Search form

San Lucas 24

Jesús moyolitia

(Mt. 28:1-10; Mr. 16:1-8; Jn. 20:1-10)

1Semi san kuinal, itech ipewaya n samano, n siwameh oyajkeh kan otooktoka n Jesús, iwa okinwikayah ajwiakpajmeh non yejwah yokichijchijkeh, noiwa oksikimeh siwameh oyayah ínwah. 2Ijkuak n siwameh okalakitoh kan okitookakeh Jesús, n tetl non okitentsaktoka n miketékochtli yokachijka. 3Iwa okalakeh, pero mach okajsikeh ikuerpo n Toteko Jesús. 4Yejwah ayakmó okimatiah tlan kichiwaskeh. San nima ome tlakah non otlakentsotlaniah, okinmonextilijkeh innakastla. 5Kemi yejwah satlawel omomojtijkeh, omotlankuaketskeh asta okitelkotoh n tlali ika inmixkuak, pero nonteh tlakah okinmilijkeh:

—¿Tleka nonkitemoah kan yomikkeh, Akin yolitok? 6Mach nikan ka, Ye yomoyoliti. Xikilnamikikah tlan onomechili ijkuak ok okatka Galilea, 7noiwa onomechili Ye Akin omochi tlakatl kitemaktiskiah inmak n tlajtlakolejkeh, iwa kikrusifikaroskiah, pero ipan eyi tonati moyolitiskia.

8Ijkuakó n siwameh okilnamikeh tlan Jesús okimilijka, 9iwa ijkuak yomokopatoh de kan miketékochtli, nochi tlan yejwah okitakeh ompa, n siwameh okintlapowijkeh n májtlakteh iwa n se itlamachtijkawah iwa akimeh ompa okatkah. 10N siwameh yejwah ninteh: María de Magdala, Juana, María, ina n Jacobo, iwa n oksikimeh siwameh. 11Pero itlamachtijkawah okimoliayah chamo kuatlapolojtokeh, iwa mach okinneltokakeh.

12Pero n Pedro okistewak iwa omotlelo kan miketékochtli, iwa ijkuak oontláchixki tlaijtik, sanwel okimitak n tsótsolteh tlakaltechitokeh. Ijkuakó omókopki icha, iwa satlawel okitlajtlachialti tlan otlamochijka.

Jesús kinmonextilia itech ojtli de Emaús

(Mr. 16:12-13)

13Non tonati, ome itlamachtijkawah oyayah para n altepetl non itoka Emaús, non omokawaya kemi májtlaktli iwa n se kilómetro wejka de Jerusalén. 14Yejwah omotlatlapowijtiayah tlan otlamochijka. 15Iwa ijkuak yejwah omotlatlapowijtiayah iwa omotlatlajtolkopayah, Jesús inewia omijkuani innawak iwa opé nejnemi ínwah. 16Pero maya okitayah, mach okixmatkeh. 17Ijkuakó Jesús okintlajtlani:

—¿Tlan semi nonkimolijtiwih? ¿Tleka nonmoyolkokoah?

18Se de yejwah, non omonotsaya Cleofas, okinankili:

—Nochteh n tlakah kimatokeh tlan otlamochi kan Jerusalén itech ninteh tonatijmeh. ¿Te timokalotijtok ompa iwa amo tikmati?

19Ijkuakó Jesús okintlajtlani:

—¿Tlan otlamochi?

Yejwah okinankilijkeh:

—¿Amo otikma tlan okitoktijkeh n Jesús non owalewatoka de Nazaret? Ye se profeta weletini itech nochi tlan okijtoaya iwa tlan okichiwaya inawak Dios iwa innawak n tlakah. 20¿Amo otikma n tiopixkeh non tlayakantokeh sansikah iwa n totekiwajkawah okitemaktijkeh para makitlaijyowiltikah iwa makimiktikah? 21Tejwah otimoyolchikawayah itech porke otikneltokayah Ye akin kimakixtiskia nochi Israel. Pero axa ya kipia eyi tonati ijkó otlamochi. 22Iwa axa, sikimeh siwameh non towah mopoah yotechmomojtijkeh, porke yejwah san kuinal oyajkeh kan miketékochtli. 23Amo okajsikeh ikuerpo Jesús. Ijkuakó owalajkeh otechilikoh okimitakeh sikimeh ángelteh non okimilijkeh Jesús yolitok. 24Okachi satepa, sikimeh tlakah non towah mopoah oyajkeh kan miketékochtli, iwa okajsitoh kemi n siwameh otechilijkeh, pero mach okitakeh n Jesús.

25Ijkuakó Jesús okinmili:

—¡Nomejwah yolik nonteajsikamatih, tleka owi nonkineltokah tlan okitemachtijkeh n profetas! 26¿Mach amo omonekia matlaijyowi n Cristo iwa satepa kiweyijkachiwaskiah?

27Ijkuakó Jesús opé kinmajsikamatiltia itlajkuilol n Moisés iwa n profetas kan tlapoah de Ye.

28Ijkuak okalakitoh Emaús, Jesús omochi kemi ok oyaya okachi tlayakapa. 29Pero yejwah okitlatlautijkeh mamokawa, iwa okilijkeh:

—Ximokawa towah, yopé tleyua.

Ijkuakó Jesús okalak itech non altepetl iwa omoka inwah. 30Iwa ijkuak yoewatoka inwah kan motlamajsewiskiah, okónanki n paj, omotlasojkama inawak Dios, iwa okinmajmák makimomajsewikah. 31Ijkuakó okimachilijkeh kemi owalmoixtlajtlapojkeh, iwa okiyekixmatkeh Ye n Jesús, pero Ye san owalpoliwik. 32Iwa yejwah opé kimoliah:

—Satlawel otiyoltlatlayah keman otechtlapowijtiwalaya itech ojtli, noiwa kemi otechilijtiwalaya tlan kijtosneki itlajkuilol Dios.

33Ijkuakó, owalmokeketskeh okonankeh ojtli iwa omokopkeh Jerusalén; ompa okinmajsitoh n májtlaktli iwa n se itlamachtijkawah iwa n oksikimeh non ompa okatkah, 34iwa yejwah okimilijkeh:

—Milák, n Toteko Jesús yomoyoliti, iwa n Simón yokitak.

35Satepa yejwah ome okinmatiltijkeh tlan omochijkeh itech ojtli, iwa okimilijkeh kenijki okiyekixmatkeh n Jesús ijkuak okitlajkotlápanki n paj.

Jesús kinmonextilia itlamachtijkawah.

(Mt. 28:16-20; Mr. 16:14-18; Jn. 20:19-23)

36Itlamachtijkawah okimolijtokah tlan omochijkah, ijkuakó Jesús owalmonexti intlajko.

37Yejwah saikpanoa omomojtijkeh iwa okiyejyekoliayah chamo okitlajtlatokah se espíritu. 38Pero Jesús okinmili:

—¿Tleka nonmotlajtlachialtiah? ¿Amo nonkineltokah kox Ne? 39Xikinmitakah nomawah iwa nokxiwah. Techtelkokah iwa techitakah; porke se espíritu amo kipia inakayo nion iomiowah kemi Ne nikimpia.

40Ijkuak Jesús ijkó okinmili, okimititih imawah iwa ikxiwah. 41Pero ken opakmiktokah iwa ok omotlajtlachialtijtokah, amo okiyekneltokayah kox Ye n Jesús, yika Jesús okinmili:

—¿Nonkipiah itla tlan se kimomajsewis?

42Ijkuakó okonmakakeh tlajko michi tléwaki, 43iwa Ye okiseli iwa okimomajsewi inmixpah.

Jesús kintitlani itlamachtijkawah makitetlapowikah n kualitlájtoli

(Mt. 28:16-20; Mr. 16:15-18; Jn. 20:21-23)

44Otlanki Jesús okinmili:

—Tlan yonimochi ye tlan onomechilijka ijkuak onikatka nomowah. Onomechili nochi tlan ijkuilitok itech itlanawatil Moisés iwa itech intlajkuilolwah n profetas iwa itech salmos, ye tlan nimochiwaskia.

45Ijkuakó n Jesús okinmajsikamatilti tlan okijtoaya itlajkuilol Dios, 46iwa okinmili:

—Nochi ni ijkuilitok iwa ijkó Ne onimochi, porke saman nimikiskia, iwa ipan eyi tonati nimoyolitiskia. 47Itech Notoka xikimilikah kenijki moyolpatlaskeh inawak Dios iwa kenijki kintlapojpolwiliskeh de intlajtlakolwah. Xipewakah nika Jerusalén iwa satepa itech nochteh tlalmeh de nin tlaltíkpaktli. 48Nomejwah ononkitakeh tlan onipanok. 49Techkakikah, Ne nomechaltitlanilis tlan Notajtsi onomechkakiti. Pero xiyetokah nika Jerusalén, asta ijkuak nonkiseliskeh n weletílistli non wits de ilwikak.

Jesús tlejko ilwikak

(Mr. 16:19-20)

50Satepa, Jesús okinwík itlamachtijkawah asta Betania. Ompa okinmajkok imawah iwa okintiochi. 51Iwa ijkuak okintiochijtoka, omoixkoyanti iwa okiwikakeh ilwikak.

52Niman, ijkuak otlankeh okiweyijkachijkeh, omokopkeh Jerusalén ika miak pakílistli, 53iwa ixmostla okitlakuikiliayah Dios kan Weyi Tiopa.

Itlajtol Totajtsi Dios

© 2011, Wycliffe Bible Translators, Inc. All rights reserved. More Info | Version Index