlankuáketski inawak iwa okili:

—Noteko, tla nika tiyetoskia, nokni amo mikiskia.

33Ijkuak Jesús okitak n María chokatok, iwa n judíojteh non okikuitlapantokayah noiwa, Jesús oyoltélinki asta oyolpatsiwik. 34Iwa okintlajtlani:

—¿Kani ononkitookakeh?

Yejwah okilijkeh:

—Tejwatsi, nika xiwalmuika iwa xikitaki.

35Iwa Jesús ochokak. 36N tlayakankeh judíojteh okijtojkeh:

—¡Xikitakah, milák okitlasojtlaya!

37Pero oksikimeh okijtojkeh:

—Tla owéletki okimák itlachialis non amo otlachiaya, ¿amo weletiskia kichiwaskia itla para amo mamiki n Lázaro?

Jesús kiyolitia n Lázaro

38Jesús oksepa omoyolkoko iwa omijkuani kan okitookakeh n Lázaro. Non miketékochtli okatka ijtik se kúyoktli iwa otentsaktoka ika se tetl. 39Jesús okinmili:

—Xikachiwakah n tetl.

Marta, iwelti n Lázaro, okili n Jesús:

—Noteko, ye ya fiero kistos porke ya kipia nawi tonati tooktok.

40Pero Jesús okili:

—Yonimitsili, tla titlaneltokas tikitas iweyijkachiwalis Dios.

41Ijkuakó okachijkeh n tetl. Jesús oajkotláchixki ilwikak iwa okijto:

—Notajtsi, nimitstlasojkamati porke otechkak. 42Ne nikmatok nochipa techkaki, iwa ijkí nikijtoa para n tlakah non nika kateh makineltokakah Tejwatsi otechaltítlanki.

43Ijkuak ijkí otlanki okijto, chikawak okitsajtsili:

—¡Lázaro, xiwalkisa!

44Ijkuakó n miketl owálkiski kikekemelitiwits ika tsótsoli itech ikxiwah iwa itech imawah, iwa oixtsaktiwalaya ika se tsótsoli. Iwa Jesús okinmili:

—Xiktojtomakah iwa xikkawilikah mawia.

Motlatlalwiah kenijki kimiktiskeh n Jesús

(Mt. 26:1-5; Mr. 14:1-2; Lc. 22:1-2)

45Miakeh judíojteh non okiyolchikawatoh n María, ijkuak okitakeh tlan okichi n Jesús, okineltokakeh. 46Pero sikimeh okimitatoh n fariseos iwa okimilijkeh tlan Jesús okichi. 47Ijkuakó n tiopixkeh non tlayakantokeh, n fariseos iwa n tekiwajkeh de Sanedrín+ omoololojkeh iwa okimolijkeh:

—¿Tlan tikchiwaskeh? Nin tlakatl kinchijtinemi miakeh milagros. 48Tla tikkawiliskeh ijkó makichijtinemi, nochteh pewas kineltokaskeh, iwa n tekiwajkeh de Roma witseh kixixititsakiweh n Weyi Tiopa iwa n nochi topaís.

49Ijkuakó seme de yejwah non itoka Caifás, non itech non xiwitl okinnawatiaya n tiopixkeh, okinmili:

—Nomejwah amitla nonkimatih, 50amo nonkajsikamatih okachi kuali mamiki san se tlakatl por tinochteh, iwa amo makipojpolokah nochi topaís.

51Ninteh itlajtolwah n Caifás amo inewia okimijto, yej kemi ye okatka weyi tiópixki non xiwitl, Dios okitlajtolti Jesús mikiskia por nochteh. 52Iwa amo mikiskia san por n judíojteh, yej noiwa para kinseitilis nochteh ipilwah Dios non sentetl oxitintokah. 53Yika desde non tonati opé kitemoliah kenijki kimiktiskeh n Jesús.

54Ika noni, Jesús ayakmó omoteititiaya inmixpah n judíojteh, yej oyá kan se altepetl non itoka Efraín non kajki kan ik tlaltejtéyinki, iwa ompa omoka iwa itlamachtijkawah.

55Yowalajsitiwalaya n ilwitl de Paskua de n judíojteh. Miakeh okisayah de inmaltépeu iwa otlejkoayah Jerusalén para motlajtlakolchipawaskeh achto de pewas inmilwiu. 56Yejwah okixtemojtinemiah n Jesús kan Weyi Tiopa iwa omotlajtlaniayah:

—¿Tlan non kimoliah? ¿Wits itech ilwitl noso, amo wits?

57N fariseos iwa n tiopixkeh non tlayakantokeh otlanawatijkeh tla aka kimatis kan kajki n Jesús, makinmatilti para kikitskiskeh.

Itlajtol Totajtsi Dios

© 2011, Wycliffe Bible Translators, Inc. All rights reserved. More Info | Version Index