Search form

San Lucas 20

Kitlajtlaniah n Jesús akin okitekiwajtlali

(Mt. 21:23-27; Mr. 11:27-33)

1Se tonati, ijkuak Jesús okinmachtijtoka n tlakah n kualitlájtoli kan Weyi Tiopa, owalajkeh n tiopixkeh non tlayakantokeh, non kitemachtiah n tlanawatílistli iwa n tetajmeh non tlayakantokeh kan tiopa, 2iwa okitlajtlanijkeh:

—Techili, ¿akin omitsnawati ijkó xikchiwa? Iwa, ¿akin omitsmák non tekiwajyotl?

3Jesús okinnankili:

—Ne noiwa nomechtlajtlanis, iwa technankilikah: 4¿Akin okinawati n Juan matlakuaateki? ¿Okinawati Dios noso n tlakah?

5Yejwah opé moichtakatlajtoltiah iwa okijtoayah:

—¿Tlan tikijtoskeh? Tla tikijtoskeh Dios okinawati, Ye techilis: “¿Tleka mach ononkineltokakeh?” 6Pero, tla tikijtoskeh n tlakah okinawatijkeh, nochteh n tlakah techmokitskiliskeh ika tetl iwa techmiktiskeh, porke yejwah kuali kimatokeh Juan iprofeta n Dios.

7Ijkuakó, yejwah okinankilijkeh mach okimatiah. 8Ijkuakó Jesús okinmili:

—Ne noiwa mach nomechilis akin onechmák nin tekiwajyotl.

N tekitkeh amokualteh

(Mt. 21:33-44; Mr. 12:1-11)

9Otlanki Jesús opé kintlapowia ika nin tlapoálistli:

—Se tlakatl okintookak miakeh uvaskuaujmeh itlala. Satepa okinmák partido sikimeh uvastekitkeh, iwa non tekowa wejka oyá, iwa owejkawato. 10Iwa ijkuak oajsiko n tonati para motlatekis, n tekowa okitítlanki se itlakewal makitlajkoxelilikah n uvas. Pero n uvastekitkeh okitekilmakakeh itlakewal n tekowa iwa okikopkeh mapijpilkati. 11Otlanki n tekowa okitítlanki ok se itlakewal. Pero n uvastekitkeh noiwa okitekilmakakeh, okiwijwikaltijkeh iwa okikopkeh noiwa mapijpilkati. 12Niman, n tekowa okitítlanki ok se itlakewal, pero n uvastekitkeh noiwa okikojkojkeh iwa okwalkixtijkeh.

13'Ijkuakó n tekowa okijto: “¿Axa tlan nikchiwas? Niktitlanis nopiltsi non satlawel niktlasojtla, ijkuak kitaskeh, ye okachi kitlakitaskeh.” 14Pero ijkuak n uvastekitkeh okitakeh ipiltsi n tekowa, okijtojkeh: “Ye ni akin kiselis tlan iaxka n tekowa; matikmiktikah iwa ijkó tejwah tikmokawiskeh n lawerta.” 15Ijkuakó, n uvastekitkeh okwalkixtijkeh de kan lawerta iwa okimiktijkeh.

Ijkuakó Jesús okintlajtlani:

—Axa, ¿tlan nonkiyejyekoliah kintoktis n tekowa nonteh uvastekitkeh amokualteh? 16Ye yas iwa kinmijmiktis nonteh uvastekitkeh, iwa ilawerta kinmaktilis oksikimeh.

Ijkuak yejwah ijkí okikakeh, okijtojkeh:

—¡Amo Dios makimonekilti!

17Pero Jesús okintlajtlatak iwa okinmili:

—¿Tlan kijtosneki itlajkuilol Dios kan kijtoa?

N tetl non n kalchijchijkeh okontlakaltechojkeh,

omochiwako non okachi tetlakxili. Sal. 118:22

18Akin wetsis ipan non tetl mopopostekis.

Pero tla n tetl wetsis ipan se, kikuejkuechos. Is. 8:14-15

Kitlajtoltiah n Jesús kox kuali se kitlaxtlawas impuestos

(Mt. 21:45-46; 22:15-22; Mr. 12:13-17)

19Ijkuak n tiopixkeh non tlayakantokeh iwa non kitemachtiah n tlanawatílistli, okajsikamatkeh n Jesús okinkakitijtoka non tlájtoli. Satlawel okualankeh iwa okinekiah kikitskiskeh, pero mach okikitskijkeh porke okinmawiliayah n tlakah. 20Ijkuakó okintitlankeh sikimeh teixkajkayajkeh inawak Jesús para makikajkakitih tlan kijtoa, iwa ijkó weletis kitemaktiskeh inawak n gobernador. 21Yika ijkí okitlajtlanijkeh:

—Tlamachti, tikmatokeh tlan tikijtoa iwa tlan tiktemachtia milák, iwa amo san tikpejpena motemachtilis. Tejwatsi kuali titlamachtia ijkó kemi Dios kimonekiltia matiyeknemikah. 22Techonili: ¿Kuali ka matiktlaxtlawakah impuestos inawak n romanojtekiwa, noso amó?

23Pero Jesús okajsikama san okiyejyekojtokah iwa okinmili:

—¿Tleka nonnechyejyekoah? 24Techititikah se denariojtomi. ¿De akin ixko nikan ka?, iwa ¿akin itoka ijkuilitok?

Yejwah okinankilijkeh:

—De César.

25Ijkuakó Jesús okinmili:

—Xikmakakah n César tlan iaxka n César, iwa xikmakakah Dios tlan iaxka n Dios.

26Iwa n tlakah mach itla okajxililijkeh itech tlan okijtoaya non ika kiteiliskiah, yej omotlajtlachialtijkeh kenijki okinnankili, yika san owalmokakajkeh.

N saduseos kitlajtlaniah n Jesús kox oksepa moyolitiah non yomikkeh

(Mt. 22:23-33; Mr. 12:18-27)

27Satepa sikimeh saduseos non amo kineltokah non yomikkeh oksepa moyolitiah, omijkuanijkeh inawak Jesús iwa okitlajtlanijkeh:

28—Tlamachti, itech itlanawatil Moisés ijkí otechtlajkuilili, tla se tlakatl non ya kipia isiwa, mikki iwa amo okímpixki ipilwah iwan isiwa, n iknosiwatl moneki mamonamikti iwan ikni non yomikki para makinmaka ipilwah ikni non yomikki. Dt. 25:5 29Yowejka okatkah chikome iknimeh. Non teteachka omonamikti pero omikki iwa amo okinkajteh ipilwah. 30Itsoyo non omikki omonamikti iwan iknosiwatl. Pero noiwa omikki iwa amo okinkajtewili ipilwah. 31Ijkuakó non ipan eyi iknimeh noiwa omonamikti iwa n iknosiwatl; iwa nochteh n iknimeh omonamiktijtiajkeh iwa non iknosiwatl pero nochteh omijmiktiajkeh, iwa nion seme de yejwah okimák se konetl non siwatl. 32Sa iksemi, n siwatl noiwa omikki. 33Axa, ijkuak non yomikkeh moyolitiskeh, nin siwatl ¿de akin yetos tesiwa, tla n chikome iknimeh omonamiktijkeh iwa non siwatl?

34Ijkuakó Jesús okinmili:

—Itech nin tlaltíkpaktli, n tlakah iwa n siwameh monamiktiah. 35Pero ijkuak moyolitiskeh non yomikkeh, akimeh Dios kinkawilis makalakitih kan ilwikak; ompa ayakmó monamiktiskeh nion kintemakaskeh impilwah mamonamiktikah, 36porke ompa mach ok mikiskeh. Yetoskeh kemi ángelteh, iwa yetoskeh tepilwah de Dios porke omoyolitijkeh. 37Inewia n Moisés itech itlajkuilol de n tlátsmoli non otlatlaya, otechmatilti non yomikkeh oksepa moyolitiskeh. Ompa nestok kan Moisés kijtoa n Totajtsi, Ye Idios Abraham, Isaac, iwa Jacob. 38Porke Dios amo Dios de non yomikkeh, yej de akimeh yolitokeh, porke ixpa n Ye nochteh yolitokeh.

39Ijkuakó sikimeh non kitemachtiah n tlanawatílistli okilijkeh:

—Tlamachti, kuali tlan otikijto.

40Iwa ayakmó omixewijkeh okachi kitlatlajtlaniskeh.

Jesús kintlajtlania n fariseos akin Ikone n Cristo

(Mt. 22:41-46; Mr. 12:35-37)

41Jesús okinmili:

—¿Kenomi nonkijtoah Cristo ikone n David? 42Porke n David inewia kijtoa itech salmos:

N Totajtsi Dios okili n Noteko:

“Ximoyayanti noyekma,

43asta manikintlali mokokolikniwah itlampa mokxiwah.” Sal. 110:1

44Tla inewia n David kilia n Cristo, Noteko; ¿kenomi n Cristo weletis yetos ikone n David?

Jesús kinteilia non kitemachtiah n tlanawatílistli

(Mt. 23:1-36; Mr. 12:38-40; Lc. 11:37-54)

45Nochteh n tlakah okikaktokah ijkuak Jesús okinmili itlamachtijkawah:

46—Ximotlachilikah de akimeh kitemachtiah n tlanawatílistli, porke kiwilitah nemiskeh ika intlakeh weweyak, iwa kinekih makinyektlajpalokah ijkuak nemi tiánkistli. Iwa itech sinagogas kiwilitah motlaliskeh kan motlaliah n tlayakankeh, iwa kiwilitah motlaliskeh kan okachi kualteh lojarteh itech ilwimeh. 47Noiwa kintlakijkixtiliah n iknosiwameh, iwa para amaka makimati, satlawel motiotsajtsiliah. Ne nomechilia, ninteh kiseliskeh okachi weyi tlaijyowílistli.

Itlajtol Totajtsi Dios

© 2011, Wycliffe Bible Translators, Inc. All rights reserved. More Info | Version Index