Search form

San Marcos 4

Se tlakatl non otook

(Mt. 13:1-9; Lc. 8:4-8)

1Jesús oksepa opé tlamachtia itempa n atl de Galilea, iwa miakeh tlakah omoololojkeh inawak. Okatkah miaktikeh, yika Jesús otlejkok itech se barka iwa itech omotlali. N tlakah omokajkeh itempa n atl para kikakiskeh. 2Ijkuakó Ye opé kinmachtia ika miakeh tlapoálisteh. Iwa okinmiliaya:

3—Kuali xikakikah tlan nomechilis: Se tlakatl otookato. 4Ijkuak otook, siki xínachtli owetski inakastla n ojtli, iwa n totomeh owalajkeh iwa okikuajkeh. 5Oksiki xínachtli owetski kan tlateyo iwa niman oixwak porke n tlali amo weltilawak. 6Pero ijkuak okiski n tonati, owaki, porke amo wejkatla omonelwayoti. 7Oksiki xínachtli owetski intsalko witsmeh, iwa n witsmeh omoskaltijkeh iwa okijyomiktijkeh, yika n tlatookali mach otlaaki. 8Oksikimeh xinachteh owetskeh itech kuali tlali, iwa ijkuak oixwakeh, kualtsi omoskaltijkeh, iwa miak otlaaki. Siki okitemák sempóali iwa n májtlaktli (30) por se xínachtli, oksiki okitemák eyi póali (60), iwa oksiki okitlakilti se siento.

9Ijkuakó okinmili:

—¡Akin de milajka kipia inakas, makajsikamati!

Jesús kinmachtia itlamachtijkawah ika tlapoálisteh

(Mt. 13:10-17; Lc. 8:9-10)

10Satepa, ijkuak yokikakajtejkah n Jesús, sikimeh non ok omokajkeh iwan májtlakteh iwa ome itlamachtijkawah, okitlajtlanijkeh tlan kijtosneki n tlapoálistli de non otook. 11Jesús okinmili:

—Nomejwah Dios yonomechmatilti tlan yowejkah otlaatitokah, pero n oksikimeh amó. Yejwah okinmachti ika tlapoálisteh. 12Yika, maya matlachiakah amo makitakah, iwa maya matlakakikah amo mateajsikamatikah, sanwel kinmajsikamatiltis tla moyolpatlaskeh iwa kitlajtlaniliskeh Dios makintlapojpolwi. Is. 6:9-10

Jesús kinmajsikamatiltia n tlátoktli

(Mt. 13:18-23; Lc. 8:11-15)

13Jesús noiwa okinmili:

—¿Amo nonkajsikamatih nin tlapoálistli? ¿Kenomi nonkinmajsikamatiskeh n oksikimeh tlapoálisteh? 14Akin tooka ye kemi akin tetlapowia n kualitlájtoli. 15Onkateh tlakah kemi n xínachtli non owetski inakastla n ojtli, kikakih n kualitlájtoli iwa keman okikakeh, wits satanás iwa kinyolkixtilia n kualitlájtoli. 16Oksikimeh tlakah kemi n xínachtli non owetski itech tlateyo, kikakih n kualitlájtoli iwa kiseliah ika pakílistli. 17Pero kemi amo yektlakxilitokeh, mach wejkawah, porke ijkuak pewa tlaijyowiah por n kualitlájtoli, san nima wetsih. 18Oksikimeh kemi n xínachtli non owetski itsalko witsmeh, yejwah kikakih n kualitlájtoli, 19pero okachi kintekipachoa tlan onka itech nin tlaltíkpaktli, iwa kinekih kitlawelpiaskeh tomi. Yika, nochi ni kinyolijtlakoa iwa ayakmó kinkawilia mamotenexti Dios intech yejwah. 20Pero akimeh kikakih n kualitlájtoli iwa kiyekseliah, yejwah kemi n xínachtli non owetski itech kuali tlali, sikimeh kemi n xínachtli non kitemakah sempóali iwa n májtlaktli xínachtli por se xínachtli, oksikimeh kemi n xínachtli non kitemaka eyi póali, iwa n oksikimeh kemi n xínachtli non kitemaka se siento.

N tláwili

(Lc. 8:16-18)

21Jesús noiwa okinmili:

—Ijkuak nonkimilintiah se tláwili, ¿mach nonkitlaatiah itlampa se kama noso itlampa se kajo? Nonkimilintiah iwa nonkitlaliah tlakpak para matlawi. 22Yika, nochi tlan tlaatitok monextis iwa nochi tlan amo momati saman momatis. 23¡Akin de milajka kipia inakas, makajsikamati!

24Jesús noiwa okinmili:

—Xikitakah nomejwah akimeh nonkikakih nin tlájtoli. Ijkó kemi nomejwah nonkintlatamachiwiliskeh oksikimeh, nomechtamachiwiliskeh iwa okachi nomechmakaskeh. 25Porke akin kipia, okachi kimakaskeh, iwa akin amo kipia, kikixtiliskeh tlan san achitsi kipia.

N xínachtli non moskaltia

(Mt. 25:14-30; Lc. 19:11-27)

26Jesús noiwa okijto:

—Kan Dios tlanawatia, kemi akin kitepewa xínachtli itech tlali. 27Tla yas kochiti nochi yúali, iwa tla mewas noso amo mewas nochi kualka, n tlátoktli kisentoka moskaltijti, pero ye mach kimati kenijki moskaltia. 28Inewia n tlali kiskaltia n tlátoktli, achto ixwa iwa moxiujyotia, tlami miawati iwa iksemi tlaaki. 29Ijkuak n tlátoktli yochikawak, kitekih porke yoajsiko n tonati para motekis.

N xinatsintli de mostaza

(Mt. 13:31-32; Lc. 13:18-19)

30Satepa Jesús noiwa okinmili:

—¿Ika tlan tlájtoli nomechititis kan Dios tlanawatijtok? Noso, ¿ika tlan tlapoálistli weletis nomechixmatiltis? 31Kan Dios tlanawatia kemi se xinatsintli de mostaza ijkuak kitlalpachoah. Nin xinatsintli okachi tsijtsikitsi de nochteh n xinachtsitsinteh. 32Pero, ijkuak se kitlalpachoa, ixwa iwa moskaltia okachi weyi ke nochteh n tlátokteh, iwa itech wejweyijtikeh imamayowah n totomeh motepajsoltiah itlampa itlasekawilo.

Jesús ijkí otemachtiaya

(Mt. 13:34-35)

33Ika miakeh tlapoálisteh Jesús okinmachtiaya n kualitlájtoli asta kan yejwah okajsikamatiah. 34Nochipa okintlapowiayah ika tlapoálisteh, pero ijkuak sa Ye omokawaya iwan itlamachtijkawah, nochi okinmajsikamatiltiaya.

Jesús kitlakawaltia n atl iwa n ejekatl

(Mt. 8:23-27; Lc. 8:22-25)

35Non tonati ijkuak yotlajkajtik Jesús okinmili itlamachtijkawah:

—Matikojchalwikah n lago.

36Ijkuak yokinmakajkeh n tlakah, itlamachtijkawah okiwikakeh n Jesús itech barka, iwa oksikimeh barkas inwah oyajkeh. 37Ijkuakó owalmokajka se ejekatl chikaktik iwa n atl opé motlatlamotla ijtik barka iwa opé atemi. 38Jesús okochtoka tlakuitlapa iwa okimokpalti se íkpali, iwa itlamachtijkawah okijxititoh iwa okilijkeh:

—¡Tlamachti! ¡Xiijsa, tiapolakih!

39Ijkuakó Jesús owalme iwa okitlakawalti n ejekatl, iwa okili n atl:

—¡Ximoyekmana!

Iwa n ejekatl omóketski iwa nochi san owaltlamoka. 40Otlanki Jesús okinmili itlamachtijkawah:

—¿Tleka satlawel nonmawih? ¡Ayamó nontlaneltokah!

41Pero yejwah satlawel omaujtokah iwa omotlajtlaniayah.

—¿Akin nin tlakatl, asta n ejekatl iwa n atl kitlakitah?

Itlajtol Totajtsi Dios

© 2011, Wycliffe Bible Translators, Inc. All rights reserved. More Info | Version Index