Search form

LEFITIKO 12

Melao ya motswetši

1Morena o boletše le Moshe a re: 2Botša Baisiraele o re; Ge mosadi a imile mme a belega ngwana wa mošimanyana, o tšhilafetše matšatši a šupago, gwa etša ge a tšhilafetše mehleng ya ge a bona kgwedi. 3Ka tšatši la seswai ngwana wa mošimanyana a bolotšwe. 4Mmagwe a dule gae matšatši a masome a mararo, ka ge a sa hlapa. A se ke a swara se sekgethwa; a se ke a ya sekgethweng, go be go fele matšatši a go thakgafatšwa ga gagwe.

5Ge a belege ngwanenyana a fetše dibeke tše pedi a tšhilafetše, ka ge a sa hlapa. A dule gae matšatši a masome a selelago le metšo e selelago, go be go fele matšatši a go thakgafatšwa ga gagwe.

6E re ge matšatši a thakgafatšo bakeng sa ngwana wa mošimanyana, goba bakeng sa ngwanenyana, a phethegile, a tliše kwana ya ngwaga o tee, e be sehlabelo le mokurwanyane le leebana, e be seloba, a di tliše mojako wa Ngwako wa Kgwerano go moperisita. 7Yena o tlo di fihliša go Morena a mo direla poelanyo; ke mo a tlogo thakgafala mmeleng wa gagwe.

8Ke wona molao o lebanego mmago ngwana ge a belege mošimanyana goba ngwanenyana. 9Ge a ka hlaelelwa ke go ntšha nku, gona a tliše maebana a mabedi, goba mekurwanyana e mebedi; le lengwe e be la sehlabelo, le lengwe e be la seloba; moperisita o tlo mo direla poelanyo a sekega.

BIBELE

© 1951, 1986 Bible Society of South Africa. Used by permission. All rights reserved.

More Info | Version Index