Search form

EKISODO 2

Matswalo a Moshe. O tšhabela Midiane

1Monna e mongwe wa leloko la Lefi o be a tšere mosadi wa Molefi. 2Mosadi eo a ima a belega ngwana wa mošimanyana; a bona e le yo mobotse, mme a mo uta kgwedi tše tharo. 3A re a se sa kgona go mo uta, a tšea sešegwana sa mahlaka a se bapa ka motimmu le ka boroku, a bea ngwana eo mo go sona, mme a se bea lehlakanokeng ka lešing la noka ya Nile. 4Kgaetšedi ya gagwe a ema kgojana, gore a bone se se tlogo mo diregela.

5Gwa tla morwedi wa Farao, a theogela nokeng go hlapa, basetsana ba gagwe ba itshepelela lebotong. Ge a bona mo lehlakanokeng go na le sešegwana, a roma molata wa gagwe, a se tšea. 6A se bula a hwetša go na le ngwana; gomme mošimanyana yoo o be a lla. A mo kwela bohloko a re: Ke e mongwe wa bana ba Bahebere.

7Ke mo kgaetšedi ya gagwe a boletšego le morwedi wa Farao, a re: A nka se ke ka go biletša mosadi e a amušago wa Mohebere, a go amušetša ngwana yo?

8Morwedi wa Farao a re: A ko ye hle! Mme kgarebe yeo ya ya ya bitša mmago ngwana eo. 9Morwedi wa Farao a mo laya a re: Tloga le ngwana e o nkamušetše; o tlo newa moputšo ke nna. Mosadi a tloga le ngwana eo a mo amuša. 10Ya re ge a godile, a mo iša go morwedi wa Farao, a ba morwa wa gagwe, a mo reela leina a re ke Moshe; ka gobane a re: Ke mo ntšhitše meetseng.

11Mehleng ya ge Moshe a godile, a tšwetše go ba gabo, a bona ba le mothubong; a bona monna wa Moegipita a itia monna wa ba gabo wa Mohebere. 12Moshe a iša mahlo thoko tšohle a bona go se motho, mme a bolaya Moegipita eo, a mo epela lešabašabeng. 13Ka la ka moswana a tšwa, a hwetša banna ba babedi ba Bahebere ba elwa. A bolela le yo borumulane a re: O reng o itia ngwaneno?

14Monna eo a re: Ke mang e a go beilego moahlodi wa rena? A o rata go mpolaya bjalo ka ge o bolaile Moegipita yola? Moshe a tšhoga a re: Gale taba ye e a tsebja! 15Le Farao a e kwa, taba eo, mme a rata go bolaya Moshe. Gomme Moshe a tšhaba Farao, a yo dula nageng ya Midiane; a fihla a dula hleng le sediba.

16Gomme moperisita wa Midiane o be a na le barwedi ba ba šupago; bona bao ba tla ba ga meetse ba tlatša megopo, gore ba noše dihuswane tša tatabo. 17Gwa tla badiši, ba ba raka. Gomme Moshe a tsoga a ba lwela, a noša dihuswane tša bona. 18Ya re ge ba boela go Reguele tatabo, yena a re: Lehono le akgofišitšwe ke eng?

19Bona ba re: Monna wa Moegipita o re namoletše diatleng tša badiši, a ba a re gela meetse, a noša dihuswane.

20Reguele a bolela le barwedi ba gagwe a re: Monna e le mo tlogeletšeng? Mmitšeng a tle a je bogobe.

21Gomme Moshe a kgahlwa ke go dula le monna eo; mme yena a ba a mo nea morwedi wa gagwe Tsipora ya ba mosadi wa Moshe. 22Tsipora a belega ngwana wa lesogana, a mo reela leina la Gerisome (Modiiledi); gobane a re: Ke diiletše nageng e šele.

23Lebakeng leo la mehla e mentši go hwile kgoši ya Egipita. Baisiraele bona ba be ba fegedišwa ke mothubo, ba lla; dikolomelo tša bona tša ge ba le mothubong tša fihla go Modimo. 24Modimo o kwile diphegelo tša bona. Modimo o gopotše kgwerano ye a e dirilego le Aborahama le Isaka le Jakobo. 25Modimo o lebeletše Baisiraele; mme Modimo a ba tseba.

BIBELE

© 1951, 1986 Bible Society of South Africa. Used by permission. All rights reserved.

More Info | Version Index