Search form

LEFITIKO 17

Dibego tša ge go hlabilwe; go ila madi

1Morena o boletše le Moshe re: 2Bolela le Arone le barwa ba gagwe le Baisiraele ka moka, o re: Se se laetšwego ke Morena sese: 3Mang le mang wa leloko la Isiraele e a hlabago pholo goba nku mo mešašeng le ge e ka ba kua ntle ga mešaša, 4mme a se e tliše mojako wa Ngwako wa Kgwerano ya ba sebego sa Morena mo pele ga ntlo ya Morena, monna, eo o tlo ba le molato wa madi, o tšholotše madi; monna eo o tlo ripiwa setšhabeng sa gabo. 5Ke go re: tše ba di hlabago, tše ba bego ba di hlaba kua ntle nageng, ba di tliše go Morena mojako wa Ngwako wa Kgwerano, go moperisita, ba di hlabe e be didimo tša dilebgao tše di tlišetšwago Morena. 6Moperisita a gaše madi a tšona mo aletareng ya Morena mojako wa Ngwako wa Kgwerano, a tšhume makhura, e be a monko o bose wa Morena. 7Tše ba di hlabago, ba se ke ba hlwa ba di hlabela badimo, ba otswa ba ba šetše morago. A e be molao wa bona wa ka mehla, go iša ditlogolong tša bona.

8O ba botše o re: Mang le mang wa leloko la Isiraele, le ge e le o šele e a diiletšego go bona, ge a tliša sehlabelo le ge e le se a se hlabago, 9ge a sa se tliše mojako wa Ngwako wa Kgwerano a se lokišetša Morena, monna eo a a ripiwe setšhabeng sa gabo.

10Mang le mang wa leloko la Isiraele, le o šele e a diiletšego go bona, e a jago madi afe le afe, yena yoo ke tlo mo hlaba ka mahlo, ka mo ripa mo setšhabeng sa gabo. 11Gobane bophelo bja mmele bo mo mading; ona ke le neetše gore e be a go le direla poelanyo mo aletareng; ka gobane madi ke ona a kgonago go dira poelanyo ka ge a ne bophelo. 12Ke ka baka leo ke ileditšego Baisiraele ka re: mo go bona le go ba ba diiletšego go bona go se ke gwa ba le e a jago madi.

13Mang le mang e lego Moisiraele, le ge e le o šele e a diiletšego go bona, ge a ka bolaya phoofolo, le ge e le nonyana, a tšholle madi a yona, a a tšheletše ka mmu. 14Ka gobane bophelo bja mmele ka moka ke madi a wona; ke gona ke boditšego Baisiraele ka re: Le se ke la ja madi a mmele ofe le ofe, ka gobane bophelo bja mmele ka moka ke madi a wona; gomme mang le mang e a a jago a ripiwe. 15Le ge e ka ba mang le mang wa bolena, le ge e le o šele, e a jago setoto, le ge e le se se bolailwego ke sebata, a hlatswe diaparo tša gagwe, a hlape meetseng, a be wa ditšhila go fihla mantšiboa, e be mo a sekegago. 16Ge a sa hlatswe diaparo tša gagwe, a sa hlape mmele, gona o obile molato.

BIBELE

© 1951, 1986 Bible Society of South Africa. Used by permission. All rights reserved.

More Info | Version Index