Search form

EKISODO 31

Badiri ba dilo tša Ntlokgethwa Sabatha

1Morena o laetše Moshe a re: 2O tsebe gore ke nna ke biditšego Betsaliele ka leina; ke morwa wa Uri morwa wa Huri, wa moloko wa Juda. 3Ke mo humiša moya wa Modimo, le bohlale, le tlhaolaganyo, le tsebo, le go kgona mediro ya mehutahuta; 4gore a tsebe mediro ya bohlale, a e dira ka gauta, le ka silifera, le ka mphiri, 5le go seta maswikana a botšhepi, le go betla dikwata, le go tseba mediro ya mehutahuta. 6Le gona ke nna ke mo filego Oholiaba morwa wa Ahisama wa moloko wa Dani. Ka gobane mo pelong ya e a hlalefilego ke nna ke beilego bohlale. Mme ba tlo dira tšohle tše ke go laetšego tšona. 7Ba kgone o dira Ngwako wa Kgwerano, le polokelo ya melao, le sekhurumelo sa poelano sa go e khurumela, le dilo ka moka tša Ngwako woo, 8le sethalana le dibjana tša sona, le sehlomapone se se tagilego, le aletare ya diorelo, 9le aletare ya dihlabelo le dibjana tša yona ka moka, le legopo le leoto la lona, 10le diaparo tše di logilwego setšhepi, le diaparo tše kgethwa tša, Arone le tša barwa ba gagwe, tša ge ba ntirela, 11le makhura a setlolo, le diorelo tša monko o bose tša sekgethwa. Ba tlo dira tšohle ka mo ke go laetšego ka gona.

12Morena o laetše Moshe a re: 13Bolela le Baisiraele o re: Le fele le hlokomela disabatha tša ka, ka gobane ke bjona bohlatse go nna le go lena, bohlatse bja gore go tsebje gore le kgethwa ke nna Morena. 14Le hlokomele ge la Sabatha, ka gobane ke lona le lekgethwa la lena. E a le gobošago, a a hwe lehu; ka gobane e a dirago modiro ka lona, moya wa gagwe o ripše setšhabeng sa gabo. 15Mediro a e dirwe ka matšatsi a selelago; la go šupa lona ke la go khutša sa ruri, le le kgethetšwego Morena. Motho e a dirago modiro ka lona tšatši la Sabatha, a a hwe lehu. 16Baisiraele a ba hlokomele la Sabatha ge, gore Sabatha e dirwe go iša ditlogolong tša bona, e be kgwerano e sa felego. 17E be bohlatse bja neng le neng bja gore ke kwane le Baisiraele; ka gobane Morena o dirile legodimo le lefase ka matšatsi a selelago; ka la go šupa a khutša, a lesa mediro.

18Ya re ge Modimo a feditše go bolela le Moshe kua thabeng ya Sinai, a mo nea diphaphathi tše pedi tša matlapa a ngwadilwego ke monwana wa Modimo.

BIBELE

© 1951, 1986 Bible Society of South Africa. Used by permission. All rights reserved.

More Info | Version Index