Search form

EKISODO 11

Taelo ya go re Baisiraele ba thothe

1Bjale Morena a bolela le Moshe a re: Ke sa na le kotlo e engwe, ye ke tlogo e tlišetša Farao le naga ya Egipita; ke mo a tlogo le lesa la tloga fa. Gomme e tlo re ge a le fa tsela, e tlo ba go le raka ka maatla. 2Bjale botša ba geno, ba di kwišiše, o re: Monna a kgopele go moagišani, le mosadi a kgopele go e a agilego nae, mme a fiwe dilo tša silifera le tša gauta. 3Gomme Morena a thuša setšhaba, ba hwetša Baegipita e le ba botho. Ga e le Moshe, yena bahlanka ba Farao le ba setšhaba ba mo lebeletše ba re ke monna e mogolo ka kudu mo nageng ya Egipita.

4Gomme Moshe a re: Morena o re: Mašegogare ke tlo putlaganya naga ya Egipita; 5Gomme maitšibulo ka moka a nageng ya Egipita a tlo hwa; go tlo thoma ka morwa wa pele wa Farao wa go tlo dula sedulong sa gagwe, gwa iša go wa leitšibulo wa mosadi wa molata e a khunamego lwaleng, le maitšibulo ka moka a diruiwa. 6Ke mo go tlogo ba le sello se segolo nageng ka moka ya Egipita; e tlo ba se se fetago dillo ka moka tše di kilego tša ba gona, le tše di tlo ba gona. 7Eupša mo go Baisiraele ka moka go ka se ke gwa kwala le mpša e bopelago motho le ge e le seruiwa. Ke mo le tlogo lemoga gore Morena o hlaola Baisiraele mo go Baegipita. 8Ke mo bahlanka ba gago ka moka ba tlogo tšwela go nna ba lotšha ba re: A ko tšwe, wena le setšhaba ka moka se se go šalago morago! Ke gona ge ke tlo tšwa. A realo a tšwa go Farao, a tloga a tuka bogale.

9Ke tšona tše Morena a di boditšego Moshe a re: Farao a ka se ke a kwa se le se bolelago, gore ke dire mehlolo e mentši mo nageng ya Egipita. 10Gomme mehlolo yeo ka moka e dirilwe ke Moshe le Arone ba lebane le Farao. Mme Morena a thatafatša pelo ya Farao gore a gane go lesa Baisiraele ba tloge nageng ya gagwe.

BIBELE

© 1951, 1986 Bible Society of South Africa. Used by permission. All rights reserved.

More Info | Version Index