Search form

EKISODO 9

Kotlo ya dinkhu le ya dikutu le ya sefako

1Ke mo Morena a boletšego le Moshe a re: Yaa go Farao o mmotše o re: Morena Modimo wa Bahebere o re: Lesa setšhaba sa ka se sepele, se ye se ntirele. 2Ka gobane ge o ka gana go ba lesa ba sepela, o sa fela o ba swere, 3gona seatla sa Modimo se tlo swara diruiwa tša gago tše di lego nageng, le dipitsi, le dipokolo, le dikamela, le dihuswane, ka dinkhu tše šorošoro. 4Gomme Morena o tlo hlaola diruiwa tša Baisiraele go diruiwa tša Baegipita; mme mehlapeng ya Baisiraele go ka se ke gwa hwa le e tee. 5Morena a bea lebaka a re: Tšona tše Morena o tlo di dira ka moswana.

6Ka la ka moswana Morena a di dira; diruiwa tša Baegipita tša hwa ka moka; mo diruiweng tša Baisiraele gwa se ke gwa hwa le e tee. 7Farao a roma motseta, a hwetša mo go diruiwa tša Baisiraele go sa ka gwa hwa le e tee. Fela, pelo ya Farao ya thatafala, a se ke a lesa Baisiraele ba sepela.

8Ke mo Morena a boletšego le Moshe le Arone a re: Gamarang dipilo ka diatla tše pedi, gomme Moshe a di gašetše godimo a lebane le Farao. 9Dipilo tšeo di tlo tloga e le lerole, tša hlakanya naga ka moka ya Egipita, ya ba dikutu tše di tlogo phulega ya ba dintho mo go batho le go diruiwa nageng ka moka ya Egipita. 10Gomme ba swara dipilo, ba ema ba lebane le Farao; Moshe a di gašetša godimo, mme tša tšweletša dikutu, tša phulega ya ba dintho bathong le diruiweng. 11Dingaka tšona tša šitwa go ema pele ga Moshe le Arone ka baka la dikutu; ka gobane le dingaka di be di tšwile dikutu le Baegipita ka moka. 12Mme pelo ya Farao ya thatafatšwa ke Morena, a se ke a kwa se ba se bolelago; ya ba tšona tšeo tše Morena a di boditšego Moshe.

13Bjale Morena a botša Moshe a re: Tsoga e sa le ka moswana o eme o lebane le Farao, o mmotše o re: Morena Modimo wa Bahebere o re: Lesa setšhaba sa ka se ye se ntirele, 14ka gobane dikotlo tša ka tše ke tlogo di roma bjale di tlo tlela pelo ya gago, le bahlanka ba gago, le setšhaba sa gago, gore o lemoge gore mo lefaseng ka moka ga go e mongwe e a swanago le nna. 15Ka gobane ge nka be ke emišitše letsogo ka go otla ka dinkhu, wena le setšhaba sa gago, le ka be le fedišitšwe mo lefaseng. 16Fela ke sa na le se ke sa go lesitšego ka baka la sona. Ke sa go lesitše gore ke go bontšhe maatla a ka, gore leina la ka le bolelwe lefaseng ka moka. 17O sa fela o thibela setšhaba sa ka, o sa se lese sa sepela. 18Bjale o tsebe gore bosasa pakeno ke tlo neša sefako se segolo ka kudu; e sa le mola go thewa lefase la Egipita, ga go ešo gwa ba le sefako se sekao. 19Bjale roma bahlanka o tšhabiše diruiwa tša gago le dilo tšohle tša gago tše di lego nageng; ka gobane ge go ka hwetšwa motho a se ngwakong, le ge e le kgomo, ge sefako seo se itia, se tlo bolaya tšohle. 20Bjale, mo go bahlanka ba Farao e a bego a boifa Lentšu la Morena o tšhabišeditše bahlanka ba gagwe le diruiwa tša gagwe nywakong. 21E a bego a sa šetše lentšu la Morena, o lesitše bahlanka ba gagwe le diruiwa tša gagwe nageng.

22Gomme Morena a botša Moshe a re: Emišetša letsogo la gago godimo, gore mo nageng ya Egipita ka moka go ne sefako, se wele batho le diruiwa, le tšohle tše di medilego mašemong mo nageng ya Egipita. 23Moshe a emišetša lepara la gagwe godimo; Morena a roma medumo le sefako; magadima a fela a itia lefase. Morena a neša sefako mo nageng ya Egipita. 24Sefako sa na, magadima a fela a itia gotee le sefako, ya ba kotsi e kgolo ye e bego e sešo ya ba gona nageng ka moka ya Egipita mehleng ka moka ya ge e dutšwe ke batho. 25Mo nageng ka moka ya Egipita sefako sa bolaya tšohle tše di bego di le nageng, batho le dikgomo, sa senya le dibjalo ka moka mo mašemong, sa thokga dihlare ka moka nageng yeo. 26Gwa šala naga ya Gosene fela mo go bego go agile Baisiraele; gona moo go be go se sefako.

27Ke mo Farao a romilego motseta, a bitša Moshe le Arone, a bolela le bona a re: Bjale ke sentše; Morena o lokile; mme nna le batho ba ka ga re a loka. 28Nthapeleleng go Morena, ka gobane medumo ya Modimo le sefako se di nkgoletše. Ke tlo le lesa la sepela; mme le ka se hlwe le diega.

29Moshe a fetola a re: Ge ke tšwile motseng wo, ke tlo emišetša matsogo a ka go Morena; ke mo medumo e tlogo fela; le sefako se ka se hlwe se eba gona, gore o tle o lemoge gobane lefase ke la Morena. 30Fela, ge e le wena le bahlanka ba gago, ke tseba gore Morena Modimo le sa tlo mmoifa.

31Mabele ona a be a sentšwe, le leokodi, ka gobane di be di šetše di tswetše. 32Korong yona ga se ya itiwa, le marege; ka gobane tšeo e be e se lebaka la tšona.

33Moshe a re go tšwa motseng wa Farao, a emišetša matsogo go Morena gomme medumo ya kgaotša; dipula tša khula lefaseng. 34Bjale Farao ge a bona go fetile pula yeo le sefako le medumo, a fela a iša pele go senya, a thatafatša pelo ya gagwe, yena le bahlanka ba gagwe. 35Pelo ya Farao ya dula e thatafetše, a se ke a lesa Baisiraele ba sepela; ya ba tše Morena a di boletšego ka Moshe.

BIBELE

© 1951, 1986 Bible Society of South Africa. Used by permission. All rights reserved.

More Info | Version Index