Search form

San Lucas 18

N iknosiwatl iwa n jues

1Jesús okinmili se tlapoálistli para kinmititis nochipa mamotiotsajtsilikah, iwa ayik mamosotlawakah. 2Iwa okinmili:

—Itech se altepetl okatka se tekiwa, non amo okiimakajsia Dios, nion okintlakitaya n tlakah. 3Itech non altepetl, noiwa ochantitoka se iknosiwatl, akin nochipa okualtlajtlaniliaya n tekiwa makipalewi porke aka okikokoliaya iwa okitlajtoltemoliaya. 4Pero n tekiwa mach okikakia tlan okiliaya n iknosiwatl, pero satepa okimoli: “Maya amo nikiimakajsi Dios nion aka nechtekipachoa, 5nikpalewis nin iknosiwatl iwa ayakmó mawalajto, para ayakmó manechkuejso, porke tla amo nikpalewis nochipa nechkuejsolojtos.”

6N Toteko ok okijto:

—Ye ni tlan okijto n amokuali tekiwa. 7Pero Ne nomechilia: ¿Amo kimpalewis Dios akimeh Ye okimpéjpenki, iwa motiotsajtsiliah tlajka iwa n yuak?, noso ¿kintoktis mamochiakah? 8Ne nomechilia Ye kimpalewis iwa amo wejkawas. Pero ijkuak Ne Non onimochi ni tlakatl niwalmokopas, ¿kechmeh ok kipiaskeh tlaneltokálistli inawak Dios?

N fariseo iwa n tominoololo

9N fariseos satlawel omomachiliayah kualteh n tlakah. Yejwah okintlawelitayah oksikimeh tlakah. Ijkó kiné Jesús okinmili:

10—Ome tlakah omotiotsajtsilitoh kan Weyi Tiopa: se fariseo, iwa n ok se tominoololo. 11N fariseo omoketoka iwa ijkí omotiotsajtsiliaya: “Notajtsi Dios, nimitstlasojkamati porke ne mach kemi n oksikimeh, yejwah ichtekeh, amokualteh iwa mekatánajteh, iwa ne amo kemi nin tominoololo. 12Ne nochipa nimosawa ome tonati itech se samano, iwa nimitsmaka májtlaktli de se siento de nochi tlan niktlani.” 13Pero n tominoololo san wejka omoka iwa amo omixewiaya kajkokuis itlachialis, yej omoelpanwitekiaya iwa okijtoaya: “¡Noteko Dios, techiknomati, ne saikpanoa nitlajtlakolchiwa!” 14Ne nomechilia, nin tominoololo omókopki icha ika itlapojpolwilis Dios, pero n fariseo amó. Porke akin inewia moweyilia kipijpinatiskeh, iwa akin amo kimati moweyilia, okachi kitlakitaskeh.

Jesús kintiochiwa n pípilteh

(Mt. 19:13-15; Mr. 10:13-16)

15Noiwa okwalinwikiliayah n pípilteh inawak Jesús, para makintlalili imawah intech. Pero ijkuak itlamachtijkawah ijkí okitakeh, opé kimajwah akimeh okwalinwikiliayah n pípilteh. 16Pero Jesús okínnotski itlamachtijkawah iwa okinmili:

—Xikinkawilikah n pípilteh mawikih nonawak, amo xikintsakuilikah, porke akimeh yolyamankeh kemi n pípilteh, kalakiskeh kan Dios tlanawatijtok. 17De milajka nomechilia, akin amo kikawilis Dios matlanawati itech iyolo kemi se chokotsi kimokawilia makinawatikah, non tlakatl mach kalakis kan Dios tlanawatijtok.

Se télpochtli non kitlawelpia tomi motlapowia iwan Jesús

(Mt. 19:16-30; Mr. 10:17-31)

18Se tlayákanki okitlajtlani n Jesús:

—Kuali tlamachti, ¿tlan moneki nikchiwas para niyolitos nochipa kan ilwikak?

19Jesús okili:

—¿Tleka techilia nikuali? Sanwel onka se Akin kuali, Ye Dios. 20Te tikinmixmati n tlanawatílisteh:

“Amo ximomekati;

amo xitemikti;

amo xitlachteki;

amo xixolopijti;

xiktlakita mota iwa n mona.”

21N tlakatl okili:

—Ninteh tlanawatílisteh nikinchijtiwits desde ni telpotsintli.

22Ijkuak Jesús ijkó okikak, okili n tlakatl:

—Ok mitspoloa tikchiwas itla: xiknamaka nochi tlan tikpia iwa xikinxejxelili n próbesteh, ijkó tiktlawelpias kan ilwikak; tlamis xiwiki nowa.

23Pero ijkuak n tlakatl ijkó okikak, satlawel omoyolkoko, porke okitlawelpiaya tomi. 24Ijkuak Jesús okitak omoyolkoko, iwa okijto:

—¡Owi kalakiskeh kan Dios tlanawatijtok akimeh kitlawelpiah tomi! 25Okachi amo owi panos se “kameyo”+ kan ik iixtololo se akuxa, iwa amo se non kitlawelpia tomi makalaki ilwikak.

26Yika akimeh ijkó okikakeh okijtojkeh:

—Tla ijkó, ¿akin kalakis kan Dios tlanawatijtok?

27Jesús okinmili:

—Tlan amo weletih kichiwah n tlakah, Dios weleti kichiwa.

28Ijkuakó, Pedro okili:

—Tejwah otikkakajtejkeh nochi tlan otikpiayah, iwa otiwalajkeh mowah.

29Ijkuakó Jesús okinnankili:

—De milajka nomechilia, akin kikakajtewa icha, itajwah, ikniwah, isiwa, noso ipilwah, para kichiwas tlan Dios kinawatia, 30noni kiselis okachi miak itech nin tlaltíkpaktli; iwa itech n tonatijmeh non sikin witseh, yolitos nochipa.

Oksepa Jesús kinmatiltia imikilis

(Mt. 20:17-19; Mr. 10:32-34)

31Satepa, Jesús okinmoololo n májtlakteh iwa ome itlamachtijkawah iwa okinmili:

—Xikkakikah, axa tiawih Jerusalén, Ne Non onimochi ni tlakatl nechtoktiskeh nochi tlan okijkuilojkeh n profetas. 32Ompa nechtemakaskeh inmak non amo judíojteh, nechpijpinawiskeh, nechwijwikaltiskeh iwa nechchijchawiskeh. 33Nechwitekiskeh, tlamis nechmiktiskeh. Iwa ipan eyi tonati nimoyolitis.

34Itlamachtijkawah mach itla okajsikamatkeh, nion okimatiah tlan okintlapowiaya.

Jesús kipajtia se tlakatl de Jericó non amo otlachiaya

(Mt. 20:29-34; Mr. 10:46-52)

35Ijkuak Jesús ya onajsia kan altepetl de Jericó, se tlakatl non amo otlachiaya omijtlanijtoka inakastla n ojtli. 36Ijkuak n tlakatl non amo otlachiaya okinkak panotokeh miakeh tlakah, otlájtlanki tlan otlamochijtoka. 37Okilijkeh Jesús de Nazaret ik ompa opanotoka. 38Ijkuakó non tlakatl otsajtsik chikawak iwa okijto:

—¡Jesús, Ikone n David, techiknomati!

39N tlakah non oyayah tlayakapa okajwakeh para makitsakua ikamak. Pero ye okachi chikawak otsajtsik:

—¡Ikone n David, techiknomati!

40Ijkuakó Jesús omóketski iwa otlanawati makualikilikah n tlakatl; iwa ijkuak okualikilijkeh, Jesús okitlajtlani:

41—¿Tlan tikneki manimitstokti?

N tlakatl non amo otlachiaya otlanankili:

—Noteko, nikneki nitlachias.

42Jesús okili:

—¡Xitlachia! Por motlaneltokalis yotipajtik.

43San nima n tlakatl non amo otlachiaya owaltláchixki, iwa oyá iwan Jesús kiweyijkachijti n Totajtsi Dios. Iwa nochteh n tlakah ijkuak ijkó okitakeh, noiwa okiweyijkachijkeh Dios.

Itlajtol Totajtsi Dios

© 2011, Wycliffe Bible Translators, Inc. All rights reserved. More Info | Version Index