Search form

San Marcos 14

Motlatlalwiah kenijki kikitskiskeh n Jesús

(Mt. 26:1-5; Lc. 22:1-2; Jn. 11:45-53)

1Sa ome tonati opolitoka para n ilwitl de Paskua, ijkuak n judíojteh kikuah n paj non amo kipia levadura. N tiopixkeh non tlayakantokeh iwa n tlamachtijkeh de itlanawatil Moisés, okitemoliayah kenijki tlakajkayawaskeh para kikitskiskeh n Jesús iwa kimiktiskeh. 2Pero okimoliayah:

—Amo tikkitskiskeh itech ilwitl de Paskua, para amo matikimpajsolokah n tlakah.

Se siwatl kikuaxawilia ajwiálistli n Jesús

(Mt. 26:6-13; Jn. 12:1-8)

3Jesús okatka Betania icha n Simón non achto okipiayah lepra. Ijkuak Jesús oewatoka kan mesa, owala se siwatl non okwalikaya se tekontsi tentok ika ajwiálistli de nardo non satlawel patío. Okitlápanki n tekontsi iwa n ajwiálistli okikuaxawili n Jesús. 4Sikimeh non ompa okatkah okualankeh iwa okimolijkeh:

—¿Tleka san okixpolo nin ajwiálistli? 5Weletiskia monamakaskia ika eyi siento denariojtomi, para ika se kimpalewiskia n próbesteh.

Iwa okualantokah íwa.

6Pero Jesús okijto:

—Xikkawakah; ¿tleka nonkikuejsoah? Tlan onechchiwili satlawel kuali. 7Porke n próbesteh nochipa nonkimpixtoskeh nomowah, iwa weletis nonkimpalewiskeh san ijkuak nonkinekiskeh. Pero Ne amo nochipa nonnechpixtoskeh nomowah. 8Nin siwatl okichi tlan owéletki, porke yonechajwiali para ijkuak nechtookaskeh. 9De milajka nomechilia itech nin tlaltíkpaktli kan motetlapowis n kualitlájtoli de Dios, noiwa sentetl motetlapowis tlan okichi nin siwatl, iwa ijkó se kilnamikis.

Judas Iscariote kitemaktia n Jesús

(Mt. 26:14-16; Lc. 22:3-6)

10Ijkuakó Judas Iscariote, seme de n májtlakteh iwa ome itlamachtijkawah, oyá omotlatlapowito iwan tiopixkeh non tlayakantokeh para kinmaktilis n Jesús. 11Ijkuak okikakeh tlan okimilito, opakeh, iwa omokajkeh kimakaskeh tomi. Ijkuakó Judas opé kitemolia kemania okachi kuali para kinmaktilis n Jesús.

N tlákuali non mokua itech ilwitl de Paskua

(Mt. 26:17-29; Lc. 22:7-23; Jn. 13:21-30; 1 Co. 11:23-26)

12Itech ipewaya n ilwitl de Paskua ijkuak mokua n paj non amo kipia levadura, ijkuak noiwa okimiktiayah n ichkakonetl itech ilwitl de Paskua, itlamachtijkawah n Jesús okitlajtlanijkeh:

—¿Kani tikmonekiltia matimitsmajmanilitih n tlákuali de Paskua?

13Ijkuakó okintítlanki ome itlamachtijkawah iwa okinmili:

—Xiwiah kan altepetl, ompa nonkitaskeh se tlakatl non kimamajti se axoktsi. Xiwiah kan ik ye yawi, 14iwa kan kalakis, xikilikah n tekowa: “N tlamachti tlajtlani: ¿Katlie n kali kan nikmomajsewis n tlákuali de Paskua iwa notlamachtijkawah?” 15Ye nomechititis se weyi kuarto non kajki tlakpak. Non ya tlamajmantok. Ompa xikmajmanakah n tlákuali non tikmomajsewiskeh.

16Itlamachtijkawah oyajkeh iwa okalakitoh kan altepetl. Yejwah otlaajsikeh ijkó kemi Jesús okinmili, iwa okimajmankeh n tlákuali de Paskua.

17Ijkuak owaltiotlatik, Jesús okalakito iwa n májtlakteh iwa ome itlamachtijkawah itech non kali. 18Iwa ijkuak otlakuajtokah kan mesa, Jesús okinmili:

—De milajka nomechilia non seme, akin tlakuajtok nowa, nechtemaktis.

19Ijkuakó yejwah omoyolkokojkeh, iwa se por se opé kitlajtlania:

—¿Ne nimitstemaktis?

Iwa ok se noiwa okijto:

—¿Noso ne nimitstemaktis?

20Jesús okinmili:

—Seme de non májtlakteh iwa n ome, akin tlapalojtok itech noplato. 21De milajka nomechilia, Ne Non onimochi ni tlakatl nimochiwas kemi kijtoa itlajkuilol Dios, pero ¡probe n tlakatl non nechtemaktis! Okachi kuali amo tlakatiskia.

22Ijkuak otlakuajtokah, Jesús okónanki n paj, omotlasojkama inawak Dios, okitlajkotlápanki iwa okinmák makimomajsewikah iwa okinmili:

—Xikmomasewikah nin paj, ye ni nokuerpo.

23Otlanki okónanki se kopa, iwa ijkuak yomotlasojkama inawak Dios. Okinmaktili itlamachtijkawah iwa nochteh okonikeh. 24Iwa okinmili:

—Ye ni noesso non ika timotlajtolsenkawa, nin noesso motoyawas para miakeh makintlapojpolwikah. 25De milajka nomechilia, ayakmó nikonis iayo n uvas, asta neká tonati ijkuak nikonis n yankuik vino kan Dios tlanawatijtok.

Pedro kijtos amo kixmati n Jesús

(Mt. 26:30-35; Lc. 22:31-34; Jn. 13:36-38)

26Keman okitlakuikakeh se salmo, oyajkeh kan olivostepetl. 27Iwa ompa Jesús okinmili:

—Nochteh nomejwah nonnechkakajtewaskeh nin yúali, porke itech itlajkuilol Dios kijtoa: “Nikmiktis n tlájpixki, iwa n ichkameh moxexeloskeh.” Zac. 13:7 28Pero ijkuak nimoyolitis, nomechyakantias para Galilea.

29Ijkuakó Pedro okili:

—Malki nochteh mamitskakajtewakah, ne amo nimitskakajtewas.

30Jesús okili:

—De milajka nimitsilia, nin yúali, achto de tlakuikas n kaxtil ome welta, ijkuakó te yotikijto eyi welta amo techixmati.

31Pedro okachi omotlajtolchijchika iwa okili:

—Malki mowa manechmiktikah, mach ayik nikijtos amo nimitsixmati.

Noiwa n oksikimeh itlamachtijkawah ijkó okijtojkeh.

Jesús motiotsajtsilia kan werto de Getsemaní

(Mt. 26:36-46; Lc. 22:39-46)

32Satepa oyajkeh kan se lojar non itoka Getsemaní, iwa n Jesús okinmili itlamachtijkawah:

—Nika ximotlalikah, Ne nio nimotiotsajtsiliti.

33Ijkuak Jesús omotiotsajtsilito okinwík n Pedro, Jacobo iwa n Juan, iwa ompa opé moyolkokoa iwa omotekipachoaya. 34Niman okinmili:

—Satlawel nimoyolkokoa, asta nikmachilia nomikilis. Nika ximokawakah iwa xiijsatokah.

35Iwa n Jesús onéjnenki okachitsi tlayakapa, omotlankuáketski asta okitelko n tlali ika ixkuak, iwa okitlatlaujti Dios, tla Ye okimonekiltiaya amo makikawili matlaijyowi itech non ora. 36Iwa itech itiotsajtsilis okijto:

—Abba, Notajtsi, Tejwatsi nochi weleti tikchiwa; xikachiwa nin tlaijyowílistli non wits notech, pero amo mamochiwa kemi Ne nikneki, yej kemi Tejwatsi tikmonekiltia.

37Otlanki omókopki kan eyi itlamachtijkawah iwa okinmajsito kojkochtokeh, iwa okili n Pedro:

—Simón, ¿tikochtok? ¿Nion se ora amo otikxiko tiijsatok? 38Xijsatokah iwa ximotiotsajtsilikah, para amo manomechyoltilana n tlajtlákoli. Nomoespíritu kineki kichiwas tlan kuali, pero nomokuerpo amo tlaxikoa.

39Jesús oksepa omotiotsajtsilito iwa okojpatili itiotsajtsilis. 40Ijkuak omokopato, oksepa okinmajsito kochtokeh, porke okochmikiah. Iwa amo okimatiah tlan kinankiliskeh. 41Omokopato ipan eyi welta iwa okinmili:

—¿Ok non kochtokeh iwa ok nonmosewiah? ¡Xiijsakah! Yoajsiko n ora, Ne Non onimochi ni tlakatl nechtemaktiskeh inmak tlajtlakolchijkeh. 42¡Ximewakah, tiawih! Ompa wits akin nechtemaktis.

Kikitskiah n Jesús

(Mt. 26:47-56; Lc. 22:47-53; Jn. 18:2-11)

43Jesús ok otlajtojtoka ijkuak okalakiko n Judas, seme de n májtlakteh iwa ome itlamachtijkawah. Judas okwalinwikaya miakeh tlakah non okinmakitskijtiwalayah espadas iwa kuaujmeh. Ninteh tlakah okwalintitlankeh n tiopixkeh non tlayakantokeh, non kitemachtiah n tlanawatílistli iwa n tetajmeh non tlayakantokeh kan tiopa. 44Judas non yokiichtakatemakatoka yokinmilijka:

—Akin ne nikixtennamikis, ye n Jesús, xikkitskikah iwa kuali xikmokuitlawijtiwiah.

45Ijkuak Judas okalakito inawak Jesús, okili:

—Tlamachti.

Iwa okiixtennamik. 46Ijkuakó okikitskijkeh n Jesús, iwa okiwikakeh.

47Pero seme de itlamachtijkawah n Jesús, okualkópinki iespada iwa okinakastsontek se itlakewal n tiópixki non okachi otlayakantoka. 48Ijkuakó Jesús okinmili n tlakah:

—¿Ononwalajkeh ononnechkitskikoh ika espadajteh iwa ika kuawitl kemi niyetoskia nitlachtek? 49Nochi tonati onitlamachtiaya nomonawak kan Weyi Tiopa, iwa ayik ononnechkitskijkeh. Pero moneki tlamochiwas kemi kijtoah n tiotlajkuíloli.

50Ijkuakó nochteh itlamachtijkawah n Jesús ochocholojkeh iwa okikakajtejkeh iselti.

Se télpochtli non ocholo xipetstik

51Se télpochtli non okikuitlapantokatiaya n Jesús iwa okemelitiaya san ika se mantajtsótsoli, noiwa okikitskijkeh, 52pero ye okinmoxolkopinili iwa okinkakajtewili imantajtsótsol iwa ocholo xipetstik.

Jesús inawak Sanedrín

(Mt. 26:57-68; Lc. 22:54-55, 63-71; Jn. 18:12-14, 19-24)

53Ijkuakó okiwikakeh n Jesús inawak n tiópixki non okachi tlayakantok. Iwa ompa omoololojkeh nochteh n tetajmeh non tlayakantokeh kan Weyi Tiopa, iwa non kitemachtiah n tlanawatílistli. 54Iwa Pedro san wejka okiichtakatokatia n Jesús asta okalakito kan ipatio n tiópixki non okachi tlayakantok. Ompa omotlali iwan tlamokuitlawijkeh de n Weyi Tiopa, omototonijtokah inakastla n tlékuili.

55N tiopixkeh non tlayakantokeh iwa n nochteh non de n Sanedrín+ okitemoliayah tlan ika kitlajtlakolmamaltiskeh n Jesús iwa ijkó weletis kimiktiskeh. Pero amitla okajsiah. 56Miakeh okijtoayah tlan amo milák, iwa mach san se intlajtol okipiayah. 57Ijkuakó sikimeh owalmokeketskeh iwa opé kiteiliah n Jesús iwa ijkí okijtoayah:

58—Tejwah otikkakeh ijkuak okijto: “Ne nikxixinis nin Weyi Tiopa non okichijchijkeh n tlakah, iwa ipan eyi tonati nikajkokuis ok se Weyi Tiopa non amo aka tlakatl kimachijchiwas.”

59Malki ijkó okijtoayah mach san se intlajtol okipiayah.

60Ijkuakó n tiópixki non okachi otlayakantoka omoketsato tlatlajko iwa okitlajtlani n Jesús:

—¿Amitla tikijtos de tlan ninteh mitsteiliah?

61Jesús amitla okinankili. Iwa n tiópixki non okachi otlanawatiaya oksepa okitlajtlani:

—¿Te ti Cristo, Ikone n Totajtsi Dios Non tiochitok?

62Jesús okinankili:

—Milák, Ne. Iwa nomejwah nonnechitaskeh Ne non onimochi ni tlakatl niewatos iyekma n Dios weletini, iwa satepa niwalmuikas itech mextli de ilwikak.

63Ijkuakó n tiópixki non okachi otlayakantoka omotlakentsomoni iwa okijto:

—¿Tlan ok para tikinnekih oksikimeh makijtokih tlan okijto? 64¡Nomejwah yononkikakeh, Ye tlajtoa kemi yetoskia Dios! ¿Axa, tlan nonkijtoah?

Nochteh okitlajtlakoltijkeh iwa okijtojkeh kuali makimiktikah.

65Ijkuakó sikimeh opé kiixchijchawiah, okixtsakuayah, okiixwitekiah. Iwa okiliayah:

—¡Axa, xikyejyekoli akin omitsmák!

Iwa n tlamokuitlawijkeh de kan tiopa okiixtlatsiniayah.

Pedro okijto mach kixmati n Jesús

(Mt. 26:69-75; Lc. 22:56-62; Jn. 18:15-18, 25-29)

66Pedro omoketoka tlatsintla kan patio, iwa owala iteska n tiópixki non okachi otlayakantoka. 67Ye okitak n Pedro inakastla n tlékuili, okisentlajtlatak iwa okili:

—Te noiwa otinemia iwan Jesús de Nazaret.

68Pedro mach okimokuiti iwa okijto:

—Amo nikixmati, iwa amo nikmati tlan tikijtoa.

Ijkuakó okiski kaltempa, iwa se kaxtil owaltlakuikak. 69Satepa, iteska n tiópixki oksepa okitak n Pedro iwa opé kinmilia n oksikimeh:

—Nin tlakatl seme de yejwah.

70Pero n Pedro oksepa mach okimokuiti. Iwa okachi satepa, non ompa okatkah oksepa okilijkeh n Pedro:

—De milajka te seme de yejwah, porke noiwa ti galileo, iwa titlajtoa kemi yejwah tlajtoah.

71Ijkuakó n Pedro opé tlawijwikaltia, omotlajtolchijchika iwa okijto:

—¡Ne mach nikixmati non tlakatl akin nomejwah nonkitenewah!

72Ijkuakó n kaxtil oksepa owaltlakuikak, iwa n Pedro okilnamik tlan Jesús okilijka: “Ijkuak n kaxtil tlakuikas ome welta; te eyi welta yotikijto amo nikixmati.” Nima n Pedro opé senchoka.

Itlajtol Totajtsi Dios

© 2011, Wycliffe Bible Translators, Inc. All rights reserved. More Info | Version Index