Search form

San Marcos 3

Jesús kipajtia se tlakatl non omapitswak

(Mt. 12:9-14; Lc. 6:6-11)

1Jesús oksepa okalak kan se sinagoga, iwa ompa okalak se tlakatl mapitswak. 2Iwa sikimeh fariseos sa okonitokah n Jesús kox kipajtiskia non tlakatl itech sábado ijkuak mosewia n judíos, iwa ijkó weletis kiteiliskeh. 3Jesús okili n tlakatl non omapitswak:

—Ximoketsa tlayakapa.

4Otlanki okintlajtlani n fariseos:

—¿Techkawilia matikchiwakah tlan kuali itech sábado noso matikchiwakah tlan amokuali? ¿Techkawilia matitepalewikah noso matitemiktikah?

Yejwah mach otlanankilijkeh. 5Ijkuakó Jesús okuálanki iwa omoyolkoko, ken otlakuawatokah inyolo n fariseos. Iwa okili n kókoxki:

—Xikmilawa moma.

N kókoxki okimila ima, iwa opajtik. 6Ijkuakó n fariseos owalkiskeh de ompa iwa opé motlatlalwiah iwan sikimeh itekitwah n Herodes+ para kimiktiskeh n Jesús.

Jesús tlapajtia inakastla n atl de Galilea

7Jesús iwa itlamachtijkawah oyajkeh itempa n atl de Galilea, iwa miaktikeh tlakah oyajkeh inwah. N tlakah owalayah de Galilea iwa de Judea, 8de Jerusalén, de Idumea, ik nepa lado n río Jordán, iwa de n tlalmeh de Tiro iwa Sidón. Ninteh tlakah, ijkuak okimatkeh nochi tlan Jesús okichiwaya, owalajkeh inawak. 9Ijkuakó Jesús okinnawati itlamachtijkawah sa makitlatlalilitih se barka, iwa ijkó amo makipajpatsokah n tlakah. 10Porke Jesús miaktikeh yokimpajtijka, yika n kokoxkeh okipajpatsmiktiayah ken okinekiah kitelkoskeh. 11Iwa ijkuak n espíritus amokualteh okitayah n Jesús, owetsiah ikxitla iwa otsajtsiah:

—¡Te, Ti Tekone de Dios!

12Pero Jesús okinkamatsakuaya para amo makiteixmatiltikah teixpa.

Jesús kimpejpena májtlaktli iwa ome itlamachtijkawah

(Mt. 10:1-4; Lc. 6:12-16)

13Satepa Jesús otlejkok itech se tepetl, iwa ompa okinmopejpenili akimeh Ye okinek, iwa yejwah owalajkeh inawak. 14Ijkó okimpéjpenki májtlaktli iwa ome itlamachtijkawah para mayetokah nochipa iwan Ye, iwa para kintitlanis makitetlapowitih n kualitlájtoli. 15Iwa okinmák weletílistli para makinkixtikah espíritus amokualteh. 16Yejwah ninteh n májtlakteh iwa ome akimeh okimpéjpenki:

Simón akin noiwa okitlalili itoka Pedro,

17Jacobo iwa ikni

Juan itelpochwah n Zebedeo, akimeh Jesús okintokayoti Boanerges, noni kijtosneki kuejsijkeh,

18Andrés,

Felipe,

Bartolomé,

Mateo (noiwa itoka Leví),

Tomás,

Jacobo itelpoch Alfeo,

Tadeo,

Simón non onemia iwan Kananistas,+

19iwa n Judas Iscariote non satepa okitemakti n Jesús.

Kiteiliah Jesús iweletilis walewatok de beelzebú

(Mt. 12:22-32; Lc. 11:14-23, 12:10)

20Satepa Jesús okalak itech se kali iwa oksepa omoololojkeh miaktikeh tlakah iwa asta ayakmó oweletiah otlakuayah. 21Ijkuak okimatkeh non ken okitayah n Jesús, owalajkeh okinotsakoh, porke okimoliayah chamo yokuatlapolo.

22Noiwa non kitemachtiah n tlanawatílistli akimeh owalajkeh de Jerusalén, okijtoayah:

—Nin tlakatl kipia iweletilis beelzebú iwa ika non weletílistli kinkixtia n espíritus amokualteh.

23Ijkuakó Jesús okínnotski mawalmijkuanikah inawak iwa opé kinmajsikamatiltia ika tlapoálistli, iwa okinmili:

—¿Kenomi weletis n satanás san ye inewia kualkixtis n satanás? 24Tla se país xexelitos, ayik pankisas, 25iwa tla itech se familia nochteh xexelitokeh, mach wejkawas non familia. 26Porke tla n satanás inewia moixnamiki iwa moxexeloa, ayakmó kipias weletílistli iwa pojpoliwis.

27'Amaka weletis kalakis icha n se tlakatl chikawak para kitlachtekis, tlamo achto kijilpia iwa ijkuakó ya weletis kitlachtekis.

28'De milajka nomechilia Dios weletis kintlapojpolwis akimeh kichiwah tlajtlákoli, 29pero akin fiero kitenewas n Espíritu Santo, ayik kitlapojpolwiskeh iwa nochipa yetos tlajtlakole.

30Jesús ijkó okijto porke yejwah okijtojkeh Ye kipia se espíritu amokuali.

Imamá iwa ikniwah n Jesús

(Mt. 12:46-50; Lc. 8:19-21)

31Ijkuakó imamá iwa ikniwah n Jesús, okalakikoh kan otlamachtijtoka. Pero san kaltempa omokajkeh iwa otlatitlankeh makinotsatih. 32Ijkuakó, non okiyawalojtokah n Jesús, okilijkeh:

—Momamá, mokniwah iwa moweltiwah kateh kala iwa mitsontemoah.

33Pero Ye okinnankili:

—¿Akin nomamá iwa akimeh nokniwah?

34Otlanki, Jesús okintlajtlatak non ompa okiyawalojtokah iwa okijto:

—Nikan kateh nomamá iwa nokniwah, 35nochteh akimeh kichiwah tlan Dios kimonekiltia, ye nokni, nowelti iwa nomamá.

Itlajtol Totajtsi Dios

© 2011, Wycliffe Bible Translators, Inc. All rights reserved. More Info | Version Index