Search form

San Lucas 9

Jesús kintitlani itlamachtijkawah

(Mt. 10:5-15; Mr. 6:7-13)

1Jesús okinmoololo májtlakteh iwa ome itlamachtijkawah iwa okinmák weletílistli iwa tlanawatílistli para makinkixtikah n espíritus amokualteh iwa makimpajtikah kokoxkeh. 2Satepa okintítlanki makitematiltiti itlajtol Dios, iwa makinpajtikah kokoxkeh. 3Iwa okinmili:

—Amitla xikwikakah kan ik nonyaskeh, nion nomobasto, nion nomomantajkostal, nion nomotlaxkal, nion nomotomi, sanwel se nomotlakeh. 4Ijkuak nonkalakitiweh itech se kali, ompa ximokalotikah asta ijkuak non kisaskeh de non altepetl. 5Iwa kan amo nomechseliskeh, xikisakah de ompa iwa ximoikxitsejtselokah para makinteilikah por amo onomechselijkeh.

6Ijkó kiné, itlamachtijkawah n Jesús otetlapowijtinemiah n kualitlájtoli itech nochteh n altepemeh, iwa okimpajtiayah kokoxkeh.

Herodes okikak tlan kichiwa Jesús

(Mt. 14:1-12; Mr. 6:14-29)

7N rey Herodes Antipas Primero okima nochi tlan Jesús okichiwaya; iwa amo okimatia tlan kimolis, porke sikimeh okijtoayah Juan Bautista omoyolitijka. 8Oksikimeh okijtoayah Elías n profeta akin oksepa yomonextiko, iwa oksikimeh okijtoayah chamo yomoyoliti se improfeta totatawah. 9Pero Herodes okijto:

—Ne nonewia onitlanawati makikechtsontekikah n Juan. ¿Akin yetos non tlakatl non satlawel kitenewah?

Iwa Herodes okitemoliaya kenijki kixmatis.

Jesús kintlakualtia mákuili mil tlakah

(Mt. 14:13-21; Mr. 6:30-44; Jn. 6:1-14)

10Ijkuak n májtlakteh iwa ome tlatematiltijkeh omokopatoh, okitlapowijkeh n Jesús tlan okichijkeh, iwa oyajkeh kan amaka kinkuejsoskia, amo wejka de Betsaida. 11Pero ijkuak n tlakah okimatkeh kan okatka n Jesús, okajsitoh, iwa Ye okinseli iwa okintlapowi kenijki Dios tlanawatia iwa okimpajti n kokoxkeh.

12Ijkuak yotlejtlepuyawatoka, n májtlaktli iwa n ome tlatematiltijkeh onmopachojkeh inawak Jesús iwa okilijkeh:

—Xikintitlani n tlakah mamosewitih, mawiah itech altepemeh noso tetlala makimotemolitih tlan kimomajsewiskeh, porke nika amitla onka.

13Pero Jesús okinmili:

—Nomejwah xikintlakualtikah.

Yejwah okilijkeh:

—Sanwel tikimpiah mákuili pameh iwa ome michimeh. Axa, tla mokoati itla tlákuali, tikintlakualtiskeh.

14Ompa okatkah kemi mákuili mil tlakah. Pero Jesús okinmili itlamachtijkawah:

—Xikinmilikah mamoololokah iwa mamotlajtlalikah de tlatlajko siento.

15Ijkó okichijkeh itlamachtijkawah, iwa nochteh omotlajtlalijkeh. 16Ijkuakó Jesús okinmónanki n mákuili pameh iwan ome michimeh. Oajkotláchixki ilwikak iwa omotlasojkama inawak Totajtsi Dios, sanima okintlajtlápanki n pameh iwa okinmaktili itlamachtijkawah makinxejxelilikah nochteh n tlakah. 17Nochteh otlakuajkeh iwa kuali oixwikeh. Satepa itlamachtijkawah okoololojkeh n paj tlatlapánali tlan omoka, iwa okintemitijkeh májtlaktli iwa ome chikimeh.

Pedro kijtoa Jesús Ye n Cristo

(Mt. 16:13-19; Mr. 8:27-29)

18Se tonati ijkuak Jesús omotiotsajtsilijtoka iselti, itlamachtijkawah okalakito kan Ye. Jesús okintlajtlani:

—¿Akin Ne? ¿Tlan kimoliah n tlakah?

19Yejwah okinankilijkeh:

—Sikimeh kijtoah Tejwatsi ti Juan Bautista, oksikimeh kijtoah Tejwatsi ti Elías, iwa oksikimeh kijtoah Tejwatsi tiprofeta non ya wejkawitl omikki iwa axa omoyoliti.

20Ijkuakó, Jesús okintlajtlani:

—Iwa nomejwah, ¿tlan nonkimoliah?

Pedro okili:

—Tejwatsi Ti Cristo Akin Dios okwaltítlanki.

21Pero Jesús okinnawati amaka makimatiltikah.

Jesús kinmilia kenomi mikkis

(Mt. 16:20-28; Mr. 8:30—9:1)

22Jesús noiwa okinmili itlamachtijkawah:

—Ne Non onimochi ni tlakatl moneki nitlaijyowis, iwa nechtlawelitaskeh n tetajmeh non tlayakantokeh kan Weyi Tiopa, iwa n tiopixkeh non tlayakantokeh, iwa non kitemachtiah n tlanawatílistli, nechmiktiskeh. Pero ipan eyi tonati nimoyolitis.

23Satepa nochteh okinmili:

—Tla aka kineki yetos notlamachtijkau, ayakmó makichiwa san tlan ye kineki, yej moneki nochipa manechtlakita, maya makitlaijyowiltikah n tlakah. 24Akin kinekis kimakixtis iyolilis kixpolos, pero akin kixpolos iyolilis por nechtematiltia, kimakixtis. 25Porke, ¿tlan ipati tla se tlakatl kimotlanilia nochi n tlaltíkpaktli pero ye moixpoloa noso yawi miktla? 26De milajka nomechilia, tla aka pinawa nonawak iwa kipinawilia notlajtol, noiwa Ne Non onimochi ni tlakatl nikmopinawilis ijkuak niwits kemi Rey, ika iweyijkachiwalis Notajtsi iwan iángelwah. 27De milajka nomechilia sikimeh non nika kateh amo mikiskeh tlamo achto kitaskeh Dios matlanawati.

Ixko Jesús otsótlanki

(Mt. 17:1-8; Mr. 9:2-8)

28Kemi chikweyi tonati satepa, Jesús oyá kan se tepetl omotiotsajtsilito iwa okiwík n Pedro, Jacobo iwa n Juan. 29Iwa ijkuak Jesús omotiotsajtsilijtoka, okipatlak ixko iwa itlakeh oistaktiak iwa otsotlania. 30Ijkuakó owalmonextijkeh ome tlakah non omotlapowijtokah iwan Jesús. Yejwah okatkah Moisés iwa Elías. 31Iwa okinyawalojtoka se tlawilnextílistli, iwa okiliayah n Jesús kenijki kimiktiskiah kan altepetl de Jerusalén. 32Pedro iwan oksikimeh satlawel okochmikiah, pero ijkuak owaltlajtlachixkeh, okitakeh iweyijkachiwalis Jesús iwan ome tlakah non okatkah íwa. 33Ijkuak nekateh tlakah yokikakajtewayah n Jesús, Pedro okili:

—Tlamachti, ¡Sa kuali nika tikateh! Matikinchijchiwakah eyi akákalteh, se moaxka, se iaxka Moisés iwa ok se iaxka Elías.

Pedro mach okimatia tlan okijtoaya. 34Ijkuak Pedro ok otlajtojtoka, se mextli owaltemok iwa okinkemelo, iwa satlawel omomojtijkeh. 35Ijkuakó itech mextli owalmokak se tlájtoli non okijtoaya:

—Ye ni Nokone non saikpanoa niktlasojtla: xikkakikah tlan Ye nomechilis.

36Ijkuak n tlájtoli san owalmoka, okitakeh n Jesús sa iselti. Yejwah san otlamatokah, iwa amaka okilijkeh tlan okitakeh asta satepa.

Jesús kipajtia se télpochtli non okipiaya se espíritu amokuali

(Mt. 17:14-21; Mr. 9:14-29)

37Ijkuak owalmostlatik Jesús iwa itlamachtijkawah otemokeh de kan tepetl, iwa miakeh tlakah okinamikitoh n Jesús. 38Ijkuakó se tlakatl non owalaya intlajko n tlakah, okualtsajtsili n Jesús:

—Tlamachti, nimitstlatlaujtia xikonitaki nopiltsi, porke sanwel ye nikpia. 39Se espíritu amokuali kimoaxkatia iwa kitsajtsitia; kitoktia mamimiki iwa kitoktia makikixti posoktli itech ikamak. Semi kitlaijyowiltia iwa owi kikajkawa. 40Yonikintlatlaujti motlamachtijkawah makikixtilikah n espíritu amokuali, pero mach oweletkeh.

41Jesús okijto:

—¡Satlawel amo nonteneltokakeh iwa nontlajtlakolchijkeh! ¿Asta kemania moneki maniyeto nomowah iwa manomechxikojto? Techalikili nika mopiltsi.

42Pero ijkuak n télpochtli yomijkuanijtiaya inawak Jesús, n espíritu amokuali okitlalwitek iwa opé kitsejtseloa. Ijkuakó n Jesús okitlawelajwak n espíritu amokuali, okipajti n télpochtli iwa okimaktili ita. 43Iwa nochteh omotlajtlachialtijkeh ika iweletilis n Totajtsi Dios.

Oksepa Jesús kinmilia kenomi mikkis

(Mt. 17:22-23; Mr. 9:30-32)

Ijkuak nochteh omosentlajtlachialtijtokah, Jesús okinmili itlamachtijkawah:

44—Kuali xikkakikah tlan nomechilis: Ne Non onimochi ni tlakatl nechtemakaskeh inmak n tlaltikpaktlakah.

45Pero itlamachtijkawah mach okajsikamatiah tlan okimiliaya porke ayamó owalajsia n tonati para makajsikamatikah, iwa omawiah kitlajtlaniskeh tlan kijtosneki tlan okimilijka.

Jesús kinmilia akin okachi weyijkatitok kan Dios tlanawatijtok

(Mt. 18:1-5; Mr. 9:33-37)

46Ijkuakó itlamachtijkawah n Jesús opé motlatlajtolkopah, okinekiah kimatiskeh akin okachi weyijkatitok, 47pero Jesús yokimatia tlan omokuatlapowijtokah itlamachtijkawah. Ijkuakó okimonapalolti se chokotsi iwa okontlali inakastla 48iwa okinmili:

—Akin kiselia se chokotsi itech Notoka, Ne nechselia, iwa akin Ne nechselia, noiwa kiselia akin onechaltítlanki. Porke akin amitla ipati nomonawak, ye akin okachi weyixtos.

Akin kajki towah amo techixnamiki

(Mr. 9:38-40)

49Ijkuakó Juan okili:

—Tlamachti, otiktakeh se tlakatl akin okinkixtiaya espíritus amokualteh itech Motoka. Pero tejwah otiknawatijkeh ayakmó ijkó makichiwa, porke amo nemi towah.

50Pero Jesús okinmili:

—Amo xiktlakawaltikah, porke akin amo techixnamiki, kajki towah.

Jesús kinmajwa n Jacobo iwa n Juan

51Yowalajsia n tonati ijkuak Jesús tlejkoskia ilwikak. Omoyolchika iwa okónanki ojtli para Jerusalén. 52Jesús okintlayakanalti ome itlamachtijkawah kan se altepetl de Samaria makitemolitih kan mokalotis. 53Pero n tlakah de Samaria amo okinekeh okiselijkeh, porke okimatkeh Jesús oyaya Jerusalén. 54Ijkuak itlamachtijkawah Jacobo iwa n Juan, okitakeh amo okinekiah kinseliskeh, okilijkeh n Jesús:

—Tejwatsi, ¿tikneki matitlanawatikah mawetsi tletl de ilwikak para makimpojpolo, ijkó kemi okichi n profeta Elías?

55Jesús okonimitak, okinmajwak iwa okinmili:

—Nomejwah mach nonkimatih tlan espíritu nomotech kajki. 56Porke Ne Non onimochi ni tlakatl amo oniwala para nikimpojpolos n tlaltikpaktlakah, yej oniwala para nikinmakixtis.

Akimeh okinekiah kitlakitaskeh n Jesús

(Mt. 8:18-22)

57Ijkuak oyayah itech ojtli, se tlakatl okili n Jesús:

—Noteko, nikneki nias mowa san kanik timuikas.

58Jesús okili:

—N ostomeh kipiah kan motlaatiskeh, iwa n totomeh kipiah intepajsol. Pero Ne Non onimochi ni tlakatl mach nikpia kan nimosewis.

59Jesús okili ok se tlakatl:

—Xiwiki nowa.

N tlakatl okili:

—Noteko, achto techonkawili maniktookati nota.

60Jesús okinankili:

—Xikinkawa akimeh ok miktokeh makintookatih akimeh yomikkeh, pero te, xitetlapowi kenomi Dios tlanawatia.

61Ijkuakó ok se tlakatl okili n Jesús:

—Noteko, ne nikneki nias mowah, pero achto techonkawili manimomakawati íwan nochanejkawah.

62Pero Jesús okili:

—Akin kitlalia ima itech arado iwa ontlachia ik ikuitlapa, ye mach weletis kalakis kan tlanawatia Totajtsi Dios.

Itlajtol Totajtsi Dios

© 2011, Wycliffe Bible Translators, Inc. All rights reserved. More Info | Version Index